UPawulo ikimufilikha uTimoteo ku Tesalonike
3
1 Kuwudugo tapotwagwa kiyijimfilisa mandu.
Baheene talamulaga kiija shiba tisigale yuuse duguli ku Atene,
2 na kimufilikha kunyeenyu umuhuvililaaji muyeesu uTimoteo kiija,
avajinie na kivakhangasa inumbula mu lihuuvi lyenyu.
Umwene muvanda muyeesu mwa Nguluvi,
mu nsengo ya kikhoma iMola iNofu ya Kilisito.
3 Tagahaga ndeeno,
kiija umuunu yoyoona asikhayolopwagwa kwa kiiva ya malava aga.
Omwe mumeenye kiija,
uNguluvi agulumiile ose noomwe kishilila mu malava.
4 Pina tikhandi noomwe,
tikhandi tikivajovela kiija,
ose noomwe tikhalava,
ngaja shina mumeenye shina lushwali.
5 Lulwene,
uluhaavi lula pina napotwagwa kiyijimfilisa,
namufilikhaga uTimoteo,
kiija nimanye imola iya lihuuvi lyenyu.
Nagahaga ndeeno,
kwa kiiva nikhandi nihiiva kiija,
pamonga uShetaani uMujelaaji,
avajelile na kivagwisa.
Baheene insengo yeesu yina tasengaga kunyeenyu,
yaali yiiva ya bule.
UTimoteo itaviilila imola inofu iya Vatesalonike
6 Leelo lino uTimoteo wáyinsa kihuma kunyeenyu,
wátujovela imola inofu iya lihuuvi nu lugano lwenyu.
Wátujovela kiija,
wiila muna luuju lwa wushendeefu,
khanji muna lihaahi lya kitangaana noose,
ngaja ose shina tina lihaahi lya kitangaana noomwe.
7 Lino omwe vahuvililaaji vayeesu,
kwa kiiva ya mola isa lihuuvi lyenyu,
tijinisiiwe inumbula mu malava geesu goona.
8 Pina tiiwona omwe mukhangalila mwa Mutwa uYeesu,
ose tiiwona tikiyiyeeshela mu wiikhasi weesu.
9 Timupeele shiinu shishi uNguluvi weesu kwa kihonjesa,
kiwonensa uwushendeefu weesu uwukhome kwa mwene,
kwa kiiva ya lihuuvi lyenyu?
10 Ishilo ni shiminsi tikimufuunya mandu uNguluvi,
kiija atutanjilise tiyinse khanji kunyeenyu,
baheene tivatanjilise gina mushepushiilwe mu lihuuvi lyenyu.
11 Lino tikimulomba uNguluvi,
uWiheesu yumwene,
nu Yeesu uMutwa weesu,
atudindulile insila tifishe kunyeenyu.
12 UMutwa avagahe muyonjelese kiganana mandu,
na kivagana avanji woona,
ngaja ose shina tivageene omwe.
13 Khanji avajinie inumbula seenyu,
baheene muveesaje vagolofu musipiikhwa pa Nguluvi uWiheesu,
pina akhasa kiyinsa uMutwa weesu uYeesu,
lumo na vabaagule vaakwe woona.