Amahilu nu wuwoto wa Pawulo
12
1 Nisakulwa kiyisufya hata kuve kusitanga shoshoona.
Lino nisakula kiyisufya ulwa malooto nu wugubutulo uwa Mutwa.
2 Nisakula kilogola ulwa maakha ishumi na gana gina gashilaga.
Umuunu yumonga muvanda wa Kilisito,
a wátolwagwa mbakha kifikha kushaanya kwa Nguluvi.
b Pina akhandi itoolwa,
apo nisimeenye pamonga akhandi mu muvili ugu,
awu asikhandi mu muvili ugu,
leelo uNguluvi yumwene yuna ameenye.
3-4 Nimeenye kiija umuunu uyo wátolwagwa mbakha kifikha kwa Nguluvi.
c Ila nisimeenye kiija,
pamonga wátolwagwa mu muvili ugu,
awu asikhandi mu muvili ugu,
leelo uNguluvi yumwene yuna ameenye.
Ukho wápulikhaga amaswi aga kiswiga mandu,
khanji akwasiina umuunu yuna akwiliile kigalogola.
5 Lino kwa kiiva ya muunu uyo,
nikiyisufya.
One nisikiyisufya shina nishwali,
leelo nikiyisufya kwa kiiva ya wuwoto wangu.
6 Hata nda naali nive nisakula kiyisufya,
ndi nisaava muyasu,
kwa kiiva naava niiva nilogola ga shiyooli.
Lino nikiyisivila kiyisufya,
baheene umuunu yoyoona asikhaniwonaga kiija one nifwaya mandu,
kishila gina vikigaaga na kigapulikha kihuma kunyangu.
7 Leelo,
kiija nisikhayisufyaga mandu ulwa wugubutulo uwa kiswiga gina uMutwa uYeesu wániwonensa,
napeelwa amalava gina gali ngaja limfwa mu muvili gwangu.
Umwanandeje wa Shetaani afiliikhwe kinilafya,
baheene nisilaave niyisufye mandu.
8 Namufuunya uMutwa uYeesu mala khatatu,
kiija aniwuuse mu malava ago.
9 Leelo umwene wánijovela wáaja,
“Ulusungu lwangu lukwiliile,
kwa kiiva mu wuwoto mumwene muna ingufu sangu siwonekha.”
Mu ilyo,
nisiive nikiyisufya kwa wushendeefu wukhome ulwa wuwoto wangu,
kiija ingufu isa Kilisito siwoneshe kishilila one.
10 Ndeeno nina wushendeefu ulwa wuwoto,
kiligwa,
kiiva mu malava,
kilafisiwa na kiiva mu makhamu kwa kiiva ya Kilisito,
kwa kiiva pina nili mu wuwoto,
baheene niiva ni ngufu.
Umuninu gwa Pawulo kwa Vakolinto
11 Lino,
nilogola ngaja muyasu,
leelo omwe yuumwe mwanikhamiilisa nilogole ndeeno.
Kiiva omwe mukhandi mwisakulwa kinisufya,
kwa kiiva hata nda niwonekha nisifwaya,
one nisili mwanandeje munangʼana kishila vina omwe mukivajova “vanandeje vakhome.”
12 Uluhaavi luna nikhandi kunyeenyu,
nikhandi nu lugugumilo na kigaha amabikha,
amiitu ni fimanyilo fina fiwonekha kiija one nili mwanandeje.
13 Kusiina shoshoona shina naagaha ku fipuga ifinji ifya vahuvililaaji,
shina nisigahile kunyeenyu.
Pamonga yingava navananjilaga one pina nisikhandi musigo kunyeenyu ugwa kinisunga kwa fina nisakula.
Nda uwo wuweene wunansi wangu,
nilomba munisaajile!
14 Lino niyipinyanjile kiyinsa kunyeenyu ulwa wutatu,
leelo nisikhava musigo kunyeenyu.
Nisigeene ifiinu fyenyu,
leelo nikivasakula yuumwe.
Nilogola ilyo,
kwa kiiva avaana vasisakulwa kivishilisa ifiinu five fya vasafi vaanave,
leelo avasafi visakulwa kivishilisa ifiinu,
baheene paanyuma five fya vaana.
15 One nina wushendeefu kihumya ifiinu fyangu na kiyihumya yuune,
kivatanga omwe.
Leelo lino yiwonekha kiija,
pina one niishila mandu kivagana omwe,
baheene omwe mwishila mandu kilekha kinigana one.
16 Hata nda muyiitishe kiija nisikhandi musigo kunyeenyu,
leelo avanji mu omwe viijova,
“UPawulo musugu,
wávagahila kwa wusugu.”
17 Wuli,
navagahilaga kwa wusugu,
baheene nitoole shoshoona kunyeenyu kishilila avaanu vina navafilikhaga?
18 Namulombaga uTito nu muhuvililaaji muyeesu uyunji,
kiija ayinse kunyeenyu.
Wuli,
uTito wátoolaga shiinu shoshoona kunyeenyu?
Mbona amahiiva ni numbula seesu one nu mwene fihwaneene mu nsengo seesu,
khanji nasi njendo seesu sihwaneene!
19 Pamonga muhiiva kiija uluhaavi loona ulu tikiyisaajila yuuse panyeenyu!
Leelo tilogola aga pa Nguluvi,
pina tipilungeene nu Kilisito.
Vagani veesu,
aga goona tiigaha kwa kiiva ya kivajinia omwe mu lihuuvi.
20 Lino nitiila kiija,
uluhaavi luna nikhayinsa kunyeenyu,
nikhavaaga muna njendo imbi sina nisikisishendeevela.
Ilyo,
likhanihonsa nigahe gina omwe musikhashendeeva.
Nitiila kiija nikwiliile kivaaga muna libaatu,
uwiifu,
inkhalasi,
mupungeene,
mudehelana,
musenkhana,
mukiyisufya na mungaya lugoto wala musipulinkhana.
21 Khanji nitiila pina nikhayinsa kunyeenyu,
uNguluvi wangu akhanigaha niwone nsoni kunyeenyu.
Nikhasugumilwa kiwona avaanu vinshi munyeenyu vina vatalaga kigaha uwunansi,
vasinalambiisile.
Nikhasugumilwa kiwona vapili mu waafu,
uwushemi,
nu wupafu uwuvi wuna vakhandi vanawo.