Wugubutulo 3

Ibalula ya Yeesu kwa vahuvililaaji vaakwe ava ku Salidi

1 “Muyandishila umalayikha wa shipuga sha vahuvililaaji vangu ava ku lijumbi lya Salidi ndeeni,

Amaswi aga gahumile kunyangu one Yeesu, one niitema iNumbula fungati isa Nguluvi ni nondwe fungati. Nisimeenye injendo seenyu, avanji vikivaaga muli wuumi, leelo mufwile. Ndeeno, munipuliise! 2 Lamushi! Mugajinie gina gasigeele muumi, leelo giilwa kiifwa kwa kiiva injendo seenyu sisili nofu pa Nguluvi wangu. 3 Lino, mukumbushe shina mwaposheelaga na shina mwapulikhaga, mugakhate ago na kilambiisila. Leelo nda musilamukha, nikhayinsa ngaja umuhiiji shina iyinsa, musikhalumanya uluhaavi ulo.

4 Leelo, muna vaanu vasheefu mu Salidi vina vasitopiise amenda gaanave kwa kigaha uwunansi. Awo vaveene vakhava vijenda lumo noone vafwele amenda amavalafu, kwa kiiva avaanu awo vifwaya. 5 Umuunu yuna akhamena, akhafwala amenda amavalafu ngaja aveene. Na yuune nisikhaliwuusa kaa, ilitaawa lyakwe mu Litaafili ilya Wuumi, leelo nikhaliyiitikha pa Daada wangu na pa vamalayikha vaakwe.

6 Umuunu yuna ana makutu apulishe gala gina uNumbula wa Nguluvi ikifijovela ifipuga fya vahuvililaaji.

Ibalula ya Yeesu kwa vahuvililaaji vaakwe ava ku Filadelifiya

7 “Muyandishila umalayikha wa shipuga sha vahuvililaaji vangu ava ku lijumbi lya Filadelifiya ndeeni,

Amaswi aga gahumile kunyangu one Yeesu, one nili Munofu, khanji nili wa shiyooli. Nina fungulo ya wutawulilwa wa mutwa uDawudi, nda nidindule kusiina uwa kidinda, khanji nda nidinde kusiina uwa kidindula. Ndeeno, munipuliise! 8 Nisimeenye injendo seenyu. Loleeli, niviishile pamwandi yeenyu umulyango guna guli mwasi, kusiina umuunu yuna akwiliile kigudinda. Nimeenye muna ngufu ndoodo, leelo muliyinatiile iliswi lyangu, khanji musalikhaana ilitaawa lyangu. 9 Puliisi! Nisivaleete avaanu va shipuga sha vavanda va Shetaani, vina vikiyitambula kiija Vayahuudi, leelo vadehi. Nisivagahe vayinse kivafugamila, baheene vamanye kiija, one nivageene omwe. 10 Mwaliyinatila iliswi lyangu ilya kiiva nu wugugumilo, ndeeno na yuune nisivayangalile omwe muhume mu luhaavi lwa majelo gina gahejeelile kiyinsa kivajela avaanu va mu nyi yoona. 11 Niyinsa lilino. Khataji mandu shina munasho, asaali ayinse umuunu kivapokha injoola yeenyu. 12 Umuunu yuna akhamena, nikhamuviikha kiiva nsimbili mu shiyumba sha nanda ya Nguluvi wangu, asiihuma umo kaa. Kwa uyo, nikhaliyandikha ilitaawa lya Nguluvi wangu na ilitaawa lya lijumbi lya Nguluvi wangu. Ilijumbi ilyo Yelusalemu mya, lina liyiikha kihuma kwa Nguluvi wangu. Khanji kwa uyo nikhaliyandikha yuune, ilitaawa lyangu ilipya.

13 Umuunu yuna ana makutu apulishe gala gina uNumbula wa Nguluvi ikifijovela ifipuga fya vahuvililaaji.

Ibalula ya Yeesu kwa vahuvililaaji vaakwe ava ku Lawodikiya

14 “Muyandishila umalayikha wa shipuga sha vahuvililaaji vangu ava ku lijumbi lya Lawodikiya ndeeni,

Amaswi aga gahumile kunyangu one Yeesu, one yuune Amina, one nili mulunjikhaaji muyinatifu na wa shiyooli. One yuune shiyanso sha wuwumbaaji wa Nguluvi. Ndeeno, munipuliise! 15 Nisimeenye injendo seenyu. Nimeenye kiija omwe musili vasisimu wala musili vapyo. Shiba mwali muve vasisimu awu vapyo! 16 Lino kiiva muli vafushifu, musili vasisimu wala musili vapyo, ndeeno nisivadeeshe muhume mu mulomo gwangu. 17 Omwe mwijova, ‘Ose tili vawusi, tikwavile, tisishepushiilwe shoshoona.’ Leelo musimeenye kiija omwe mugaya shiinu, muli va kisungupilwa, muli vapiina, muli vapofu, khanji muli bwinda. 18 Nikivasimila kiija, mugule kunyangu isahaabu yina yivalasiiwe nu mooto, baheene muve vanya wusi. Khanji lunofu mugule amenda amavalafu, baheene mufwale mufihe uwubwinda weenyu, musikhawonaga nsoni. Mugule umugoda gwa kidomohesa mu meeho geenyu, baheene muloleele wunofu.

19 Woona vina nivageene, nikivadalishila na kivayoonya, lino jimbaji kilambiisila. 20 Puliisi, one niyiimile pa mulyango nihoodesa. Umuunu yuna asipulishe ishawuti yangu na kidindula umulyango, nisiyinjile kunyaakwe nilye lumo nawo, woope asiilye lumo noone. 21 Umuunu yuna akhamena, nikhamuyiitikha kikhala lumo noone mu shitengo shangu sha Wutwa. Akhava ngaja one yuna nagamenaga amajelo, nikheele lumo nu Daada mu shitengo shaakwe sha Wutwa.

22 Umuunu yuna ana makutu apulishe gala gina uNumbula wa Nguluvi ikifijovela ifipuga fya vahuvililaaji.”