3
1 Loleeli uWiheesu uNguluvi shina atuganile mandu,
hata titambulwe vanaakwe!
Shiyooli shina tishwali.
Leelo avaanu vina vasikimuyinatila uNguluvi vasimeenye kiija,
ose tili vaana va Nguluvi,
kwa kiiva vasimumeenye umwene.
2 Vagani vangu,
lino ose tili vaana va Nguluvi,
leelo yisinamanyishe wunofu shina tikhava.
Leelo,
timeenye kiija uluhaavi luna uKilisito akhatina,
tikhahwanana nawo,
kwa kiiva tikhamwaga shina ashwali.
3 Umuunu yoyoona yuna ikiyihuviilila ndeeno,
kiija akhahwanana nu Kilisito,
ayivalasaaje baheene ave mugolofu,
ngaja uKilisito shina ashwali.
4 Umuunu yoyoona yuna iigaha uwunansi,
inanganga indaji sa Nguluvi,
kwa kiiva kigaha uwunansi,
kukwene kinanga indaji.
5 Mumeenye kiija uYeesu wáyinsile mu nyi kiwuwuusa uwunansi weesu,
khanji umwene asiigaha uwunansi wowoona.
6 Lino,
yoyoona yuna apihanga nu Kilisito,
asikiyitenekha kigaha uwunansi.
Woope yuna apikiyitenekha kigaha uwunansi,
asiimanya kiija uKilisito yu naani,
khanji asimumeenye.
7 Lino vanangu,
musikhayitikhaji kiija umuunu yoyoona avayase.
Umuunu umunya wugolofu pa Nguluvi,
ngaja shina uKilisito munya shiyooli,
uyo yumwene iigaha aga shiyooli.
8 Leelo umuunu yuna apiigaha uwunansi,
uyo mwana wa Shetaani,
kwa kiiva uShetaani apiigaha uwunansi kihuma pashiyanso.
Lulwene uLusawo lwa Nguluvi wáyinsile mu nyi,
kisinanga insengo sa Shetaani.
9 Umuunu yoyoona yuna mwana wa Nguluvi,
asikiyitenekha kigaha uwunansi,
kwa kiiva asaviilwe nu Nguluvi mu numbula yaakwe.
Asikwiliile kiiva apiigaha uwunansi,
kiiva wáava mwana wa Nguluvi.
10 Leelo umuunu yuna asiigaha amanofu,
awu yuna asimugeene umuhuvililaaji muyine,
uyo asili mwana wa Nguluvi.
Ndeeno,
tivameenye avaana va Nguluvi na vaana va Shetaani shina vali paayo.
Kiganana
11 Imola yina mwapulikhaga kihuma pashiyanso yiyeene iyi,
tisakulwa tigananaje.
12 Tisikhaveesaga ngaja umuunu yuna vikimutambulaga Kayini,
uyu wálongosewaagwa nu Munansi yula uShetaani,
wámubuda umunangʼana waakwe.
a Kwashi wámubudaga?
Wámubudaga kwa kiiva,
insengo saakwe uKayini sikhandi mbi,
leelo isa munangʼana waakwe,
sikhandi sa shiyooli.
13 Lino vahuvililaaji vayangu,
musikhaswigaji avaanu vina vasikimuyinatila uNguluvi pina vikivakhalalila.
14 Ose timeenye kiija tihumile mu ngufu sa mfwa,
na kiyinjila mu wuumi wa shiluta.
Timeenye ndeeno,
kwa kiiva tivageene avayeesu.
Umuunu yuna angaya lugano isigala mu ngufu sa mfwa.b
15 Yoyoona yuna ikimukhalalila umuhuvililaaji umuyine,
uyo mubudaaji.
Mumeenye kiija kusiina umubudaaji umunya wuumi wa shiluta mu numbula yaakwe.
16 Ose tilumeenye ulugano,
kwa kiiva uKilisito wáhumyaga uwuumi waakwe kunyeesu.
Na yuuse shiisho ndeeno,
tisakulwa kiwuhumya uwuumi weesu kwa kiiva ya vahuvililaaji vayeesu.
17 Umuunu yoyoona yuna ana wusi,
ikimwaga umuhuvililaaji muyine agayile,
leelo asikimusungupila,
wuli,
shiyooli ana lugano lwa Nguluvi?
18 Vanangu,
tisikhalogolaga kwa mulomo hela kiija tivageene avayeesu,
leelo tivaganaje shiyooli kwa nsila ya kivatanjilisa.
19 Nda tikivagana avayeesu ndeeno,
tiijinia kiija tifwata ishiyooli,
khanji inumbula seesu sisingamala pa Nguluvi.
20 Hata nda tiihigwa mu numbula seesu,
tina wulindamafu,
kwa kiiva timeenye kiija uNguluvi yu mukhome kishila inumbula seesu,
khanji umwene agameenye goona.
21 Vagani vangu,
nda tisiihigwa mu numbula seesu,
baheene tikwiliile kiiva nu wukhangafu wa kivejeela pa Nguluvi.
22 Khanji tiyanushila kihuma kunyaakwe lyolyona lina tikimulomba,
kwa kiiva tikisiyinatila indaji saakwe na kigaha gina idobokha.
23 Indaji ya Nguluvi yiyeene iyi,
tilihuviilile ilitaawa lya Lusawo lwakwe uYeesu Kilisito,
na kiganana ngaja shina wálajisaaga.
24 Umuunu yoyoona yuna ikisiyinatila indaji isa Nguluvi,
iiva ahanjile nu Nguluvi,
woope uNguluvi iiva ahanjile nu mwene.
Timeenye kiija Nguluvi ahanjile noose,
kiiva atupeelile uNumbula uMunofu.