Kiwumena uwunansi wa mu nyi
5
1 Umuunu yoyoona yuna ihuviilila kiija,
uYeesu yu Mukulusaaji yuna uNguluvi wátahisaaga kimufilikha,
a umuunu uyo iiva asaviilwe nu Nguluvi.
Umuunu yoyoona yuna ikimudobokha umusafi,
ikimudobokha nayu mwana wa musafi uyo.
2 Ndeeno timeenye kiija,
tivageene avaana va Nguluvi,
kwa nsila ya kimugana uNguluvi,
na kiyinatila indaji saakwe.
3 Kimugana uNguluvi kukwene kiyinatila indaji saakwe,
khanji indaji saakwe sisili nkhamu.
4 Umuunu yoyoona yuna asaviilwe nu Nguluvi,
ikigamena aga mu nyi.
Ndeeno tikigamena aga mu nyi,
kwa lihuuvi lyesu.
5 Wuli,
yu naani yuna akwiliile kigamena aga mu nyi?
Yu muunu yuna ihuviilila kiija,
uYeesu Lusawo lwa Nguluvi.
Ishiyooli isha Yeesu Kilisito
6 ULusawo ulu yumwene uYeesu Kilisito yuna wáwonekhaga panu pa nyi,
kihuma uluhaavi luna wátwinisiwaagwa mu malenga,
mbakha uluhaavi luna idanda yaakwe yakunukhaga.
7 Woope uNumbula uMunofu ibedela kiija,
ago ga shiyooli,
kwa kiiva uNumbula uMunofu yu shiyooli.
8 Kuna vatatu vina vibedela imola isa Yeesu [kushaanya,
uDaada,
uLiswi nu Numbula uMunofu,
vatatu ava shiinu shimo.
9 Khanji kuna gatatu gina gibedela mu nyi],
b uNumbula uMunofu,
amalenga ni danda,
gatatu ago gikitubedela lumo kiija,
uYeesu Lusawo lwa Nguluvi.
Nda tihuviilila ulubedelo lwa vaanu,
tisakulwa kiluhuviilila ulubedelo lwa Nguluvi luna lukhome mandu.
Ulubedelo ulo,
lulwene luna uNguluvi ikuviilisa ulwa Lusawo lwakwe.
10 Umuunu yuna ikimuhuviilila uLusawo lwa Nguluvi,
ahuviliile kiija,
ulubedelo ulo lwa shiyooli.
Leelo yuna asikimuhuviilila uNguluvi,
ikimugaha uNguluvi kiiva mudehi,
kwa kiiva asihuviliile ulubedelo luna Nguluvi wámuhumyaga uLusawo lwakwe.
11 Ulubedelo ulo lulwene ulu,
uNguluvi atupeelile uwuumi wa shiluta,
uwuumi uwo tiipata kwa Lusawo lwakwe.
12 Umuunu yuna ahanjile nu Lusawo lwa Nguluvi,
ana wuumi uwo.
Leelo yuna asihanjile nu Lusawo lwa Nguluvi,
asiina uwuumi uwo.
Amaswi aga wudugo
13 Nikivayandishila amaswi aga,
omwe vina mukimuhuviilila uLusawo lwa Nguluvi,
baheene mumanye kiija,
muna wuumi wa shiluta.
14 Ose tina wukhangafu wukhome pa Nguluvi,
kwa kiiva timeenye kiija ikitupulikha nda tikimulomba lyolyona mu lugano lwakwe.
15 Timeenye kiija,
ikitupulikha pina tikimulomba lyolyona,
lulwene timeenye kiija ikitupeela gina tikimulomba.
16 Kuna wunansi wuna wusikimuviikha umuunu kutali nu Nguluvi shiluta.
Umuunu nda ikimwaga umuhuvililaaji muyine iigaha uwunansi ngaja uwo,
amufuunyile kwa Nguluvi,
woope uNguluvi akhamupeela uwuumi.
Yiiva ndeeno kwa vala vina viigaha uwunansi uwo.
Leelo kuna wunansi wuna wukimuviikha umuunu kutali nu Nguluvi shiluta.
One nisiijova umufunyilaje kwa Nguluvi kwa wunansi uwo.
17 Kisenga lyolyona lina lisifwaya pa Nguluvi,
kukwene kigaha uwunansi.
Leelo lumo na ago,
wukwali uwunansi wuna wusikimubaagula umuunu nu Nguluvi shiluta.
18 Timeenye kiija umuunu yoyoona yuna wáasawa nu Nguluvi,
asikiyitenekha kigaha uwunansi,
kwa kiiva uLusawo lwa Nguluvi ikimudiima.
Ndeeno uMunansi yula uShetaani,
asikwiliile kimugaha lyolyona.
19 Timeenye kiija,
ose tili vaana va Nguluvi,
na kiija avaanu avanji woona vina vasikimuhuviilila uNguluvi,
viitemwa nu Munansi yula uShetaani.
20 Khanji timeenye kiija,
uLusawo lwa Nguluvi wáyinsile mu nyi,
wátupeela uwumanyi,
baheene timumanye uNguluvi wa shiyooli.
Tihanjile nu Nguluvi wa shiyooli,
kwa nsila ya kihanga nu Lusawo lwakwe uYeesu Kilisito.
Uyu yu Nguluvi wa shiyooli,
khanji yumwene yuna ikitupeela uwuumi wa shiluta.
21 Vanangu,
muveesaje meeho,
musikhagafuunyaji amanguluvi.