UKilisito yumwene ikitufuunyila
2
1 Vanangu,
nikivayandishila imola isi,
kiija musikhagahaji uwunansi.
Leelo umuunu hata nda agahe uwunansi,
tinawo yuna iyiima pa Wiheesu uNguluvi na kimulomba kiija atusaajile,
uyo yu Yeesu Kilisito,
umunya shiyooli.
2 UYeesu yumwene shadanda,
kwa nsila iyo,
wáwusaaga uwunansi weesu na kitulingaania nu Nguluvi.
Khanji asikhawusiise uwunansi weesu hela,
leelo nu wunansi wa vaanu woona.
3 Nda tikisiyinatila indaji sa Nguluvi,
baheene tiimanya kiija,
timumeenye uNguluvi.
4 Umuunu yuna iijova amumeenye uNguluvi,
leelo asikisiyinatila indaji saakwe,
uyo mudehi,
angaya shiyooli.
5 Leelo umuunu yoyoona yuna ikiliyinatila iliswi lyakwe,
uyo iiva shiyooli amugeene uNguluvi.
Ishimanyilo isha kimanya kiija tihanjile nu Nguluvi,
shisheene ishi,
6 umuunu yuna iija ahanjile nu Nguluvi,
isakulwa kikhala ngaja shina akhandi iikhala uYeesu.
Indaji ya Yeesu iya kiganana
7 Vagani vangu,
indaji iyi yina nikivayandishila yisili mya,
leelo yi ndaji yiyila iya pawukuulu yina mukhandi nayo kihuma pina mwayansaaga kihuviilila.
a Indaji iyo ya pawukuulu,
li liswi lila lina mwapulikhaga ilya kiganana.
8 Khanji,
indaji iyi yina nikivayandishila,
mya.
Ishiyooli shaakwe shiwonekha mu wiikhasi wa Yeesu Kilisito,
na mu wiikhasi weenyu,
kwa kiiva inshiisi yiwuukha,
uwuvalafu wa shiyooli wungʼaala.
9 Umuunu yuna ilogola kiija iikhala mu wuvalafu,
kuno ikimukhalalila umuhuvililaaji umuyine,
uyo iiva ashaanali ali mu nshiisi.
10 Umuunu yuna ikimugana umuhuvililaaji muyine,
ali mu wuvalafu.
Kusiina shoshoona mukhati yaakwe isha kimuhonsa kigaha uwunansi.
11 Leelo umuunu yuna ikimukhalalila umuhuvililaaji umuyine,
uyo ali mu nshiisi.
Ijenda mu nshiisi,
asiimanya kuna iiluta,
kwa kiiva inshiisi yimudindile ameeho.
12 Nikivayandishila omwe vaana vina nivageene,
kwa kiiva uwunansi weenyu wusajiilwe nu Yeesu Kilisito.
13 Nikivayandishila omwe vawiheesu,
kwa kiiva mumumeenye uYeesu Kilisito,
yuna akhandi akwali kihuma pashiyanso.
Nikivayandishila omwe vajeleelo,
kwa kiiva mumumenile uMunansi yula uShetaani.b
14 Nikivayandishila omwe vaana,
kwa kiiva mumumeenye uWiheesu uNguluvi.
Nikivayandishila omwe vawiheesu,
kwa kiiva mumumeenye uYeesu Kilisito,
yuna akhandi akwali kihuma pashiyanso.
Nikivayandishila omwe vajeleelo,
kwa kiiva muna ngufu,
mukiliyinatila iLiswi lya Nguluvi,
khanji mumumenile uMunansi yula uShetaani.
15 Lino,
musikhawudobokhaji uwuvi wa nyi iyi,
awu kivafwata avaanu vavi vina vali umo.
Umuunu nda ikiwudobokha uwuvi uwa mu nyi,
uyo iiva asimugeene uWiheesu uNguluvi.
16 Uwuvi uwa mu nyi wuweene uwu,
uwupafu uwuvi uwa muvili,
ishooyo isha kiiva ni shoshoona shina washaaga,
na kiyitumfya kwa kiiva ya wusi.
Fyona ifyo,
fisiihuma kwa Wiheesu uNguluvi,
leelo fiihuma mumuno mu nyi.
17 Inyi nu wupafu waakwe uwuvi,
fiishila.
Leelo umuunu yuna iigaha gina isakula uNguluvi,
uyo iiva nu wuumi wa shiluta.
Kiyivavala na valugu va Kilisito
18 Vanangu,
insiku sa wudugo sifishile!
Mupuliishe kiija,
umulugu wa Kilisitoc iyinsa,
hata lino avalugu vinshi ava Kilisito shi vayinsile.
Shiisho ndeeno timeenye kiija,
lino ndeeni tili mu nsiku sa wudugo.
19 Avaanu awo vahumile kunyeesu,
leelo vasikhandi shipuga shimo noose.
Kiiva vaali vaveesaje shipuga shimo noose,
ndi vasigala kunyeesu.
Leelo vawuukhaga,
baheene lwamanyikha bahawuvalafu kiija,
vasikhandi shipuga shimo noose.
20 Leelo omwe,
uNguluvi avapeelile uNumbula uMunofu,
d lino woona mushimeenye ishiyooli.
21 Nikivayandishila ibalula iyi,
yisili kiija musishimeenye ishiyooli isho,
leelo kwa kiiva mushimeenye.
Khanji mumeenye kiija,
uwudehi wowoona wusiihuma mu shiyooli.
22 Umuunu umudehi yu naani?
Umuunu umudehi muunu yoyoona yuna ikhaana kiija,
uYeesu yu Mukulusaaji yuna uNguluvi wátahisaaga kimufilikha.
e Umuunu ngaja uyo,
yumwene mulugu wa Kilisito,
ikimukhaana uDaada uNguluvi nu Lusawo lwakwe.
23 Yoyoona yuna ikimukhaana uLusawo,
ikimukhaana nayu Wiheesu uNguluvi.
Leelo,
yoyoona yuna ikimuyiitikha uLusawo lwa Nguluvi pa vaanu,
khanji iiva ahanjile nu Wiheesu.
24 Lino,
amaswi gala gina mwapulikhaga kihuma pashiyanso,
muyinatilaje.
Nda mupiyinatila amaswi ago mu numbula seenyu,
baheene na yuumwe musiive muhanjile nu Lusawo nu Wiheesu uNguluvi.
25 Ili lilyene lina uLusawo wátahisaaga kunyeesu,
kiija tinawo uwuumi wa shiluta.
26 Nikivayandishila amaswi aga,
kivapavila omwe kwa kiiva ya vaanu vala vina visakula kivayasa.
27 Leelo omwe,
uNguluvi avapeelile uNumbula uMunofu,
yuna iikhala mukhati yeenyu.
Uyo yumwene ikivamanyisa amamanyiso gaakwe goona aga shiyooli,
gasili ga wudehi.
Lino,
yisisakulwa kiija umuunu avamanyise.
f Ngaja shina uNumbula uMunofu avamanyiise,
lino muyitenekhaje kilungana nu Kilisito.
Kikhala ngaja vaana va Nguluvi
28 Lino vanangu,
muveesaje mupihanga nu Kilisito,
baheene pina akhatina khanji,
tikhave nu wukhangafu,
tisikhayifihaga kwa nsoni.
29 Mumeenye kiija uKilisito yu munya shiyooli,
mumanyaje kiija umuunu yuna isenga aga shiyooli,
uyo iiva wáasawa nu Nguluvi.