Ilijuva ilya kitina uMutwa uYeesu
3
1 Vagani vangu,
ibalula iyi ya wuvili nikivayandishila.
Mu balula soona sivili isi sina natalaga kivayandishila,
nikhandi nikivakhangasa kwa kivakumbusa amaswi gina mugameenye,
kiija muhiive wunofu.
2 Nisakula mukumbushe amaswi gina gajowaagwa na vakuwamalago va Nguluvi ava pawukuulu,
ni ndaji ya Mutwa uNguluvi nu Mukulusaaji yuna avanandeje vaakwe vavaletelaga.
3 Tangusiina musakulwa mumanye kiija,
insiku isa wudugo vakhayinsa avaanu avanya masalo,
vina vakhafwata uwupafu waanave uwuvi.
Vakhavajova omwe
4 kiija,
“UKilisito wátahisaaga kiija akhayinsa!
Wuli,
lino ali kwi?
Injowo siisi kihuma vafwe avambuyeesu,
injowo sili shishila shina sikhandi kihuma pashiyanso sha nyi!”
5 Avaanu awo,
vikiyigaha ngaja vasamiilwe kiija ulwamwandi uNguluvi wálogwele liswi hela,
uwulanga ni nyi fyawumbwa.
Wáwumbile inyi kihuma mu malenga na kwa malenga ago wáwumbile inyi.
6 Kwa lufuwukho ulukhome lwa malenga ago,
inyi iya luhaavi lula yanangwagwa.
7 Khanji kwa liswi liilyo,
uNguluvi awuviishile uwulanga ni nyi ya luhaavi ulu,
five fya kinyaanywa mu mooto.
Afiviishile kwa kiiva ya lijuva lina akhavahiga avaanu vina vasikimugota umwene,
khanji akhavabuda.
8 Leelo vagani vangu,
musikhasamwaji ishiinu shimo!
Pa Mutwa uNguluvi,
ilijuva limo ngaja maakha magana ishumi (1,000) khanji maakha magana ishumi (1,000),
ngaja lijuva limo.a
9 Avaanu vamonga vihiiva kiija uMutwa uNguluvi idiila kikwisa gala gina wátahisaaga,
leelo asidiila.
Umwene ikivagugumila omwe,
kiiva asigeene hata umunyaayumo weenyu ayaje,
leelo isakula woona valambiisile uwunansi waanave.
10 Ilisiku lya Mutwa ilya wuhigo likhava lya kitinuhisa ngaja umuhiiji shina iyinsa.
Ilisiku ilyo,
uwulanga wukhawuukha kwa lugulumo lukhome,
ifiinu fina fikwali ukho,
fikhanyaanywa kwa mooto,
yoope inyi yikhabojolwa lumo ni fiinu fyona fina fili umo.
11 Ifiinu fyona fikhanangwa ndeeno,
kwa kiiva ya ilyo,
lino omwe musakulwa kiiva vaanu va wuli?
Musakulwa kikhala mu wugolofu na kimugota uNguluvi.
12 Heepaji ilijuva lila ilya Nguluvi na kidobokha lifishe nyangu.
Ilijuva ilyo uNguluvi akhanyaanya uwulanga nu mooto na kifinanga ifiinu fina fikwali umo,
fikhayengeetukha kwa lifushe.
13 Leelo ose tiheepile uwulanga uwupya ni nyi imya,
ngaja shina wátahisaaga.
Uluvala ulo lukhava lumemile uwugolofu.
14 Ndeeno vagani vangu,
pina muheepile ilijuva lila,
mujimbaje kiiva vagolofu pa Nguluvi musipiikhwa,
na kiiva nu wulindamafu.
15 Mukumbukhaje kiija uMutwa ikivagugumila,
kwa kiiva isakula mukulushe.
Ndeeno shilushwali,
ulukholo lwesu umugani uPawulo wávayandishilaga kwa luhala,
ngaja shina uNguluvi wámupeelaga.
16 Amaswi ago gageene gina ilogola mu balula saakwe soona.
Gakwali gamonga gina makhamu kigamanya mu balula iso.
Amaswi ago,
avayasu vina vagaya shiyooli mu lihuuvi vikigapungania,
ngaja shina vipungania aMayandikhwa aManofu aganji.
Kigaha ndeeno,
vikiyiletelesesa vaveene imfwa.
Amaswi aga wudugo
17 Lino vagani vangu,
mugameenye aga vamanyisaaji awo ava wudehi.
Lino,
muyivavalaje,
musikhajangwaji kwa wusugu wa vanansi awo,
musilaave mugwe na kilekha kiyiima mu shiyooli.
18 Leelo muyitenekhaje kikula mu mota na mu wumanyi wa Mutwa nu Mukulusaaji weesu uYeesu Kilisito.
Uwutupikho wuve kwa mwene,
uluhaavi ulu nu lwa shiluta!
Amina.