Wugubutulo 2

Ibalula ya Yeesu kwa vahuvililaaji vaakwe ava ku Efeso

1 UYeesu wáyitenekhaga kinijova kiija, “Muyandishila umalayikha wa shipuga sha vahuvililaaji vangu ava ku lijumbi lya Efeso ndeeni,

Amaswi aga gahumile kunyangu one Yeesu. One nikheete inondwe sila fungati mu liwokho lyangu ilya kundiilo, nijenda paakhati mu nsimbili isa sahaabu fungati isa muli sila. Ndeeno, munipuliise! 2 Nisimeenye injendo seenyu, uludali lwenyu nu wugugumilo weenyu. Khanji nimeenye kiija, musihanga na vaanu avanansi vina vikiyitambula vanandeje, humbe vasili vanandeje, mwavajelaga, mwamanya kiija vakhandi vadehi. 3 Nimeenye kiija mwigugumila na kiyijimfilisa kwa kiiva yangu one, musikhatala.

4 Leelo nina liswi noomwe. Muwuleshile uwugani weenyu uwa lwamwandi. 5 Lino mukumbushe pina mukhagwile, mulambiisile, muve ni njendo isa lwamwandi. Leelo nda musilambiisila, niyinsa kunyeenyu kiwuusa insimbili iya sahaabu iya lumuli pina lukwali. 6 Nikivasufya kwa kiiva mukigakhalalila gina vikigasenga avavanda va Nikolayi. Ago, hata yuune nikigakhalalila.

7 Umuunu yuna ana makutu apulishe gala gina uNumbula wa Nguluvi ikifijovela ifipuga fya vahuvililaaji. Umuunu yuna akhamena, nikhamutawula alye amakhomo ga mupishi guna gwihumya uwuumi wuna wuli mu shiisi sha Nguluvi.”

Ibalula ya Yeesu kwa vahuvililaaji vaakwe ava ku Simulina

8 “Muyandishila umalayikha wa shipuga sha vahuvililaaji vangu ava ku lijumbi lya Simulina ndeeni,

Amaswi aga gahumile kunyangu one Yeesu, one yuune wa Wutasi khanji yuune wa Wudugo, nafwisaga khanji nafyukhaga. Ndeeno, munipuliise! 9 Nigameenye amalava geenyu nu wupiina weenyu, leelo omwe shiyooli muna wuwusi. Nimeenye amaligo gaanave vina vikiyitambula kiija Vayahuudi, leelo ava, shipuga sha vavanda va Shetaani. 10 Musikhatiilaji amalava gina gakhavapata. Puliisi! UShetaani asivapinye avayeenyu vamonga mu shifungo avajele, baheene musiilave nsiku ishumi. Muyitenekhaje kiiva vayinatifu mbakha kiifwa, baheene one nisivapeele injoola ya wuumi wa shiluta.

11 Umuunu yuna ana makutu apulishe gala gina uNumbula wa Nguluvi ikifijovela ifipuga fya vahuvililaaji. Umuunu yuna akhamena, asikhapyasiwa hata padoodo ni mfwa ya wuvili.”

Ibalula ya Yeesu kwa vahuvililaaji vaakwe ava ku Peligamo

12 “Muyandishila umalayikha wa shipuga sha vahuvililaaji vangu ava ku lijumbi lya Peligamo ndeeni,

Amaswi aga gahumile kunyangu one Yeesu, one nina panga yina nemi koona na koona. Ndeeno, munipuliise! 13 One nipameenye pina mwikhala, apo baheene pina iitema uShetaani. Hata ndeeno mukilikhata ilitaawa lyangu. Khanji musikhakhaanile ilihuuvi lyenyu kunyangu, hata mu luhaavi ulwa Antipa umulunjikhaaji wangu, umuyinatifu mbakha kiifwa. Umuunu yula yumwene yuna wábudwagwa paakhati yeenyu, pina iikhala uShetaani.

14 Leelo nina liswi noomwe. Avaanu vamonga munyeenyu viyinatila amamanyiso ga Balaamu. UBalaamu yumwene wámumanyisaaga uBalaki avahonsaje aVaisilaheli kiija, vagahe uwunansi uwa kiilya ifyakiilya fina fihumisiiwe ku mafuunyo ga manguluvi, na kigaha uwushemi. 15 Shiisho ndeeno, avanji kunyeenyu vikigayinatila amamanyiso ga vavanda va Nikolayi. 16 Lino, lambisilaji! Nda musilambiisila, nisiyinse nyangu kunyeenyu, na kiilwa noomwe kwa panga yina yiihuma mu mulomo gwangu.

17 Umuunu yuna ana makutu apulishe gala gina uNumbula wa Nguluvi ikifijovela ifipuga fya vahuvililaaji. Umuunu yuna akhamena, nikhamupeela ishakiilya shina shitambulwa mana, shina shafihwagwa. Khanji nikhamupeela ilingʼanga ilivalafu lina liyandiikhwe ilitaawa ilipya lina akwasiina yuna alimeenye, leelo yula yuna ikiliposheela.

Ibalula ya Yeesu kwa vahuvililaaji vaakwe ava ku Tiyatila

18 “Muyandishila umalayikha wa shipuga sha vahuvililaaji vangu ava ku lijumbi lya Tiyatila ndeeni,

Amaswi aga gahumile kunyangu one Lusawo lwa Nguluvi. Nina meeho ngaja muli sa mooto na magulu gingʼaala ngaja shaaba yina yinyanyiilwe mu mooto. Ndeeno, munipuliise! 19 Nisimeenye injendo seenyu, kiiva muna lugano, ilihuuvi, kivasenjela avanji, lumo nu lugugumilo. Khanji injendo seenyu isa lino, nofu kishila isa pawukuulu.

20 Leelo nina liswi noomwe. Omwe mukigakunda amaswi ga washimaayi yula uYesebeeli, yuna ikiyijova kiija mukuwamalago, leelo asili mukuwamalago. Mukimuleshela ikivajanjilisa avavanda vangu kwa kivamanyisa vagahe uwushemi na kiilya ishakiilya shina shihumisiiwe ku mafuunyo ga manguluvi. 21 One namupeela uluhaavi ulwa kilambiisila uwunansi, leelo ikhaana kilekha uwushemi waakwe. 22 Puliisi! Lino kwa kiiva ya ago, nisimutoosese uwutamu wuna asipootwe na kilamukha pa nkwembe. Khanji vina viwaafukha nawo nisivalafye, nda vasilambiisila na kilekha kifwata injendo imbi isa Yesebeeli. 23 Khanji, nisivabude avavanda vaakwe. Baheene avaanu va fipuga fya vahuvililaaji fyona, vasiimanye kiija one niseesa inumbula na mahiiva ga shila muunu. Khanji nisimuhombe shila muunu kilingana ni njendo sina munaso.

24 Lino vamonga mu omwe ukho ku Tiyatila, vakwali vayinatilaaji. Avaanu ava vasiyinatila amamanyiso ga Yesebeeli uyo, wala vasisimeenye imbuusa iso sina avanji viijova mbuusa sa mukhati. Shiyooli imbuusa iso mamanyiso ga Shetaani! Kwa vaanu avayinatilaaji ava, niijova ndeeni, nisikhavapeela umusigo ugunji. 25 Leelo muyinatilaje wunofu amanofu ago gina munago mbakha pina nikhayinsa. 26 Umuunu yuna akhamena na kiyinatila iliswi lyangu mbakha kuwudugo,

‘Nikhamupeela uwutawulilwa kwa vaanu va nyi soona.

27 Umwene akhavatema na kivamena avalugu vaakwe woona,

akhavabojola ngaja shigaana sha lilongo.’

Umuunu yoyoona yuna akhagamena, akhahanga mu wutawulilwa wuna napelwagwa nu Daada. 28 Na yuune nikhamupeela inondwe yila yina yingʼaala mandu pina kuhenga kunena.

29 Umuunu yuna ana makutu apulishe gala gina uNumbula wa Nguluvi ikifijovela ifipuga fya vahuvililaaji.”