Ilitaafili nu Mwana Nkholo
5
1 Baheene naawona ilitaafili mu liwokho lya kundiilo lya yula yuna ashikhaliile ishitengo sha Wutwa.
Ilitaafili ilyo liyandiikhwe mukhati na kunja,
limatiikhwe nu mupulya mbali fungati.
2 Naawona umalayikha umunya ngufu,
ilogola kwa shawuti nkhome iijova,
“Yu naani yuna ifwaya kilamaatula umupulya ugwa mbali fungati na kiligubutula ilitaafili ili?”
3 Leelo akhandi akwasiina umuunu,
kushaanya wala mu nyi wala mu wusimu,
yuna akwiliile kililamaatula ilitaafili ilyo na kiliyimba.
4 Baheene nayansa kikhoola mandu,
kwa kiiva nisikhaweene ishiwumbwa shoshoona shina shifwaya kishigubutula wala kishiloleela mukhati.
5 Baheene,
umunyaayumo mu vagosiivaha vala wánijovela wáaja,
“Usikhakhoolaga!
Loleela,
iNyalupala iya mu shikholo sha Yuuda,
mu shikholo sha mutwa uDawudi,
yumwene amenile.
a Ndeeno,
uyu yumwene yuna akwiliile kilamaatula umupulya fungati ugo na kilidindula ilitaafili ilyo.”
6 Baheene naawona apo nkholeela ni shitengo sha Wutwa,
uMwana Nkholob ayiimile.
Woope akhandi apiliimwe ni fiwumbwa fina (4) fila,
na vagosiivaha vala mashumi gavili na vana.
Akhandi iwonekha ngaja ashinjiilwe.
Khanji akhandi ana mapembe fungati na meeho fungati.
Ameeho ago Numbula fungati isa Nguluvi,
sina sikhandi sifiliikhwe mbali isa nyi yoona.
7 UMwana Nkholo wáyinsa kitoola ilitaafili lila mu liwokho lya kundiilo lya yula yuna wákhalaga mu shitengo sha Wutwa.
8 Pina wátoolaga ilitaafili lila,
ifiwumbwa fina (4) fila,
lumo na vagosiivaha vala mashumi gavili na vana (4),
vayigwisa pansi,
vagubama pa Mwana Nkholo.
Woona vakhandi ni malimba ni sebeti isa sahaabu sina simemile ifya kitinshilisa ingaagulwa sina sinunshilila.
Ifiinu fya kitinshilisa,
ifyo fifyene mafuunyo ga vabaagule va Nguluvi.
9 Woope vayeyema injeyemo imya vaaja,
“Owe wifwaya kitoola ilitaafili ilyo
na kilamaatula umupulya gwakwe ugwa mbali fungati,
kwa kiiva washinjwagwa
na kwa danda yaakho wamugulila uNguluvi,
avaanu va fimyanja fyona,
ifilogolo fyona,
ifikholo fyona ni nyi soona.
10 Avagahile vave mu Wutwa waakwe,
vatambule pa Nguluvi uDaada waakwe,
woope vasiiteme mu nyi.”
11 Baheene naloleela na kipulikha ishawuti sa vamalayikha vinshi vina vayiimile,
vashipiliime ishitengo sha Wutwa ni fiwumbwa fina (4),
na vagosiivaha vala mashumi gavili na gana.
Uwinshi wa vamalayikha vakhandi magana mashumi ishumi (10,000) mala magana mashumi ishumi (10,000),
mbakha usikwiliile kivavasa.
12 Nikhavapuliishe viyeyema kwa shawuti nkhome viijova,
“UMwana Nkholo yuna ashinjiilwe
ifwaya kiposheela uwutawulilwa nu wusi
nu wumanyi ni ngufu,
ilishima,
uwutupikho nu lusufyo!”
13 Baheene,
napulikha ifiwumbwa fyona fina fikhandi kushaanya,
mu nyi,
ku wusimu na mu bahali fiyeyema,
fiija,
“Yumwene yuna ashikhaliile ishitengo sha Wutwa nu Mwana Nkholo,
vasufisiwe,
vatiilwe,
vatupikhwe,
vave nu wutawulilwa,
shiluta na shiluta.”
14 Ifiwumbwa fina (4) fila fiijova,
“Amina.”
Woope avagosiivaha vala mashumi gavili na vana,
vayigwisa pansi,
vagubama na kifuunya.