Wugubutulo 1

UWugubutulo

wa Yeesu Kilisito kwa Yohana

Amaswi aga wutasi

1 Uwu wugubutulo wa Yeesu Kilisito. Wápeliilwe uwugubutulo uwo nu Nguluvi, baheene avawonense avavanda vaakwe amaswi gina mbakha gawoneshe lilino ndeeni. UYeesu wámupeelaga uYohana umuvanda waakwe uwugubutulo uwo kishilila kwa malayikha waakwe. 2 Baheene woope uYohana wáyibedelaga goona gina wágaaga, amaswi ga Nguluvi nu wubedelo wa Yeesu Kilisito. 3 Ayimiliilwe yuna ikivayimbila avayine amaswi aga wukuwamalago gina gayandiikhwe mu litaafili muno. Khanji ayimiliilwe yuna ikigapulikha na kiyinatila, kwa kiiva uluhaavi lwa njowo iso, luwonekha luvejeelile.

UYohana ikivahunjila avahuvililaaji ava ku Asiya

4 One Yohana nikifiyandishila ibalula iyi ifipuga fungati ifya vahuvililaaji va Yeesu, ifya mu nyi ya Asiya. Imota nu wulindamafu, five lumo noomwe kihuma kwa yuna akhandi akwali, akwali na akhava akwali, ni Numbula fungati sina sili pamwandi ya shitengo shaakwe isha Wutwa, 5 khanji kihuma kwa Yeesu Kilisito. Umwene mulunjikhaaji wa kihuviililwa, yuna muyimililaaji wa vina vafwile, khanji muyimililaaji wa vatwa woona ava mu nyi.

UYeesu Kilisito yumwene atuganile, khanji atuwusiise mu wunansi weesu, kishilila idanda yaakwe pina wáfwisaga pa musalaaba. 6 Atugahile tive mu Wutwa waakwe, vatambule pa Nguluvi uDaada waakwe. Uwutupikho nu wutawulilwa, wuve nu mwene shiluta na shiluta! Amina!

7 Loleelaji! Umwene iyinsa na mafunde!

Avaanu woona vakhamwaga,

hata avaanu vala vina vamuhomaga ni malala,

ifimyanja fyona ifya mu nyi,

fikhayaalama kwa kiiva ya mwene.

Shiyooli, amina!

8 UMutwa uNguluvi ilogola kiija, “One yuune Alufa khanji yuune Omega, yuna akhandi akwali, akwali na akhava akwali, one yuune Nguluvi Munya Ngufu Soona.”

UYohana ikimwaga uKilisito mu mahilu

9 One Yohana, muhuvililaaji muyeenyu na nili lumo noomwe kimuyinatila uYeesu Kilisito mu malava, mu Wutwa na kigugumila. Nikhandi nidindiilwe pa shigunguli, shina shitambulwa Patimo shina shili paakhati ya bahali, kwa kiiva ya kiyalaalisa iLiswi lya Nguluvi nu wubedelo wa Yeesu Kilisito. 10 Mu lisiku lya Mutwa, nikhalongosiiwe nu Numbula wa Nguluvi. Uluhaavi ulo napulikha ishawuti nkhome kunyuma yangu, ngaja shawuti ya balagumu. 11 Ishawuti iyo yajovaga kiija, “Aga goona gina ukigaaga, ugayandishe mu litaafili. Pina wayandikha, ulitwale ilitaafili mu fipuga fungati ifya vahuvililaaji ifya mu majumbi ga Efeso, Simulina, Peligamo, Tiyatila, Salidi, Filadelifiya na mu Lawodikiya.”

12 Baheene naseetukha nimwaje yuna ilogola noone, nasaaga insimbili fungati isa muli isa sahaabu. 13 Paakhati ya nsimbili isa muli iso, namwaga umuunu ngaja Lusawo lwa Muunu. Afwele inkhansu nali na ayipinyile ulukhova lwa sahaabu mu shifuva. 14 Inyele sa mutwe gwakwe sikhandi mbalafu ngaja hamba na meeho gaakwe gakhandi ngaja muli sa mooto. 15 Amagulu gaakwe gakhandi gingʼaala mandu ngaja shaaba yina yinyanyiilwe mu mooto, khanji ishawuti yaakwe yikhandi ngaja nkhokhomo ya malenga minshi. 16 Mu liwokho lyakwe ilya kundiilo, akhandi ni nondwe fungati, ni panga inya wukhali koona na koona, yikhandi yiihuma mu mulomo gwakwe. Uweeni waakwe, wukhandi wungʼaala ngaja lijuva ilikhali mandu.

17 Naganaga kimwaga nayigwisaaga pa magulu gaakwe, ngaja muunu yuna afwile. Leelo wánikhata ni liwokho lyakwe ilya kundiilo wáaja, “Usikhatiilaga! One yuune wa Wutasi, khanji yuune wa Wudugo. 18 One yuune yuna nili muumi, yuna nikhandi nifwile, loleela lino nili muumi shiluta na shiluta. One nina fungulo sa wutawulilwa wa mfwa ni sa wusimu.

19 “Lino, uyandishe injowo sina wasaaga, siseene sina sikwali na sina siyinsa. 20 Wasaagaga inondwe fungati sina sili mu liwokho lyangu ilya kundiilo. Khanji wasaagaga insimbili sila isa muli fungati sa sahaabu. Nikuwulanise uluganulo lwa mbuusa isi. Inondwe sila fungati, vamalayikha va fipuga fila fungati fya vahuvililaaji. Insimbili sila isa sahaabu isa kiviishila imuli, fipuga fungati ifya vahuvililaaji va Yeesu.”