4
1 Lino vahuvililaaji vayangu,
vagani,
khangalaji kimuhuviilila uMutwa uYeesu.
Vagani vangu,
nina lihaahi ilya kitangaana noomwe.
Omwe lushendeewo lwangu,
khanji lutono lwangu luna nikhapeelwa kwa nsengo yina nisenjile.a
Amapavilo ga Pawulo
2 Nikivalomba mandu uEwodiya nu Sinitike muve nu lugulumilo lumo,
kwa kiiva woona vavili muli vahuvililaaji muhanjile mwa Mutwa uYeesu.
3 Hata yuuwe muvanda muyangu wa shiyooli,
nikikulomba uvatanje avashimaayi vavili awo,
vave nu lugulumilo lumo,
kwa kiiva woona vavili awo,
vajimbaga mandu kiyalaalisa iMola iNofu lumo noone nu Kilementi na vavanda vayangu avanji.
Amataawa ga vaanu awo woona,
gayandiikhwe mu Litaafili ilya Wuumi.b
4 Shendeevaji nsiku soona,
kwa kiiva muli vaanu va Mutwa uYeesu,
khanji niijova,
shendeevaji!
5 Uwuhuugu weenyu wumanyikhaje kwa vaanu woona.
UMutwa uYeesu ali nkholeela.
6 Musikhalavaji kwa shiinu shoshoona,
leelo mu goona gina mwisakula,
gamanyikhaje nu Nguluvi kwa kimulomba na kimuhonjesa.
7 Ndeeno,
uwulindamafu kihuma kwa Nguluvi wuna wushilile uwumanyi woona wa vaanu,
wusivadiime inumbula nu luhala lwenyu,
kwa kiiva muli vaanu va Kilisito Yeesu.
8 Kuwudugo,
vahuvililaaji vayangu,
nikivajovela kiija muyinatilaje goona aga shiyooli,
amaswi gina gisakulwa kitiilwa,
gasihansinkheene nu wunansi,
amaswi gina gishendeefya,
khanji amaswi gina manofu.
Amaswi aga gisakulwa kisufisiwa,
gahiivaji amaswi ago.
9 Muyitenekhaje kigaha gina mwayimanyisaaga na kiyanushila kihuma kunyangu,
gala gina mwapulikhaga kunyangu,
khanji mukhagaweene nigagahile.
Baheene uNguluvi yuna ikivapeela uwulindamafu,
asiyiteneshe kiiva lumo noomwe.
UPawulo ikivahonjesa aVafilipi
10 Lino uMutwa uYeesu ikinishendeefya mandu,
kwa kiiva pina sishilile nsiku nyinshi,
lino mukinikumbukha.
Shiyooli nsiku soona mukhandi mukinikumbukha,
leelo musikhandi mukwiliile kinileetela umutango gwenyu kunyangu.
11 Nisilogola ndeeno kwa kiiva nishepushiilwe ifiinu,
ndaali!
One niyimanyiise kiliyiitikha lyolyona lina likiniyinsila.
12 Niyimanyiise kikhala mu wupiina wa fiinu.
Khanji niyimanyiise uwiikhasi uwa kiiva nafyo finshi.
Niyimanyiise kikwilana mu goona gina gikinipata,
yive kiyikuta awu kiiva ni njala,
yive mu finshi,
awu kishepushilwa.
13 Nihiiva kigaha goona ago,
kwa kiiva uKilisito yumwene yuna ikinipeela ingufu.
14 Hata ndeeno,
mwagahaga wunofu kwa kiiva mukhandi mukinitanga uluhaavi luna nikhandi mu malava.
15 Omwe Vafilipi mumeenye kiija,
pala pina nikhayansiise kivakhoma iMola iNofu,
na pina nikhahumile ku nyi yeenyu iya Makedoniya,
yuumwe hela mwanitangaga.
Kusiina ishipuga sha vahuvililaaji avanji vina vakhahanjile na kinipeela ifiinu.
16 Hata pina nikhandi ku lijumbi lya Tesalonike,
mukhandi mukinifilishila one ifiinu fya kinitanga.
17 Nisilogola ndeeno,
kwa kiiva nisakula munipeelaje ifiinu,
ndaali.
Leelo nisakula hela kiija,
uNguluvi avayimiilile mandu kwa kiiva ya lusungu lwenyu.
18 Lino,
ifiinu fila fyona fina mwanilajisisaaga kwa nsila ya Epafulodito,
shi nafiyanushilaga.
Fyakwilanaga mu goona gina nikhandi nigayile,
khanji ifinji fisigeele.
Umutango ugo guli ngaja sadaakha inofu yina yiihumya umununsi munofu,
yina yiyiitikhwa nu Nguluvi,
khanji yikimushendeefya.
19 Lino,
uNguluvi wangu,
asivapeele goona gina mushepushiilwe,
kilingana nu wusi waakwe uwukhome.
Asiigahe ndeeno kwa nsila ya Kilisito Yeesu.
20 UNguluvi atupikhwe shiluta na shiluta.
Amina!
Amaswi aga wudugo
21 Vahunjilaji avahuvililaaji woona va Kilisito Yeesu ava ku Filipi.
Avahuvililaaji vayeesu vina vali lumo noone panu,
woope vikivahunjila.
22 Khanji avahuvililaaji woona vina viikhala mu lijumbi ili vikivahunjila,
mandu vina viikhala mu nanda ya Kayisaali,
umutwa wa Valuumi.
23 Imota ya Mutwa uYeesu Kilisito,
yive lumo noomwe.