Insila iya kimanya amamanyiso ga wudehi na ga shiyooli
4
1 Vagani vangu,
musikhamuhuvililaji umuunu yoyoona yuna iijova ana Numbula uMunofu,
kwa kiiva vakwali avakuwamalago avadehi vinshi mu nyi.
Leelo mumujelaje wunofu kiija,
umuunu uyu ilongosewa nu Numbula wa Nguluvi awu wuli.
2 Insila iya kimanya kiija umuunu ilongosewa nu Numbula wa Nguluvi yiyeene iyi,
yoyoona yuna iyiitikha pa vaanu kiija,
uYeesu Kilisito wáyinsile mu nyi ana muvili ngaja muunu,
uyo yumwene ilongosewa nu Numbula wa Nguluvi.
3 Leelo umuunu yoyoona yuna asikimuyiitikha uYeesu ndawuli ndeeno,
asilongosewa nu Numbula wa Nguluvi.
Umuunu uyo ilongosewa nu numbula wa mulugu wa Kilisito.
Omwe,
mupuliishe kiija,
unumbula uyo iyinsa,
lino shi ayinsile mu nyi muno.
4 Leelo vanangu,
omwe vaana va Nguluvi,
muvamenile avadehi awo,
kwa kiiva ya Numbula wa Nguluvi yuna ali mukhati yeenyu.
Umwene ana wutawulilwa kishila unumbula yuna ikivalongosa avaanu vina vasikimuhuviilila uNguluvi.
5 Avakuwamalago va wudehi awo vaanu va mu nyi,
viijova ga mu nyi,
woope vaanu va mu nyi vina vasikimuyinatila uNguluvi,
vikivapuliisa.
6 Leelo ose tili vaana va Nguluvi.
Umuunu yuna amumeenye uNguluvi,
ikitupuliisa,
leelo umuunu yuna asili wa Nguluvi,
asikitupuliisa.
Ndeeno shilushwali tikivamanya avaanu vina vilongosewa nu Numbula wa shiyooli,
na vina vilongosewa nu numbula wa wudehi.
Ulugano lwa Nguluvi
7 Vagani vangu,
tigananaje,
kwa kiiva ulugano lwihuma kwa Nguluvi.
Umuunu yoyoona yuna avageene avayine asaviilwe nu Nguluvi,
khanji yumwene amumeenye uNguluvi.
8 Leelo umuunu yuna asivageene avayine asimumeenye uNguluvi,
kwa kiiva uNguluvi wa wugani.
9 UNguluvi yumwene wátusonelaga ulugano lwakwe kwa nsila ya kimufilikha uLusawo lwakwe mwene duguli mu nyi muno,
baheene tipate uwuumi kishilila kunyaakwe.
10 Ulu lulwene lugano kiija,
tisili ose yuna tamuganaga uNguluvi!
Leelo umwene wátuganaga ose,
wámufilikha uLusawo lwakwe,
ave shadanda,
baheene awuuse uwunansi weesu na kitulingaania nu Nguluvi.
11 Vagani vangu,
uNguluvi kiiva wátuganaga ose ndeeni,
yisakulwa kiija,
na yuuse tigananaje.
12 Kusiina umuunu yoyoona yuna amwajile uNguluvi kaa.
Leelo nda tiganana,
uNguluvi apihanga noose,
uwugani waakwe wikwilana kunyeesu.
13 Ose tihanjile nu Nguluvi,
woope uNguluvi ahanjile noose.
Timeenye ndeeno,
kwa kiiva atupeelile uNumbula waakwe.
14 Ose taloleela na tikivabedela avanji kiija,
uWiheesu uNguluvi wámufiliishe uLusawo lwakwe mu nyi kiija,
ave Mukulusaaji wa vaanu.
15 Umuunu yoyoona yuna iyiitikha pa vaanu kiija,
uYeesu Lusawo lwa Nguluvi,
uNguluvi apihanga nawo,
woope apihanga nu Nguluvi.
16 Lino,
ose timeenye na kihuviilila kiija,
uNguluvi ikitugana.
UNguluvi wa wugani.
Yoyoona yuna iikhala mu lugano,
yumwene apihanga nu Nguluvi,
uNguluvi woope apihanga nawo.
17 Kwa nsila iyo,
uNguluvi ikwisa ulugano lwakwe mukhati yeesu,
baheene tive nu wukhangafu mu lisiku ilya kihigwa inyi.
Kiiva uwiikhasi weesu mu nyi muno,
wuhwanana nu Yeesu shina akhandi iikhala.
18 Pina pana lugano pasiina shitiilo,
leelo ulugano lwa shiyooli luwuusa ishitiilo shoona,
kwa kiiva kihigwa kukwene kukivagaha avaanu kiija vatiile.
Umuunu yoyoona yuna ana shitiilo,
ulugano lwa Nguluvi lusinakwile mukhati yaakwe.
19 Ose tina lugano kwa kiiva uNguluvi yumwene wátalaga kitugana.
20 Umuunu nda ilogola kiija,
ikimugana uNguluvi kuno ikimukhalalila umuhuvililaaji umuyine,
uyo iiva mudehi.
Timeenye kiija mudehi,
kwa kiiva umuunu yuna asimugeene umuhuvililaaji muyine yuna ikimwaga kwa meeho,
asikwiliile kimugana uNguluvi yuna asikimwaga.
21 UNguluvi atupeelile indaji kiija,
yoyoona yuna ikimugana uNguluvi,
isakulwa kimugana nayu muhuvililaaji muyine.a