4
1 Omwe vatwa,
muvagahilaje avavanda veenyu kwa lugoto luna lufwaya na kwa wunofu.
Muveesaje nu luuju kiija,
omwe khanji munawo uMutwa wa kushaanya.
Amalajiso
2 Mumufuunyaje uNguluvi nsiku soona,
muveesaje meeho khanji mumuhonjesaaje.
3 Mutufunyilaje na yuuse,
baheene uNguluvi atudindulile insila ya kikhoma iliswi lyakwe,
lina likhandi lifihiilwe mbakha pina wáyinsaga uKilisito.
One nidindiilwe mu shifungo kwa kiiva ya kikhoma imola iso.
4 Munifunyilaje kiija,
nive ni ngufu isa kikhoma bahawuvalafu shina yisakulwa kilogola.
5 Muveesaje nu wumanyi pina muhanjile na vaanu vina vasili vahuvililaaji va Yeesu,
musenjelaje wunofu uluhaavi loona luna munalo.a
6 Amaswi geenyu gave manofu khanji gina gifwaya,
mumanye kimuyankha wunofu shila muunu.
Inyunjila iya wudugo
7 UTikiko lukholo lwesu mugani,
muvanda muyinatifu,
khanji musenga nsengo muyeesu mu nsengo ya Mutwa uYeesu.
Uyo yumwene akhavajovela imola sangu soona.
8 Lulwene namufilikha kunyeenyu kiija,
avataviilile imola seesu na kivayishilisa.
9 Iyinsa lumo nu Onesimo,
ulukholo lwesu mugani na muyinatifu,
khanji muunu wa kunyeenyu.
Vasivajovele goona gina gisenjekha panyeesu apa.
10 UAlisitaliko yuna afunjiilwe lumo noone mu shifungo,
ikivahunjila.
Woope uMaluko ubinaamu wa Balinaaba ikivahunjila.
Mwayanushila amalajiso gina gamulenjile umwene,
pina akhafikha kunyeenyu muyanushilaji wunofu.
11 Woope uYoshuwa yuna itambulwa Yusito,
ikivahunjila.
Mu Vayahuudi vamonga vina vaposheelile ilihuuvi,
awo vatatu hela vaveene vavanda vayangu mu nsengo ya Wutwa wa Nguluvib lumo noone.
Awo vikinitanjilisa mandu one.
12 UEpafula umuunu wa kunyeenyu,
muvanda wa Kilisito Yeesu,
ikivahunjila.
Wiila ikiyihumya kivafuunyila omwe kiija,
mujinaje na muveesaje vakhangafu na kiiva vajimfu kwa goona gina uNguluvi isakula.
13 Nikimwaga ikiyihumya kisenga insengo kwa ludali,
kwa kiiva yeenyu na kwa vaanu va lijumbi lya Lawodikiya na va lijumbi lya Hiyelapoli.
14 ULuuka muhusi weesu mugani nu Deema,
vikivahunjila.
15 Muvahunjilaje avahuvililaaji vayeesu vina vali ku Lawodikiya.
Khanji mumuhunjilaje uNimfa uwulumbu weesu mu lihuuvi ni shipuga sha vahuvililaaji vina vitangaana kukhaaya yaakwe.
16 Pina vakhayimba ibalula iyi kunyeenyu,
mujiniaje kiija shoope shiyimba ishipuga sha vahuvililaaji ava ku Lawodikiya.
Omwe khanji sakulaji insila iya kiyimba ibalula yina vaposheelaga aValawodikiya.
17 Mumujovele uAlikipo kiija,
amale wunofu insengo yina uMutwa uYeesu amupeelile.
18 Niyandikha aga kwa liwokho lyangu,
one Pawulo nikivahunjila.
Muveesaje nu luuju kiija,
nidindiilwe mu shifungo.
Imota ya Nguluvi yive lumo noomwe.