1 Vatesalonike 1

Ibalula ya wutasi iya Pawulo kwa

Vatesalonike

UPawulo ikivahunjila aVatesalonike

1 Ibalula iyi yihumile kunyangu one Pawulo lumo nu Silwano nu Timoteo. Tikivayandishila omwe shipuga sha vahuvililaaji ava ku lijumbi lya ku Tesalonike, omwe vina mukimuhuviilila uNguluvi uWiheesu nu Mutwa uYeesu Kilisito.

Imota nu wulindamafu, five lumo noomwe.

UPawulo ikimuhonjesa uNguluvi

2 Tikimuhonjesa uNguluvi wiila kwa kiiva ya omwe woona, khanji tikivafuunyila kusiina kikhatala. 3 Pina tifuunya kwa Nguluvi uWiheesu, tina luuju ni nsengo sina mwisenga kwa lihuuvi. Tina luuju uludali lwenyu luna lupinsiwa nu lugano lwenyu, khanji shina mugugumila kwa kiiva ya luhuviililo lwenyu kiija, uMutwa weesu uYeesu Kilisito shiyooli akhatina.

4 Vahuvililaaji vayeesu, omwe vina uNguluvi avageene, timeenye kiija uNguluvi avabagwile kiiva vaanu vaakwe. 5 Timeenye ndeeno, kwa kiiva pina tikhandi tiikhoma kunyeenyu iMola iNofu, tisikhakhomile kwa maswi geene duguli, leelo tikhakhomile kwa ngufu nu mutango gwa Numbula uMunofu. Khanji tamanyaga bila muninu muninu, kiija iMola iNofu iso sa shiyooli. Mumeenye wunofu shina tikhandi tiikhala lumo noomwe, kiija tivatanje. 6 Khanji, hata nda mukhandi mu malava kwa kiiva ya lihuuvi lyenyu, mwaposheelaga imola iyo kwa wushendeefu wuna wiihuma kwa Numbula uMunofu. Ndeeno mwafwataga ishihwano sheesu ni shihwano sha Mutwa uYeesu.

7 Lino mu ilyo, mwiva shihwano shinofu kwa vahuvililaaji woona va mu nyi ya Makedoniya na mu nyi ya Akaya. 8 Kihuma kunyeenyu, avaanu vapulikha imola ya Mutwa uYeesu, vasili vaanu hela va ku nyi ya Makedoniya na va ku nyi ya Akaya, leelo imbali soona, ilihuuvi lyenyu kwa Nguluvi limanyiishe. Mu ilyo tisiilava kilogola ulwa lihuuvi lyenyu, 9 kwa kiiva koona kuna tiiluta, avaanu viijova shina mwatuposheelaga pina tayinsile kunyeenyu. Vitaviilila shina mwalekhaga amanguluvi geenyu na kimuhuviilila uNguluvi, baheene mumusenjele umwene yuna muumi, khanji wa shiyooli. 10 Khanji vitaviilila shina mukimuhepelesa uLusawo lwakwe uYeesu kitina kihuma kwa Nguluvi. Uyo yumwene yuna uNguluvi wámufyusaaga kihuma kwa vina vafwile. UYeesu yumwene yuna akhatukulusa mu nkhalasi ya Nguluvi yina yiyinsa.