3
1 Lino,
kwa kiiva uNguluvi waÌvafyusa lumo nu Kilisito,
inumbula seenyu sidobokhaje aga kushaanya,
kuna uKilisito akheele ku liwokho ilya kundiilo ilya Nguluvi,
mu luvala ulwa lishima likhome mandu.
2 Musikhahiivaji aga mu nyi muno,
leelo hiivaji gina gali kushaanya,
3 kwa kiiva uwiikhasi weenyu uwa wunansi wafwisaga na mwafyukhaga lumo nu Kilisito.
Lino mwikhala lumo nu Kilisito pa Nguluvi,
leelo uwuumi uwupya uwo,
wusiwonekha.
4 UKilisito wuumi weenyu,
khanji pina akhawonekha,
na yuumwe mukhawonekha lumo nu mwene na kiiva mu wutupikho waakwe.
Uwiikhasi uwupya
5 Baheene lino musikhagasenjelaji amavili geenyu,
insengo sa mu nyi ngaja uwushemi,
uwaafu,
uwupafu wa kigonana na vaanu ava kunja,
uwupafu uwuvi,
nu wupafu uwa fiinu.
Uwupafu uwo,
kukwene kigafuunya amanguluvi.
6 Kwa kiiva ya ago,
ululawo lwa nkhalasi ya Nguluvi luyinsa kwa vanansi.
7 Na yuumwe paanyuma,
mukhandi mwigaha ago pina mukhandi mwikhala kwa kigayinatila.
8 Lino leelo,
lekhaji khabisa,
inkhalasi soona,
uwuvi,
amaligo ni njowo imbi,
sina sisifwaya mu malomo geenyu.
9 Musikhajovelanaji uwudehi,
kwa kiiva mwawuyaawula uwiikhasi weenyu uwa wunansi lumo ni nsengo saakwe,
10 mwawuyinatila uwiikhasi uwupya.
UNguluvi yumwene apikiwuwumba uwiikhasi uwupya uwo,
kilingana ni shihwano shaakwe umwene,
baheene mumumanye wunofu uNguluvi.
11 Ndeeno,
kusiina uwupaayo wa Muyahuudi na yuna asili Muyahuudi,
yuna ayinjisiiwe ijando,
awu yuna asiyinjisiiwe ijando,
umuyinsano awu umuyinsa na malenga,
umuvanda awu yuna asili muvanda.
a Leelo uKilisito yumwene yuna isakulwa mu goona hela,
khanji ali mu numbula sa vahuvililaaji woona.
12 Lino omwe mubagwilwe nu Nguluvi,
khanji vagolofu vina avageene,
ndeeno muveesaje ni numbula ya lusungu,
uwunofu,
kiyiyiisa,
uwuhuugu,
nu lugugumilo.
13 Mugugumilanaje,
na nda umuunu ana liswi lya kimupiikha umuyine,
musajilanaje ngaja shina uMutwa uYeesu avasajiile omwe.
14 Ilikhome mandu mu ago goona mugananaje,
kwa kiiva ulugano lulwene luna lukutuviikha woona mu shipuga ishinofu shina shikhamiliishe.
15 Uwulindamafu wa Kilisito wuvalongosaaje mu numbula seenyu,
uwulindamafu uwo wuweene mwashemelwagwa kiiva muvili gumo.
Khanji,
muveesaje mukimuhonjesa uNguluvi.
16 Iliswi lya Kilisito livateme mandu mu mahiiva geenyu na gina mwigaha mu wiikhasi.
Mumanyisaniaje na kipavilana kwa wumanyi woona.
Mumuyeyemelelaje uNguluvi kwa numbula seenyu,
lumo na kimuhonjesa kwa njeyemo sa Sabuli ni njeyemo isa kimutupikha.
17 Gogoona gina mwijova awu kisenga,
sengaji ngaja shina yisakulwa kwa vaanu vina vikimuhuviilila uMutwa uYeesu,
mukimuhonjesa uNguluvi uWiheesu,
kishilila umwene.
Uwiikhasi uwunofu mu nanda sa vahuvililaaji va Yeesu
18 Omwe vashimaayi,
vatiilaji avagoosi veenyu ngaja shina yisakulwa kwa vaanu vina vikimuhuviilila uMutwa uYeesu.b
19 Na yuumwe vagoosi,
muvaganaje avadala veenyu,
musikhaveesaji vakhali kuveene.
20 Na yuumwe vaana,
vatiilaji avasafi veenyu mu goona,
kwa kiiva kigaha ndeeno,
ishendeeva uMutwa uYeesu.
21 Na yuumwe vawiheesu,
musikhavakhalasaaji avaneenyu,
kiija vasilaave vayoolopwe mu numbula.
22 Na yuumwe vavanda,
vatiilaji avatwa veenyu va mu nyi kwa nsengo soona,
khanji musikhagahaji ndeeno pina vikivaloleela,
baheene muyiwonense kiija mufwaya.
Leelo,
muvatiilaje wiila kwa numbula yoona kwa kiiva ya kimutiila uMutwa uYeesu.
23 Lyolyona lina mwisenga,
sengaji kwa numbula yoona,
muveesaje musenga ngaja shina mukimusenjela uMutwa uYeesu,
musikhaveesaji ngaja mukimusenjela muunu.
24 Kumbukhaji kiija,
uMutwa yuna mukimusenjela yu Kilisito,
umwene akhavapeela ulutono luna avavishiile.
25 Leelo yoyoona yuna iigaha uwunansi,
akhaposheela kilingana nu wunansi waakwe,
kwa kiiva uNguluvi asibaniilila muunu yoyoona.