UPawulo ikivagomosesa vina vikimusala
10
1 Lino,
one Pawulo yuna niwonekha nili muhuugu pina nili lumo noomwe,
leelo niwonekha nili mukhali pina nili kutali noomwe,
nikivalomba kwa kiyiyiisa mandu na kwa wuhuugu wa Kilisito.
2 Nilomba kiija musikhanihonsaaji nive mukhali,
pina nikhayinsa kunyeenyu.
Kiiva nikwiliile kiiva mukhali kwa vaanu woona vina vihiiva kiija,
ose tifwata injowo sa mu nyi.
3 Hata nda tive tiikhala mu nyi,
leelo tisitovana uwulugu ngaja vaanu va mu nyi.
4 Imalala sina titovanila uwulugu uwo,
sisili sa mu nyi,
leelo sina ngufu kihuma kwa Nguluvi,
sikilibojolanga ilitengule lyona ilya valugu.
5 Tikisinanganga injowo soona isa wudehi ni sa kiyisufya,
sina sikivasivila avaanu kimumanya uNguluvi.
Khanji,
tikigagalula amahiiva goona kiija,
gamutiile uKilisito.
6 Baheene pina mukhava mwamutiila khabisa,
ose tikhava tiyipinyile kivahiga woona vina vasikimutiila uKilisito.
7 Omwe mwiloleela hela gina giwonekha pa meeho geenyu.
Umuunu yoyoona yuna ikiyiwona kiija,
umwene muvanda wa Kilisito,
amanyaje kiija na yuuse tili vaanu va Kilisito,
ngaja umwene.
8 Hata nda nive nishilile kiyisufya ulwa ngufu sina uMutwa uYeesu atupeelile,
hata ndeeno nisiiwona nsoni.
Uwutawulilwa uwo wusikivananga,
leelo wukivajinia mu lihuuvi.
9 Musikhahiivaji kiija nisakula kivatungumikha,
kwa nsila ya balula sangu.
10 Niijova ndeeno kwa kiiva avanji viijova,
“Ibalula sa Pawulo sina maswi makhali,
khanji sina maswi makhamu.
Leelo pina ali lumo noose,
iiva mupeefu hela,
khanji naga maswi gaakwe,
giiva ga kisalwa.”
11 Umuunu yuna ilogola ngaja ndeeni,
amanyaje kiija gina tikivayandishila pina tili kutali,
gageene ago gina tikhagasenga pina tili noomwe.
12 Tisiijela kiyihansa mu shipuga shimo na kiyihwananisa na vaanu vina vikiyisufya.
Avaanu ava vikiyijela na vikiyihwananisa vaveene kwa vaveene,
viwonensa kiija vangaya luhala.
13 Leelo ose tisikhayisufya kishila ishijelo sha nsengo yina atupeelile uNguluvi.
Insengo iyo yiyeene yina yifishile na kunyeenyu.
14 Tisikiyisufya kishila ishijelo sha nsengo yeesu pina tilogola kwa wutawulilwa kunyeenyu,
kwa kiiva ose tikhandi va wutasi kivaleetela iMola iNofu iya Kilisito.
15 Khanji tisikiyisufya ulwa nsengo ya vaanu avanji.
Leelo tihuviilila kiija,
ngaja ilihuuvi lyenyu shina lipiyonjelela kikula,
shiisho nayi nsengo yeesu yiikula mu omwe.
16 Apo baheene tikhakhoma iMola iNofu ku nyi isinji kuna imola iyo yisikhomiilwe.
Kiiva tisigeene kiyisufya ulwa nsengo yina yisenjiilwe nu muunu uyunji mu nyi.
17 AMayandikhwa aManofu giijova,
“Umuunu yoyoona yuna isakula kiyisufya mu lujowo loloona,
ayisufyaje kwa kiiva ya Mutwa.”a
18 Umuunu yoyoona yuna ikiyisufya mwene,
uyo asiyiitikhwa,
leelo iyiitikhwa umuunu yuna isufisiwa nu Mutwa.