Avamanyisaaji va wudehi
2
1 Uluhaavi pina avakuwamalago vakuwaagwa mu Vaisilaheli,
avakuwamalago vamonga vakhandi vakuwamalago avadehi.
Shiisho ndeeno na yuumwe,
avamanyisaaji va wudehi,
vakhawonekha kunyeenyu.
Avaanu awo vakhayinjisa amamanyiso aga kiyasa na kimukhaana uYeesu uMulongosaaji uMukhome,
yuna wávakulusaaga.
Kwa nsila iyo vakhahonsa kibudwa nyangu vaveene.
2 Khanji avaanu vinshi vakhasifwata insila saanave isa waafu.
Kwa kiiva ya veene,
avanji vakhayisala insila ya shiyooli.
3 Kwa wupafu waanave uwa kipata ulutono,
vakhava vikivasimila insimo isa wudehi,
baheene vatoole ifiinu fyenyu.
Leelo kihuma pawukuulu,
uNguluvi ayipinyile kivahiga,
ali meeho,
khanji akhavabuda!
4 Avamalayikhaa vina vagahaga uwunansi,
uNguluvi asikhavasungupiile,
leelo wávataagaga ku nshiisi,
kuna vapinyiilwe na manyololo.
Ku nshiisi ukho,
vahepeleese ilisiku lya wuhigo.
5 Khanji uluhaavi lula ulwa Nuhu,
uNguluvi asikhavasungupiile avaanu vina vasikhamuyinatiile,
leelo wáleetaga ulufuwukho lwa malenga minshi pashaanya pa nyi yila,
avaanu vaafwa.
Leelo wámukulusaaga uNuhu lumo na vaanu avanji fungati.
UNuhu yumwene wávakhomaga avaanu kiija,
vagahaje gina idobokha uNguluvi.
6 Khanji uNguluvi wávapeela ululawo avaanu va lijumbi lila ilya Gomola ni Sodoma,
b wávabuda nu mooto.
Wávagaha vave shihwano sha gala gina gakhavapata avaanu vina vasikimugota uNguluvi.
7 Wámukulusa uLooti,
umuunu umugolofu,
yuna wásugumiilwe mandu,
kiiva ya njendo imbi isa waafu,
isa vanansi vala.
8 ULooti wákheele bahala lumo na vaanu vala kwa nsiku nyinshi,
inumbula yaakwe yayolopwagwa mandu,
wáganaga kipulikha na kisaaga injendo saanave imbi.
9 Kwa ilyo,
uMutwa uNguluvi ameenye shina ndi wávakulusa mu majelo avaanu vina vikimugota umwene.
Khanji ameenye shina asivapeele ululawo avanya wunansi mbakha ilijuva lila ilya wuhiji,
10 mandu vala vina viyinatila uwupafu uwuvi uwa muvili na kiwusala uwutawulilwa uwa Nguluvi.
Avamanyisaaji va wudehi awo,
vana ludali na kiyitumfya,
vasitiila kifiliga ifiwumbwa ifya wutupikho ifya Nguluvi.
11 Leelo avamalayikha avanya ngufu nu wutawulilwa mandu,
kifishila ifiwumbwa fya wutupikho ifyo,
vasikifisitaakha na kifiliga ifiwumbwa ifyo pa Mutwa uNguluvi.
12 Avamanyisaaji awo viisala shoshoona shina vasishimeenye.
Vahwaneene ni nkhanu singaya luhala,
sina siisawa hela,
kiija sikhatwa na kishinjwa!
Shiisho ndeeno,
uNguluvi akhavabuda avamanyisaaji va wudehi awo.
13 Khanji vakhahombwa amalava kwa malava,
gina vavapinsisiise avaanu avanji.
Vishendeeva kigaha uwupafu waanave uwuvi bahawuvalafu.
Vishendeeva kivajanga pina viilya lumo noomwe.
Kwa nsila iyo,
vikivahonsa muve ni nsoni ngaja amavala mu menda amavalafu.
14 Ameeho gaanave,
gamemile uwushemi nu wupafu waanave wa kigaha uwunansi wugaya wudugo.
Vikivajanga avaanu avawoto mu lihuuvi.
Inumbula saanave simanyeene kiiva nu wupafu uwa fiinu.
Vayijiilwe nu Nguluvi!
15 Vayileshile insila ingolofu,
vayajile na kiyifwata insila yina wáyifwataga uBalaamu,
umushina Beholi.
Umwene wádobweshe kiposheela uwusi kwa nsila ya kigaha uwunansi.
16 Leelo wákhajilwagwa kwa kiiva ya wunansi waakwe.
Idogovi yina yisilogola,
yalogwele kwa shawuti ya muunu,
yasivila uwuyasu wa mukuwamalago uyo.c
17 Avamanyisaaji va wudehi awo,
vali ngaja masima gina gayuumile,
ngaja likungugu lina livevelulwa ni lipepo.
UNguluvi avavishiile uluvala ulwa ku nshiisi inkhome mandu.
18 Vilogola injowo isa kiyitumfya na sina sisitanga.
Visenjela nsengo sa wupafu waanave uwuvi uwa muvili,
kivatega avaanu vina vahuvililaga igologolo baaha,
vina valeshile kigagaha gina avanansi viigaha.
19 Vikivataahisa avaanu awo kiija vakhava vavishiilwe vayiyesheele,
humbe vaveene vavanda va wunansi.
Yili ndeeno kwa kiiva umuunu muvanda wa shoshoona shila shina shimutemile.
20 Avaanu vina vayiwusiise mu wunansi uwa mu nyi kwa nsila ya kimumanya uMutwa nu Mukulusaaji weesu uYeesu Kilisito.
Leelo nda vayiitishe kikhatwa na kitemwa khanji nu wunansi uwo,
apo ihaali ya vaanu awo yikhava mbi mandu,
kishila ulwamwandi.
21 Yaali yive shiba kuveene vaali vave vasimeenye khabisa insila iyo iya kifwaya pa Nguluvi,
kulikho vayimanye khanji vayileshile indaji inofu yina vaposheelile.
22 Kuna mfitikho yimonga yiijova ndeeni,
“Imbwa yiilya amadeesi gaakwe,”
iyinji yiijova,
“Ingubi yina yiyosiiwe,
yigalaganda khanji mu matope!”
Shilushwali kuveene uluhaavi ulu.