2 Vakolinto 11

UPawulo na vanandeje ava wudehi

1 Leelo, hata nda nive nilogola ngaja muunu muyasu, nilomba munipuliise. 2 One nikivawifushila omwe ngaja uNguluvi shina ikivawifushila, kiiva muli ngaja umuhinja yuna asimumeenye umugoosi, yuna namutawulaga kiija atoolwe nu mugoosi yumo yuna namuletelaga. Umugoosi uyo yu Kilisito. 3 Lino leelo, nitiila, kiija na yuumwe musilaave mujangwe, ngaja injokha shina yamujangaga uHawa kwa wusugu waakwe, muwuleshe uwugolofu nu lugano lwenyu ulwa shiyooli kwa Kilisito. 4 Nilogola ndeeno, kwa kiiva omwe muli vapeefu kimuposheela umuunu yuna iyinsa kivakhoma ulwa Yeesu yuna ali paayo na yula yuna tavakhomaga, yuna ose tisikhamukhomile. Khanji, mwiposheela ulwa mamanyiso aga Numbula wa Nguluvi, awu imola isinji, sina musikhaposheelile kihuma kunyeesu.

5 Lino, one nisikiyiwona kiija nili munangʼana kishila awo vina vikiyiwona “vanandeje vakhome.” 6 Hata nda nive niwonekha nisilogola wunofu, uwumanyi wangu wukhome. Tawonensa ilyo kunyeenyu uluhaavi loona na kwa nsila soona.

7 Wuli, nagahaga fivi kiyiyiisa na kivasufya omwe kwa nsila ya kikhoma iMola iNofu iya Nguluvi kunyeenyu bila kihombwa? 8 Uluhaavi luna nikhandi nisenga insengo kunyeenyu, nikhandi niposheela umutango kihuma ku fipuga ifinji ifya vahuvililaaji va Yeesu. Kigaha ndeeno, nikhandi ngaja niipokha ifiinu fyanave, kiija nivatanje omwe. 9 Uluhaavi luna nikhandi lumo noomwe, nisikhandi nikimuhuviilila muunu kiija, asinipeele shoshoona pina nikhandi nishepushiilwe, kiiva avahuvililaaji vayeesu ava ku nyi ya Makedoniya, vanipeelaga ifiinu fina nikhandi nishepushiilwe. Kwa ilyo, nikhandi nikiyivavala, kiija nisikhavahuvililaji omwe hata padoodo, kiija munipeele fina nishepushiilwe. Khanji hambi nikiyivavala mandu. 10 Nilogola kwa shiyooli isha Kilisito shina shili mu numbula yangu, kusiina umuunu yoyoona mu nyi yoona iya Akaya, yuna anganisivila kiyisufya, ulwa mola iyi. 11 Kwashi nilogola ndeeno? Kiiva nisivageene omwe? UNguluvi ameenye kiija nivageene!

12 Nikhayitenekha kigaha ngaja shina niigaha lino, baheene avanandeje awo vina vikiyiwona kiija aveene vakhome, vapootwe isha kiyisufya kiiva viigaha ngaja ose. 13 Avaanu ngaja awo, vanandeje va wudehi khanji vavanda vamyansi, vikiyihwananisa kiiva ngaja vanandeje va Kilisito. 14 Mu ilyo tisiswiga, kwa kiiva woope uShetaani yumwene ikiyihwananisa kiiva ngaja malayikha wa mu wuvalafu. 15 Khanji tisiswiga pina avasenga nsengo vaakwe woope, vikiyihwananisa kiiva ngaja vavanda vagolofu. Kuwudugo waanave, vakhaposheela amalava ga njendo saanave imbi.

UPawulo ikiyisufya ulwa malava gaakwe

16 Nikivajovela khanji niija, umuunu asikhahiivaga kiija one nili muyasu! Leelo hata muve mwijova kiija nili muyasu, nikivalomba munipuliise, baheene na yuune niyisufye padoodo. 17 Amaswi gina nilogola lino ga kiyisufya, nisilajisiiwe nu Mutwa uYeesu, leelo nilogola ngaja muunu muyasu. 18 Kiiva vinshi vikiyisufya kwa njowo sa mu nyi, na yuune nisiyisufye. 19 Omwe mukiyiwona muna wumanyi, lulwene mukivagugumila na kivayiitikha kwa wushendeefu, avaanu avayasu. 20 Mukimugugumila na kimuyiitikha hata umuunu yuna ikivaviikha mu wuvanda, iiva ngaja ikivahiijila na ikivajanga, khanji ikiyitupikha, ikivaliga na kivasala. 21 Niiwona nsoni kilogola kiija, ose tikhandi vawoto, tisikhagahile ago.

Lino nilogola ngaja nili muyasu, nda akwali umuunu yuna iijesa kiyisufya kwa shoshoona, na yuune niijesa kiyisufya. 22 Nda aveene Vahebulaniya, na yuune nili Muhebulaniya. Nda aveene Vaisilaheli, na yuune nili Muisilaheli. Nda aveene shisafi sha Abulahamu, na yuune nili shisafi sha Abulahamu. 23 Lino lekha nilogole ngaja nilulungeene uluhala. Nda vikiyisufya viija aveene vavanda va Kilisito, na yuune nili muvanda wa Kilisito kivashila aveene. One nijimbile mandu kisenga insengo, nidindiilwe mu shifungo mala nyinshi, nikhandi mu malava nkholeela na kiifwa mala nyinshi, khanji nitoviilwe mandu. 24 Nitoviilwe na Vayahuudi kwa majalidi mashumi gatatu ni gonja, nagahilwagwa ndeeno mala sisaanu. 25 Nikhatoviilwe ni nkwegu mala khatatu, nihudiilwe na mangʼanga gwalimo, ishipugo shininanjishiile mala khatatu, khanji nikhakheele mu bahali ishilo ni shiminsi. 26 Wiila pina nikhandi nishuula, nikhandi mu hataali ya kingʼaba mu makhoga, kiyalushilwa na vayalushilaaji, kitowa na Vayahuudi vayangu na vaanu vina vasili Vayahuudi. Nikhandi mu hataali sa mu majumbi na mu mahakha, mu bahali na kilafisiwa na vina vikiyiviikha ngaja vahuvililaaji vayeesu, humbe vadehi. 27 Nasengaga insengo nkhamu na kilava, mala nyinshi nagonaga meeho, nalavaga ni njala ni nkhawu, mala nyinshi nikheele bila shakiilya, na kikhala mu mepo bila menda. 28 Lumo na ago goona, wiila niilava pina nihiiva insengo sangu isa fipuga fyona ifya vahuvililaaji va Yeesu. 29 Umuunu yumo nda muwoto, na yuune nikiyiwona muwoto, umuunu uyunji nda vamupinse mu wunansi, one nilemala na kikhalala.

30 Nda yisakulwa kiyisufya, nikiyisufisa ulwa wuwoto wangu. 31 UNguluvi, uDaada wa Mutwa uYeesu, yuna isakulwa kitupikhwa shiluta, ameenye kiija nisilogola wudehi. 32 Pina nikhandi ku lijumbi lya Damesiki, umulongosaaji yuna akhandi ilongosa mu wutwa wa mutwa uAleta, akhaviishile avayimililaaji pa fikwilo ifya lijumbi ilyo, kiija vanikhate. 33 Leelo kukhandi kuna vaanu vamonga vaniviikha mu litunduti ilikhome, vanishisa pa ndwi ku luhengo luna lukhandi lupiliime ilijumbi, napoola nakulukha kikhatwa.