Insengo sa Pawulo ku Tesalonike
2
1 Omwe vahuvililaaji vayeesu,
omwe yuumwe mumeenye kiija kiyinsa kwesu kunyeenyu,
kukhandi nu lutono lukhome.
2 Khanji mumeenye kiija,
pina tisinaafishe kunyeenyu tikhalafisiiwe na kiligwa,
mu lijumbi lila ilya Filipi.
a Hata nda kukhandi kuna lukhaani kunyeenyu,
uNguluvi wátupeelaga uwujimfu uwa kikhoma iMola iNofu yaakwe.
3 Gina tikivakhoma gasiihuma mu wudehi wala mu mahiiva amavi,
awu kivalulungania.
4 Leelo tikhandi tiikhoma kwa kiiva uNguluvi wátwagaga kiija tifwaya,
lulwene atupeelile insengo iya kikhoma iMola iNofu.
Lino ulugulumilo lwesu,
lusili lwa kivashendeefya avaanu,
leelo kikhoma gina uNguluvi idobokha,
kwa kiiva yumwene yuna iimanya goona gina gali mukhati mu numbula sa vaanu.
5 Khanji mumeenye kiija,
tisikhalogwele kaa,
amaswi kiija mutugane awu kiyifiha mu lujowo lumonga,
kiija mumwene tipatile ulutono.
UNguluvi ameenye kiija gina nilogola ga shiyooli.
6 Khanji tisikhasakwile avaanu vatutupishe,
yive omwe,
awu avanji woona.
Taali tikwiliile kidaayi ifiinu fimonga kwa kiiva ose tili vanandejeb va Kilisito.
Lino tisikhagahile ndeeno.
7 Leelo tikhandi vahuugu kunyeenyu ngaja umaayi yuna isunga avanaakwe.
8 Shilushwali,
ose tavaganaga mandu.
Tashendeevaga,
yisili kivajovela hela iMola iNofu ya Nguluvi,
leelo khanji na kiyihumya kisenga goona gina gifwaya kivatanga.
Tagahaga ndeeno kwa kiiva muli vagani veesu va shiyooli.
9 Vahuvililaaji vayeesu,
muna luuju shina tikhajimbile na kilava.
Pina tikhavakhomile iMola iNofu ya Nguluvi,
tikhandi tisenga insengo ishilo ni shiminsi,
baheene tisikhaveesaga musigo kwa muunu yoyoona uwa kunyeenyu.
10 Omwe mumeenye gina nilogola nayu Nguluvi woope,
kiija pina tikhandi kunyeenyu omwe vahuvililaaji,
ulujendo lwesu lukhandi lugolofu,
tikhandi tifwata ishiyooli,
khanji tikhandi tisipiikhwa nu lujowo loloona.
11 Khanji mumeenye shina tikhandi tikimusenjela shila muunu,
ngaja udaada shina ikivasenjela avanaakwe yumwene.
Kiiva tavajiniaga inumbula,
tavavatamyaga na kivasimila,
12 baheene mukhale shina uNguluvi idobokha.
UNguluvi uyo yumwene yuna ikivashemeela kiyinjila mu Wutwa waakwe uwa wutupikho.
13 Pina mwapulisaaga iliswi lyakwe kihuma kunyeesu,
musikhaposheelile ngaja liswi lya muunu,
leelo mwaposheelaga kiiva Liswi lya Nguluvi,
shiyooli shilishwali.
ILiswi ilyo lilyene lina lisenga insengo mukhati mu numbula seenyu omwe vahuvililaaji.
Kwa kiiva ya ilyo,
tikimuhonjesa uNguluvi wiila.
14 Vahuvililaaji vayeesu,
gina gasenjekhaga kwa vahuvililaaji va Kilisito Yeesu,
vina vali mu fipuga fya vahuvililaaji va Nguluvi ku nyi ya Yudeya,
gageene gina gasenjekhaga na kunyeenyu.
Mwalafisiwaagwa na vaanu va kunyeenyu ngaja fipuga fya vahuvililaaji va Kilisito Yeesu ava ku Yudeya,
shina valafisiwaagwa na Vayahuudi vayaanave.
15 AVayahuudi awo,
vaveene vina vamubudaga uMutwa uYeesu na vakuwamalago ava pawukuulu,
khanji vatulemasaaga ose.
Avaanu awo,
vikimukhalasa uNguluvi,
khanji valugu va vaanu woona,
16 kiiva vitigana kitusivila kikhoma kwa vina vasili Vayahuudi,
ndeeno visivila kiija vasikulusiwe.
AVayahuudi awo,
wiila vapikiyitenekha kiyonjelesa uwunansi mbakha inkhalasi ya Nguluvi yivafishile.
UPawulo idobokha kitangaana na Vatesalonike
17 Vahuvililaaji vayeesu,
pina takhamilisiwaagwa kilekhana noomwe uluhaavi lula ulufupi,
talekhanaga shimuvili,
leelo inumbula seesu sikhandi lumo noomwe.
Uluhaavi loona ulo,
tikhandi ni lihaahi lya kitangaana noomwe.
18 Lulwene tikhandi tisakula kiyinsa kunyeenyu,
leelo uShetaanic akhandi ikitusivila.
Mandu one Pawulo,
wiila nikhandi nisakula kiyinsa,
19 kwa kiiva omwe yuumwe vina mukituviikha ose kiiva nu luhuviililo,
uwushendeefu,
na kiyisufya pa Mutwa weesu uYeesu pina akhayinsa.
20 Shiyooli,
omwe yuumwe tikiyihalila na kishendeeva.