Ibalula ya wuvili iya
Petulo
UPetulo ikivahunjila avahuvililaaji
1
1 Ibalula iyi yihumile kunyangu one Simoni Petulo,
yuna nili mwanandejea na muvanda wa Yeesu Kilisito.
b Nikivayandishila omwe muna muposheelile ilihuuvi lilila ilikhome lina na yuuse taposheelaga.
Muposheelile ilihuuvi ilyo kwa kiiva uNguluvi weesu uMukulusaaji uYeesu Kilisito,
iigaha gina gisakulwa.
2 UNguluvi avayonjelese imota nu wulindamafu kwa kimumanya umwene nu Yeesu uMutwa weesu.c
Kishemeelwa na kibaagulwa nu Nguluvi
3 Kwa ngufu saakwe kihuma kwa Nguluvi,
uKilisito atupeelile goona gina tigayile,
baheene tive ni njendo isa kimugota uNguluvi.
Umwene atupeelile ago kwa kimumanya uNguluvi yuna atushemeelile kwa wutupikho ni ngufu saakwe yumwene.
4 Kwa nsila iyo,
uNguluvi wátutahisaaga kitupeela ifiinu fikhome na finofu mandu.
Ifiinu ifyo,
fitanga kilekha uwupafu uwuvi na kihanga nu Nguluvi.
5 Ndeeno kwa kiiva ya ago,
muveesaje mwisenga kwa kijimba,
baheene ilihuuvi lyenyu live nu wunofu,
uwunofu weenyu wuve nu wumanyi wa kihuma kwa Nguluvi.
6 Khanji mu wumanyi weenyu muve vaanu vina vikiyisivila mu wunansi,
pina mukiyisivila mu wunansi muyonjelese ulugugumilo,
pa lugugumilo muyonjelese kimugota uNguluvi.
7 Ulugoto lwenyu luve na kivagana avahuvililaaji vayeenyu na kiganana kuno kuve nu lugano kwa vaanu woona.
8 Nda mwiva ni njendo iso soona kwa winshi,
baheene sisivatanje kimusenjela uMutwa weesu uYeesu Kilisito na kisenga amanofu,
baheene mumumanye umwene.
9 Leelo umuunu yuna asiina injendo iso,
iiva ngaja mupofu.
Asikwiliile kiloleela,
asamiilwe kiija uNguluvi amuvaleese uwunansi waakwe uwa paanyuma.
10 Ndeeno vahuvililaaji vayangu,
muyihumyaje mandu kijinia,
kiija uNguluvi wávashemeelaga na kivabaagula.
Nda mwikhala ndeeni,
musikhakuvala kaa.
11 Khanji musiyanushilwe finofu ku Wutwa wa shiluta wa Mutwa nu Mukulusaaji weesu uYeesu Kilisito.
12 Lino,
nisiyiteneshe kivakumbusa ago goona shiluta,
hata nda mumeenye na kiyijinia mu shiyooli shina mwayimanyisaaga.
13 Niiwona lunofu kunyangu kivakumbusa ulwa mola iso,
uluhaavi loona luna nikheele mu nyi muno.
14 Nilogola ndeeno kwa kiiva nimeenye kiija,
nivejeelile kiifwa.
Ndeeno shilushwali uMutwa weesu uYeesu Kilisito wánigubutulilaga.
15 Baheene,
nikhayihumya kiija,
uluhaavi pina nikhafwa mukhagakumbukha aga goona uluhaavi loona.
Avalunjikhaaji va wutupikho wa Kilisito
16 Uluhaavi luna tikhandi timanyisa ulwa ngufu saakwe na kiyinsa kwakwe uMutwa weesu uYeesu Kilisito,
tisikhahuviliile insimo isa wudehi,
sina siyandiikhwe kwa wusugu.
Leelo ose tawaagaga uwutupikho waakwe kwa meeho geesu yuuse.
17-18 Ose tikhandi lumo nu Yeesu pashaanya pa shidunda ishinofu shila,
uluhaavi luna wáposheelaga ulugoto nu wutupikho kihuma kwa Nguluvi uDaada.
Uluhaavi ulo,
ose tapulikhaga ishawuti kihuma kushaanya kwa Nguluvi uMunya Wutupikho uWukhome iijova,
“Uyu yumwene Lusawo lwangu.
d Nimuganile,
woope ikinishendeefya.”e
19 Khanji amaswi aga vakuwamalago gikitupeela ulujinio,
omwe mwigaha finofu nda mukigayinatila.
Amaswi ago gali ngaja lungʼali luna lungʼalikha pina pana nshiisi,
mbakha pina hambi kwisha.
Apo uKilisito ikivangʼalikha mu numbula seenyu ngaja inondwe iya lwamilaawu.
20 Leelo ilikhome kwa ago,
mukumbukhaje kiija,
kusiina uwukuwamalago wa Mayandikhwa aManofu wuna avakuwamalago vaganulaga kihuma mu mahiiva gaanave vaveene,
21 kwa kiiva kusiina iliswi lya wukuvamalago wa Nguluvi,
lina liihuma mu mahiiva ga muunu.
Leelo avaanu vina vakuwaagwa amalago,
valongosewaagwa nu Numbula uMunofuf kilogola imola kihuma kwa Nguluvi.