2
1 Nidobokha mumanye shina nisenga insengo kwa ludali,
kwa kiiva yeenyu na kwa kiiva ya vahuvililaaji va Yeesu ava ku lijumbi lya Lawodikiya,
na kwa vanji woona vina vasinatanganaje noone.
2 Niigaha ndeeno baheene inumbula seenyu sikhangale na kihanga lumo mu lugano,
nu wumanyi wuna wukivapeela ishiyooli.
Baheene mumanye imola sa Nguluvi sina sikhandi sifihiilwe,
uluganulo lwakwe,
uKilisito yumwene.
3 Mukhati yaakwe mumwene muna gafihiilwe amanofu goona aga wumanyi nu luhala.
4 Lino nikivayandishila ago,
kiija musikhayitikhaji umuunu yoyoona avajanjilise kwa maswi ga kivakwehelesa.
5 Nilogola ndeeno hata nda nili kutali noomwe,
inumbula yangu yili lumo noomwe.
Nishendeeva kwa kiiva napulikha shina muhanjile nu wujimfu weenyu wa lihuuvi lyenyu mwa Kilisito.
Kilungana nu Kilisito
6 Lino,
mukimuhuviilila uKilisito Yeesu,
kiija umwene yu Mutwa,
ndeeno muyitenekhaje kimuyinatila.
7 Yijiniaji kwa mwene,
mukhangalaje mu lihuuvi ngaja shina mwayimanyisaaga.
Khanji muve mukimuhonjesa mandu uNguluvi.
8 Muyivavalaje,
umuunu yoyoona asikhavayasaaji kwa mamanyiso aga wudehi gina gasikwiliile kivatanga.
Amamanyiso ago,
ngʼoma sa vaanu hela,
khanji mahiiva ga mu nyi muno,
a gasiihuma kwa Kilisito.
9 Musikhayitikhaji umuunu kivajanga,
kwa kiiva uwukwilano woona uwa Nguluvi,
wuli mu muvili gwa Kilisito.
10 Na yuumwe mwawuposheela uwuumi woona kwa kilungana nu Kilisito,
umwene ali pashaanya ya wutwa nu wutawulilwa woona wuna wuli mu nyi yina yisiwonekha.
11 Pina mwalunganaga nu Kilisito,
mukhayinjisiiwe ijando.
Musikhayinjisiiwe ijando na mawokho ga vaanu,
b leelo mukhayinjisiiwe ijando nu Kilisito yumwene,
uluganulo lwakwe,
uKilisito wávahumyaga mu wiikhasi weenyu uwa wunansi.
12 Khanji pina mwatwinisiwaagwa,
uwiikhasi weenyu uwa wunansi wasilwagwa lumo nu Kilisito.
Khanji mwafyukhaga lumo nawo,
kwa kiiva mwahuvililaga ingufu sa Nguluvi,
yuna wámufyusaaga kihuma kwa vina vafwile.
13 Khanji mukhandi mufwile kwa kiiva ya wunansi weenyu,
na mavili geenyu aga wunansi gasikhandi gayinjisiiwe ijando.
Leelo uNguluvi wávafyusaaga lumo nu Kilisito Yeesu.
Uluganulo lwakwe,
wátusaajila uwunansi weesu woona.
14 UNguluvi wágahaga ngaja kiwuusa ibalula yina yikhandi yikitusitaakha ose,
mu litaafili ilya mukhole gwesu.
UNguluvi wáwusaaga ibalula iyo pina uKilisito wákhomelelwagwa pa musalaaba na kiifwa.
15 Pa musalaaba apo,
uNguluvi wágapokhaga amalungu uwutwa nu wutawulilwa,
wágamena kwa lushimo na wágayegula bahawuvalafu.
Uwuyeeshelo uwa mu miikho
16 Lino,
musikhamupulisaaji umuunu yoyoona yuna ikivahiga kwa mwikho ugwa kiilya ifyakiilya,
ugwa fingʼwelo,
ugwa shiwungo isha diini,
ugwa shiwungo isha mwesi umupya pina guyansa kiwonekha,
awu umwikho ugwa lijuva lya Sabaato.c
17 Goona ago,
gali ngaja mumepo gwa gala gina gakhayinsa,
amaswi aga shiyooli giwonekha mwa Kilisito.
18 Musikhamupulisaaji umuunu yoyoona yuna ikiyitumfya kwa wuhuugu uwa wudehi,
yuna ikivafuunya avamalayikha.
d Iigaha ndeeno kwa kiiva ihuviilila amahilu.
Umuunu uyo asikhavapokhaga injoola yeenyu iya wiikhasi wa shiluta,
uyo muyasu,
ana mahiiva mavi aga mu nyi.
19 Khanji uyo ayibagwile mwene kwa Kilisito,
yuna ngaja mutwe gwa muvili.
Avahuvililaaji va Kilisito vali ngaja muvili guna gulungeene ni filungo ni nkhole nyinshi.
Kihuma kwa Kilisito,
umuvili gwipata ishakiilya na kikula ngaja shina isakula uNguluvi.
20 UKilisito pina wáfwile,
uwiikhasi weenyu uwa wunansi wasilwagwa lumo nu mwene,
ndeeno uwiikhasi weenyu wuna wutemiilwe ni ngʼoma sa vaanu,
e waasila.
Lino,
kwashi mwikhala ngaja vaanu va mu nyi iyi na kiyinatila ingʼoma kiija,
21 “Musikhakhataji ishi,
musikhapyasaaji,
awu musikhajesaaji isho!”
22 Goona ago,
ndaji na mamanyiso ga vaanu hela,
gina gilutana ni fiinu fina finanjikha pina fyasenjelwa insengo.
23 Shiyooli,
vina viyinatila indaji iso viwonekha kiija vana wumanyi.
Viyinatila amiikho gina vayivishiile vaveene,
uwuhuugu wa wudehi na kigutema umuvili kwa wukhali.
Leelo indaji iso sina vayivishiile vaveene,
sisikwiliile kiwusivila uwupafu uwuvi uwa muvili.