Vafilipi 2

Kiyimanyisa kiyiyiisa ngaja shina ashwali uYeesu Kilisito

1 Wuli, mwijina mu numbula seenyu kwa kiiva muli vaanu va Kilisito? Wuli, inumbula seenyu siyishilisiwa mu lugano lwakwe? Wuli, muhanjile nu Numbula uMunofu? Wuli, uKilisito ikivagana na kivasungupila? 2 Lino, munishendefyaje mandu, kwa nsila ya kiiva na mahiiva gagaamo, ulugano luluumo, inumbula yiyiimo nu lugulumilo luluumo. 3 Musikhagahaji lyolyona kwa numbula ya wushooyo na kiiva na matuupa. Leelo shila muunu ayiyisaaje na kivatuna avanji kwa kivatiila kishila umwene. 4 Musikhayisenjelaji yuumwe duguli hela, leelo vasenjelaji nava vayeenyu.

5 Ulugulumilo lwenyu luveesaje luhwanana nu lugulumilo luna akhandi analo uKilisito Yeesu.

6 Umwene akhandi alingaanile nu Nguluvi shina ashwali,

leelo asikhaweene kiija kilingana nu Nguluvi, shiinu sha kingʼangʼaanila.

7 Wáalekha kiiva ndeeno,

wáava alingaanile nu muvanda shina ashwali,

wásaviilwe ngaja muunu,

wáava muunu ngaja avanji.

8 Pina wáwonekhaga muunu,

wáyiyiisa,

wámutiila uNguluvi mbakha pina iyiitikha kiifwa,

imfwa iya pa musalaaba!

9 Kwa kiiva ya ilyo, uNguluvi wámutufya mandu,

wámupeela ilitaawa ilikhome kishila amataawa goona.

10 Wágahile ndeeno kiija,

ifiwumbwa fyona,

ifya kushaanya kwa Nguluvi,

ifya mu nyi ni fya ku wusimu,

fifugame kwa kiiva ya litaawa lya Yeesu.

11 Khanji shila muunu ayiitishe kiija, uYeesu Kilisito yumwene Mutwa,

baheene uNguluvi uDaada, atupikhwe.

Avahuvililaaji vave ngaja wuvalafu mu nyi

12 Lino omwe vagani vangu, pina nikhandi kunyeenyu mukhandi mukimutiila uNguluvi nsiku soona. Shiisho ndeeno, hata lino pina nili kutali noomwe, yitenekhaji kigaha kwa kitiila na kitetema gina gisakulwa kwa vaanu, vina uNguluvi avakulwise. 13 Gahaji ndeeno, kwa kiiva uNguluvi yumwene isenga insengo soona kunyeenyu, baheene na yuumwe muve mwidobokha na kisenga gina idobokha gasenjekhaje.

14 Musengaje insengo soona bila kingʼuula wala kikhaanania, 15 baheene muve vaana vagolofu va Nguluvi, vina vasipiikhwa, khanji muve vaanu vina vasilogolwa amavi mu vaanu va lino, vina vanansi mandu. Mu vaanu awo, omwe muwonekhaje ngaja ngʼali sina singʼalikha mu nyi. 16 Muvakhomaje avaanu iLiswi lya Nguluvi lina likivapeela uwuumi wa shiluta. Gahaji ndeeno, baheene niyihalile ilisiku lina uKilisito akhatina, khanji insengo yina nikhandi nijimba kisenga kunyeenyu, yisikhandi kiija yigaya lutono.

17 Hata nda nifwe, idanda yangu yihumisiwe ngaja sadaakha ya divaayi pa luvala ulwa kihumisa ishadanda, lumo ni sadaakha ya lihuuvi lyenyu kwa Nguluvi, one nikhashendeeva, khanji nikhashendeeva lumo noomwe woona. 18 Na yuumwe shiisho ndeeno, shendeevaji na kishima lumo noone.

Imola ya Timoteo nu Epafulodito

19 Nihuviilila kiija nda agane uMutwa uYeesu, nikhamufilikha uTimoteo mu nsiku siisi, ayinse kunyeenyu, baheene pina akhatina kuno, na yuune niyishilisiwe inumbula, pina akhava ikinitaviilila imola seenyu. 20 Kiiva, nisiina umuunu uyunji yuna ikivatuna mandu omwe, ngaja uTimoteo. 21 Avanji woona vikisituna injowo saanave hela, vasikiyituna insengo yina uYeesu Kilisito ikiyisakula. 22 Leelo omwe yuumwe mumeenye shina uTimoteo wáyiwonensaaga, kiija asenjile insengo ya Mola iNofu lumo noone, ngaja umwana nu wiihe. 23 Ndeeno nihuviliile kiija, nikhamufilikha kunyeenyu nyangu, pina hambi niiwona injowo sangu shina sishwali. 24 Khanji nina shiyooli kiija, uMutwa uYeesu mu nsiku siisi, asinitawule na yuune niyinse kunyeenyu.

25 Omwe mukhamufiliishe uEpafulodito kunyangu kinitanga na kinipeela ifiinu fina nigayile. Lino, niiwona kiija lunofu nimufilishe khanji kunyeenyu. UEpafulodito muhuvililaaji muyangu, muvanda muyangu mu nsengo ya Nguluvi, aveele musulukhali muyangu kilwilanila iMola iNofu. 26 Nikimutawula kwa kiiva ana lihaahi likhome ilya kiwonana noomwe woona. Khanji asugumiilwe kwa kiiva mupuliishe kiija, akhandi mutamu. 27 Shiyooli akhandi mutamu mandu, mbakha akhandi nkholeela kiifwa. Leelo uNguluvi wámusungupilaga, wámuponia. Lusili kiija uNguluvi wámusungupilaga mwene hela, leelo akhanisungupiile na yuune, kiija nisikhasugumilwagwa mandu.

28 Lino nisakula mandu kimufilikha kunyeenyu, kiija pina mukhamwaga mushendeeve khanji, baheene amangʼuulo gangu gasile. 29 Ndeeno, muyanushilaji kwa wushendeefu mandu ngaja muhuvililaaji muyeenyu. Khanji umuunu yoyoona yuna ali ngaja uyo, mumutiilaje, 30 kiiva akhandi nkholeela kiifwa, kwa kiiva ya nsengo ya Kilisito. Khanji akhandi iilwa kiyambusa uwuumi waakwe, baheene anipeele umutango guna omwe mukhandi musikwiliile kinipeela, kwa kiiva mukhandi kutali noone.