UPawulo ikimuhuviilila uKilisito hela
3
1 Lino,
vahuvililaaji vayangu,
mushendeevaje kwa kiiva muli vaanu va Mutwa uYeesu!
Nisikhatala kivayandishila khanji amaswi gagala gina natalaga kivayandishila,
kwa kiiva gikivadiima muve mu shiyooli.
2 Muyivavalaje na vaanu vina vali ngaja mbwa,
vina viigaha uwunansi,
vina vimanyisa kiija uNguluvi ikulusa avaanu hela,
vina vayinjisiiwe ijando!a
3 Ose yuuse vaanu vina tiyinjisiiwe ijando mu numbula seesu,
kwa kiiva uNumbula wa Nguluvi ikitutanga kimufuunya uNguluvi.
Ose tikiyihalila uKilisito Yeesu na kimuhuviilila.
Khanji ose tisikiyihuviilila injendo seesu isa mu muvili,
kiija tipate uwukulukho,
4 hata nda one nina shiyooli sha kihuviilila isa mu muvili.
Leelo,
nda akwali umuunu yuna ikiyiwona kiija,
angahuviilila injendo isa mu muvili,
one ninaso nyinshi mandu isa kihuviilila kishila umwene.
5 Mu lisiku lya munaana kihuma pina nasawaagwa,
nayinjisiwaagwa ijando.
One nili Muisilaheli wa shikholo sha Benyamini.
One nili Muhebulaniya wa shiyooli.
One nili Mufalisaayob kwa nsila ya kisiyinatila mandu indaji sa Musa.c
6 Khanji nikhandi nina ludali mandu,
lulwene lwapinsaaga naava nikifilafya ifipuga fya vahuvililaaji va Yeesu Kilisito.
Mu ndaji iso,
one nikhandi mugolofu,
nisikhandi nipiikhwa.
7 Leelo gala goona gina gakhandi giwonekha kiija ga lutono kunyangu,
lino nikigaaga gangaya lutono kunyangu,
kwa kiiva ya Kilisito.
8 Gasili ago hela,
leelo nikigaaga goona kiija gangaya lutono,
pina nilingaania nu lutono ulukhome ulwa kimumanya uKilisito Yeesu uMutwa wangu.
Nigaleshile aganji goona,
kwa kiiva yaakwe.
Nikigavasa ago kiija mafi,
baheene nive muunu wa Kilisito,
9 khanji nive lumo nu mwene.
Nisihuviilila khanji kiiva mugolofu pa Nguluvi kwa kisiyinatila indaji sa Musa,
leelo niiva mugolofu kwa kimuhuviilila uKilisito.
UNguluvi yumwene yuna ikinivasisa kiiva mugolofu,
kwa kiiva nikimuhuviilila uKilisito.
10 Nidobokha kimumanya mandu uKilisito na kihanga nawo mu ngufu sina akhandi anaso pina ifyukha kihuma kwa vina vafwile.
Khanji nidobokha kihanga mu malava gaakwe.
Khanji nidobokha nifwe ngaja shina wáfwisaga umwene.
11 Nidobokha ago,
baheene nive mu vaanu vavaamo,
vala vina uNguluvi akhavafyusa.
Kigugumila mbakha kuwudugo
12 One nisiijova nigapatile ago,
awu kiija nili mugolofu kwa goona.
Ndaali!
Leelo,
nipikiyikhangasa kiija nikhagapata ago.
Ago gageene gina uKilisito Yeesu wánishemelelaga nipate.
13 Omwe vahuvililaaji vayangu,
nisikiyivasa kiija,
shi nagapata.
Leelo likwali lina nishaanali nipikiligaha,
kilekha kihiiva goona gina gashilaga,
na niyinatila nigapate gina gali pamwandi.
14 Lino nipikiyikhangasa kiija nifishe pamwandi,
mbakha nipate ilihombo lyangu.
Ilihombo ilyo,
uNguluvi wánishemeelaga kishilila kwa Kilisito Yeesu,
kiija nikhaluta kipata kwa Nguluvi.
15 Lino,
ose woona vina tikhangeele mu lihuuvi tisakulwa kipulinkhana mu njowo isi.
Nda muna mahiiva gina gasihwanana ni njowo isi,
uNguluvi yumwene asivagubutulile musiimanye shina sishwali.
16 Ishiinu ishikhome lino,
tiyinatilaje mandu na kikhala mu lila lina uNguluvi atugubutuliile.
Avahuvililaaji vagahaje shina akhandi iigaha uPawulo
17 Omwe vahuvililaaji vayangu,
gahaji ngaja shina niigaha one.
Khanji yimanyisaaji kwa vaanu vina vifwata injendo seesu.
18 Nivajoveele mala nyinshi iliswi ili,
lino niwuyiila khanji kivajovela kwa kikhoola kiija,
kuna vaanu vinshi vina valugu va wukulukho wuna wasenjekhaga nu Kilisito pa musalaaba.
19 Kuwudugo waanave avalugu awo,
uNguluvi akhavabuda,
kwa kiiva uwupafu waanave ni linguluvi lyanave.
Avaanu awo vikiyisufya pina viigaha aga wuyegufu,
amahiiva gaanave vihiiva hela aga mu nyi.
20 Leelo ose uwiikhasi weesu wuli kwa Nguluvi.
Tihepeleese kwa lihaahi mandu kiija,
uMutwa uYeesu Kilisito uMukulusaaji weesu,
akhatina kihuma ukho.
21 Umwene akhagaseetula amavili geesu,
aga wuwotowoto,
mbakha gave nu wutupikho ngaja umuvili gwakwe.
Uyo yumwene umunya ngufu isa kitema ifiinu fyona.