Uwiikhasi wuna uNguluvi ikiwudobokha
4
1 Lino vahuvililaaji vayeesu,
tavamanyisaaga shina musakulwa kiiva mu njendo,
baheene mumushendeefye uNguluvi.
Shiyooli kiija mwigaha ndeeno.
Lino,
tikivalomba mandu kwa wutawulilwa wa Mutwa uYeesu kiija,
yitenekhaji kigaha shiisho na kishila.
2 Mugameenye wunofu gina tavalajisaaga kwa wutawulilwa wa Mutwa uYeesu.
3 UNguluvi isakula uwiikhasi weenyu wuvalasiwe.
Ndeeno musikhawafukhaji.
4 Khanji muyivavalaje amavili geenyu kwa wugolofu na kwa shitiilo.
5 Musikhaveesaji vaanu vina vilongosewa nu wupafu wa wushemi,
ngaja shina viigaha vina vasikimuhuviilila uNguluvi.
6 Mu ilyo,
umuunu yoyoona asikhamunanjilaga umuhuvililaaji muyine wala kimujanga,
ngaja shina tavajovelaga na kivapavila kiija,
woona vina viigaha ago uMutwa uYeesu akhavalafya.
7 UNguluvi asikhatushemeelile kigaha uwushemi,
leelo akhatushemeelile kiija uwiikhasi weesu wuvalasiwe.
8 Ndeeno umuunu yoyoona yuna ikhaana amamanyiso aga,
asikimukhaana umuunu,
leelo iiva ikimukhaana uNguluvi,
yuna ikivapeela uNumbula waakwe uMunofu.
9 Lino,
yisisakulwa kiija tivayandishile omwe ulwa mola iya kiganana,
kiiva mumanyisiiwe nu Nguluvi shina musakulwa kiganana.
10 Shiyooli isho shisheene shina mwigaha,
mukivagana vahuvililaaji vayeenyu woona mu nyi yoona iya Makedoniya.
Lino vahuvililaaji vayangu,
tikivalomba mugananaje shiisho na kishila.
11 Jimbaji kikhala kwa wulindamafu,
muyangalilaje na kisenga insengo seenyu yuumwe.
Aga gageene gina tavalajisaaga kiija mugasengaje.
12 Apo baheene musiive mwiwonensa injendo seenyu inofu,
kwa vaanu vina vasili vahuvililaaji va Yeesu Kilisito,
khanji musiiva vanya kihuviilila ifiinu fya vaanu avanji.
Avahuvililaaji vina vafwile vakhafyukha
13 Omwe vahuvililaaji vayangu,
tisakula mumanye gina gakhawonekha kwa vahuvililaaji va Yeesu vina vafwile,
baheene musikhasugumilwaji ngaja avaanu vina vasihuviilila ulufyukho.
14 Ose tihuviilila kiija,
uYeesu wáfwisaga,
khanji wáfyukhaga.
Ndeeno tihuviilila kiija,
uNguluvi akhavafyusa na kivaleeta kunyaakwe lumo nu Yeesu,
avaanu woona vina vafwile vapikimuhuviilila.
15 Kilingana ni liswi lya mwene uMutwa,
tikivajovela kiija ose vina tikhava wuumi uluhaavi luna akhatina uMutwa uYeesu,
tisikhavatalila kitangaana nu Yeesu,
avaanu vina vatutalilaga kiifwa.
16 UMutwa uYeesu yumwene,
akhayiikha kihuma kwa Nguluvi na kilajisa kwa liswi likhome.
Likhayinsa kipuliisikha iliswi lya malayikhaa umukhome ni shawuti iya balagumu iya Nguluvi.
Baheene vala vina vafwile vapikimuhuviilila uKilisito,
vakhatala kifyusiwa.
17 Baheene ose vina tikhava tisigeele wuumi,
lumo na vina vakhava vafyusiiwe,
tikhakwapulwa kiluta ku mafunde ku wulanga,
kitangaana nu Mutwa uYeesu.
Baheene tikhava tiikhala lumo nu Mutwa uYeesu shiluta.
18 Lino mukhangasaniaje inumbula kwa mamanyiso ago.