Vafilipi 1

Ibalula ya Pawulo kwa

Vafilipi

UPawulo ikivahunjila aVafilipi

1 Ibalula iyi yihumile kunyangu one Pawulo, lumo nu Timoteo. Ose tili vavanda va Kilisito Yeesu. Tikivayandishila omwe vabaagule woona va Kilisito Yeesu, muna muli ku lijumbi lya Filipi, lumo na vayimililaaji na vavanda va shipuga sha vahuvililaaji.

2 Imota nu wulindamafu kihuma kwa Nguluvi uWiheesu nu Mutwa uYeesu Kilisito, five lumo noomwe.

UPawulo ikivafuunyila aVafilipi

3 Wiila pina nikivakumbukha omwe, nikimuhonjesa uNguluvi wangu. 4 Wiila pina nikivafuunyila kunyaakwe omwe woona, nikivafuunyila kwa wushendeefu, 5 kwa kiiva omwe mwihanga noone kisenga insengo iya kikhoma iMola iNofu, kihuma ilisiku lina mwayihuvililaga mbakha iminsiyaano. 6 Nimeenye shiyooli kiija, uNguluvi yuna wáyansiise insengo inofu iya kivakulusa omwe, akhayitenekha kivakulusa mbakha kikwisa pa lisiku pina uKilisito Yeesu akhatina.

7 Nisakulwa one kihiiva ndeeno ulwa omwe woona, kwa kiiva nivageene mandu omwe. Omwe woona muhanjile mu mota ya Nguluvi iya kisenga insengo yaakwe, pina nili mu shifungo awu pina nikiyisaajila na kiyijinia iMola iNofu. 8 UNguluvi ameenye kiija, nina lihaahi lya kitangaana noomwe kwa lugano lulula ulwa Kilisito Yeesu.

9 Nikivafuunyila kwa Nguluvi kiija, ulugano lwenyu luve lupiyonjelela mandu mu wumanyi na mu luhala loona, 10 baheene mumanye na kihaagula gina idobokha uNguluvi. Apo baheene mukhava vanofu, mungaya mapiikho, mbakha ilisiku pina uKilisito akhatina. 11 UYeesu Kilisito akhavapeela ingufu isa kisenga shila nsengo sa shiyooli, kwa wutupikho na kimusufya uNguluvi.

UPawulo ishendeeva kiiva uKilisito iikhomwa

12 Lino omwe vahuvililaaji vayangu, nisakula mumanye kiija, goona gina gasenjekha kunyangu, gatanjiliise mandu kiyalaalisa iMola iNofu. 13 Avasulukhali woona ava pa mbalino ya mutwa panu, lumo na vanji woona, vameenye kiija, nidindiilwe kwa kiiva ya kisenga insengo sa Kilisito. 14 Khanji kidindilwa kwangu, kukwene kupinsiise avahuvililaaji vayeenyu vinshi, kikhangala inumbula kwa Mutwa uYeesu, kiija vasitiila kikhoma iLiswi lya Nguluvi kwa ngufu soona.

15 Shiyooli, avamonga vikimukhoma uKilisito kwa shooyo ni libaatu, leelo avanji vikimukhoma kwa numbula nofu. 16 Ava vikimukhoma uKilisito kwa lugano, vameenye wunofu kiija, uNguluvi aniviishile mu shifungo kiija, nive mulunjikhaaji wa Mola iNofu. 17 Leelo awo avanya libaatu, vikimukhoma uKilisito kwa numbula ya wushooyo waanave, wala vasikimukhoma kwa numbula nofu. Awo visakula kiyonjelesa amalava gangu mu shifungo.

18 Hata ndeeno kusili shiinu, kwa kiiva uKilisito iikhomwa. Iikhomwa yive kwa lugulumilo luvi, awu kwa lugulumilo lunofu. Na yuune kwa kiiva ya lujowo ulo, nishendeeva. Khanji nipishendeeva, 19 kwa kiiva nimeenye kiija, mu goona gina ganipatile, nikhakulusiwa, kwa kiiva mukinifuunyila kwa Nguluvi, khanji uNumbula uMunofu yuna afiliikhwe nu Yeesu Kilisito, ikinitanjilisa. 20 Nigulumiile kwa lihaahi likhome na kihuviilila kiija, kusiina gina gasinipeele insoni. Lino ngaja shina yikhandi nsiku soona, nisiyiteneshe kiyikhangasa mu numbula mbakha uKilisito asufisiwe mu goona gina nikigasenga, yive kisigala muumi, awu kiifwa.

21 Nilogola ndeeno kiiva kunyangu one pina nili muumi, nikimusenjela na kimusufya uKilisito. Nda nifwe yikhava lutono kiiva nikhava lumo nu Kilisito. 22 Nda nipili muumi, nikiyitenekha kisenga insengo inofu. Lino! Lili kwi lina hambi nihaagula? Maanyi! 23 Nikwehwa na mahiiva gavili, ilihiiva limonga nidobokha nilute baheene nikhale lumo nu Kilisito, ilyo lilyene lina linofu mandu kunyangu. 24 Leelo kwa kiiva ya omwe, nisakulwa kisigala kiiva muumi. 25 Nina shiyooli ni mola iyi, ndeeno nimeenye kiija nishaanali nisiive muumi. Khanji nisiive lumo noomwe woona, baheene nivatanje mukule mu lihuuvi lyenyu na kiiva ni limwemwe. 26 Pina nikhava lumo noomwe mukhayihalila uKilisito Yeesu, kwa kiiva akhava anitanjiliise one kitina khanji kunyeenyu.

27 Leelo hata nda nisikhayinsa, injendo seenyu silingaanaje ni Mola iNofu iya Kilisito. Ndeeno, nda niyinse kivaloleela, awu nda nisigale na kipulikha imola yeenyu kwa kutali, nisiive nimeenye kiija, mushaanali mukiyikhangasa kwa numbula yimo, mukililavila lumo ni lihuuvi lina lili mu Mola iNofu.

28 Khanji nive nipulikha kiija, musikivatiila hata padoodo avaanu vina vikivapinsisa amalava. Ago gageene gakhava shimanyilo kuveene isha kiwonensa kiija, uNguluvi akhavamena, omwe akhavakulusa. 29 Nilogola ndeeno, kwa kiiva musikhapeliilwe hela imota iya kimuhuviilila uKilisito, leelo mupeliilwe hata imota iya kilava kwa kiiva yaakwe. 30 Ago gina omwe mwilwa nago, gageene na yuune gina nikhandi nilwilanila, ngaja shina mwagaagaga. Khanji hata lino, mushaanali mupipulikha kiija, nipilwisania nago.