Kiyipinyanga kwa kiiva ya kiyinsa uMutwa uYeesu
5
1 Omwe vahuvililaaji vayeesu,
tisisakulwa kivayandishila ulwa luhaavi luna akhayinsa uMutwa uYeesu,
2 kwa kiiva omwe mumeenye ilijuva lya kiyinsa uMutwa uYeesu,
likhava lya kitinuhisa ngaja umuhiiji shina iyinsa paashilo.
3 Avaanu pina vakhava viija,
“Tivateeme khanji tiyiyesheele,”
apo baheene,
shitu amalava gakhavayinsila ngaja uwuvafi uwa kisava,
shina wukimuyinsila uwashimaayi umunya lwanda.
Mu ilyo vasikhakulukha.
4 Leelo omwe vahuvililaaji vayeesu,
ilijuva ilyo musikhatinuhisiwa,
kwa kiiva musili mu nshiisi.
5 Omwe woona muli vaana va wuvalafu,
vaana va shiminsi.
Ose ti vahuvililaaji tisili vaanu va shilo,
awu va nshiisi.
6 Lino,
tisikhaveesaga ngaja avaanu avanji vina viigona utulo,
leelo tiyiyangalilaje na kiiva nu luhala.
7 Vina viigona utulo,
viigona ishilo.
Khanji vina vigaala,
vigaala pa shilo.
8 Lino,
ose kiiva tili vaanu va wuvalafu,
tisakulwa kiyivavala.
Tiveesaje ni lihuuvi nu lugano,
ngaja umusulukhali yuna isakulwa afwale ishiinu isha kisivila ishifuva shaakwe.
Khanji tiveesaje vaanu va kihuviilila uwukulukho,
ngaja umusulukhali yuna isakulwa afwale inkhofyolo iya shuuma ku mutwe.
9 UNguluvi asikhatubagwile ose kiija atubude kwa nkhalasi yaakwe,
leelo akhatubagwile baheene tipate uwukulukho kwa nsila ya Mutwa weesu uYeesu Kilisito.
10 Uyu yumwene wáfwisaga kwa kiiva ya ose,
baheene tive lumo nu mwene,
pina tili wuumi awu pina tifwile.
11 Lino,
vatamisaniaji na kikhangasania inumbula seenyu ngaja shina mwigaha.
Injendo sina sifwaya kwa vahuvililaaji va Yeesu
12 Lino omwe vahuvililaaji vayeesu,
tikivalomba muvatiilaje avaanu vina visenga insengo kwa kiiva yeenyu,
khanji vikivalongosa kwa wutawulilwa wa Mutwa uYeesu na kivapavila.
13 Muvatiilaje mandu na kivagana kwa kiiva ya nsengo yaanave.
Khanji mukhalaje kwa wulindamafu.
14 Vahuvililaaji vayeesu,
tikivalomba mandu kiija,
muvapavilaje avaanu awoolo na kivakhangasa vina vayolwepwe mu numbula saanave.
Khanji muvatangaje avawoto na kivagugumila avaanu woona.
15 Yiyangalilaji wunofu,
umuunu yoyoona asikhamuhombesaaga kimugahila umuyine uwuvi,
leelo wiila mujimbaje kigahilana amanofu yuumwe kwa yuumwe na kwa vaanu woona.
16 Mushendeevaje wiila,
17 khanji mufuunyaji uNguluvi wiila,
18 na kimuhonjesa kwa goona,
kiiva ago gageene gina umwene isakula mugahaje,
kwa kiiva mulungeene nu Kilisito Yeesu.
19 Musikhamusivilaji uNumbula uMunofu.
20 Khanji musikhawubedalilaji uwukuwamalago,
21 leelo gasesaaji goona na kigayinatila amanofu,
22 na kigalekha amavi.
23 UNguluvi yumwene yuna ikitupeela uwulindamafu,
avavalase omwe mu goona khabisa.
Avadiime mu numbula seenyu,
uwiikhasi weenyu na mavili geenyu,
baheene muve musipiikhwa mbakha uluhaavi pina akhayinsa uMutwa weesu uYeesu Kilisito.
24 UNguluvi yuna ikivashemeela,
akhavasenjela ago,
kwa kiiva umwene muyinatifu.
Amaswi aga kihwesania
25 Vahuvililaaji vayeesu,
mutufunyilaje na yuuse kwa Nguluvi.
26 Muvahunjilaje avahuvililaaji vayeesu woona,
kwa lugano lwa Yeesu Kilisito.a
27 Nikivalajisa kwa wutawulilwa wa Yeesu Kilisito kiija,
vayimbilaji avahuvililaaji vayeesu woona,
ibalula iyi.
28 Imota ya Mutwa weesu uYeesu Kilisito,
yive lumo noomwe.