Umutango kwa vahuvililaaji va Yeesu ava ku Yelusalemu
9
1 Lino nigaya sha kivayandishila ulwa mutango gwenyu kwa vahuvililaaji ava ku Yelusalemu,
2 kiiva nimeenye shina muna numbula iya kivatanga avanji.
One nikhavasufiise omwe pa vahuvililaaji ava ku nyi ya Makedoniya kiija,
ishipuga sha vahuvililaaji ava ku nyi ya Akaya,
vakhandi vayiyandaalile kihumya umwakha guna gwashilaga.
Lino inumbula yeenyu iyo,
yivahonsiise avaanu vinshi mu veene kiiva ni numbula ya kihumya.
3 Ndeeno,
navafilikha avahuvililaaji vayeesu ava,
baheene mugahe ngaja shina navasufyaga kwa vaanu ava ku Makedoniya.
Niigaha ndeeno kiija,
gina tavajovelaga ulwa omwe gasikhawonekhaga kiija tikhandi tikivasufya bule.
4 One nda nikhawona musiyiyandaalile pina nikhayinsa ukho lumo na vaanu vamonga ava ku Makedoniya,
apo mukhava mwatuyegula kwa kiiva tavahuvililaga bule.
Khanji na yuumwe musiyegushe mandu.
5 Ndeeno naawona kiija,
yisakulwa nivalombe avahuvililaaji vayeesu ava,
valongole kiyinsa ukho,
baheene vamanye nda ifiinu fina mwatahisaaga kihumya,
fiyandaale.
Mu ilyo,
musiive mwayihumya kwa numbula mbalafu,
kiiva kusiina umuunu yuna asiive wávakhamiilisa.
Kihumya isadaakha kwa numbula mbalafu
6 Muveesaje nu luuju kiija,
“Umuunu yuna ivyala fisheefu,
ikungula fisheefu,
yuna ivyala finshi,
ikungula finshi.”
7 Shila muunu atawulaje ngaja shina alamwile yumwene,
asikhatawulaga kwa kikhamilisiwa na kingʼuula,
kwa kiiva uNguluvi ikimugana umuunu yuna itawula kwa numbula mbalafu.
8 Baheene uNguluvi akwiliile kivayimiilila mu minshi,
kiija uluhaavi loona muve ni fiinu fyona fina mwisakula.
Baheene muve vaanu vina visenga amanofu minshi ga kivatanga avanji.
9 Ngaja shina yiyandiikhwe mu Mayandikhwa aManofu kiija,
“Wáahumya kwa numbula mbalafu kivapeela avapiina,
ulusungu lwakwe lwa wiila.”a
10 UNguluvi yumwene yuna ikimupeela umuunu imbeyu iya kivyala nu mukhaate ugwa kiilya,
akhavapeela omwe imbeyu iya kivyala na kivayonjelesa.
Lulwene kiija,
akhavapeela na kivayonjelesa inumbula ya lusungu.
11 UNguluvi iiva ikivapeela uwusi mu goona,
kiija muve nu lusungu ku vaanu nsiku soona.
Mu ilyo,
avaanu vakhava vikimuhonjesa uNguluvi,
kwa kiiva ya fiinu fina tikivatwalila kihuma kunyeenyu.
12 Insengo iyi yina mwisenga,
yisikivatanga avahuvililaaji veene hela vina vashepushiilwe,
leelo yikivagaha avaanu vinshi vamuhonjese mandu uNguluvi.
13 Insengo iyo yiwonensa kiija,
omwe muli vavanda vanofu,
mu ilyo avaanu vikimusufya uNguluvi.
Vikimusufya kwa kiiva ya wuyinatilo weenyu uwa kihuviilila iMola iNofu iya Kilisito pa vaanu.
Khanji vikimusufya pina vikilwaga ulusungu lwenyu kwa nsila ya kihanga ifiinu fyenyu lumo nawo na vanji woona.
14 Baheene vakhava vikivafuunyila kwa Nguluvi kwa numbula yoona,
kwa kiiva ya lusungu lukhome luna uNguluvi avapeelile omwe kwa winshi.
15 Timuhonjesaaje uNguluvi kwa kiiva ya shipeelwa shaakwe,
shina usikwiliile kishitaviilila shina yisakulwa.