Amapavilo aga wudugo ni nyunjila
13
1 Ulushuulo ulu lwiva lwa wutatu one kiyinsa kunyeenyu.
AMayandikhwa aManofu giijova,
“Vaveesaje vakwali avalunjikhaaji vavili awu vatatu ava kilunjikha shila shiinu.”a
2 Pina nikhayinsile kunyeenyu ulwa wuvili nikhavajoveele kiija,
pina nikhayinsa nisikhavasungupila avaanu vina vagahile uwunansi.
Lino nikivajovela ilyo khanji kiija,
nisikhavasungupila awo na vanji woona.
3 Nisiigahe ilyo,
kwa kiiva mwisakula ishimanyilo isha kimanya,
nda uKilisito ilogola kishilila one.
UKilisito asili muwoto,
leelo ana ngufu,
yumwene yuna isenga insengo mu omwe.
4 Hata nda uKilisito akhandi muwoto pina ikhomeelelwa na kiifwa pa musalaaba,
leelo lino muumi kwa ngufu sa Nguluvi.
Shiisho ndeeno na yuuse tili vawoto kwa kiiva tilungeene nu Kilisito,
leelo mu ngufu isa Nguluvi tikhava wuumi lumo nu Kilisito,
na mu ngufu iso tikhavawulanisa.
5 Lino yisesaaji yuumwe,
baheene mumanye nda muna lihuuvi.
Wuli,
musimeenye kiija,
uYeesu Kilisito ali mukhati yeenyu?
Nda uKilisito akwasiina mukhati yeenyu,
apo mwagombola.
6 Leelo nihuviliile kiija omwe mumeenye kiija,
ose tisigombwele.
7 Lino tikivafuunyila kwa Nguluvi kiija,
musikhagahaji uwunansi.
Lusili kiija tisakula tiwoneshe tifwaya,
leelo ose tisakula mugahe amanofu,
hata yive tiwonekha ngaja tagombola.
8 Kiiva tisikwiliile kishisivila ishiyooli,
leelo tiyitenekhaje kikhoma ishiyooli.
9 Tishendeeva kiija ose tili vawoto,
leelo omwe muna ngufu.
Ndeeno tikimufuunya uNguluvi,
avajinie mu lihuuvi.
10 Nikivayandishila amaswi aga pina nisinayinse,
kiija pina nikhava kunyeenyu,
nisikhayikhamilisaaga kiiva mukhali kunyeenyu,
kwa kigahila uwutawulilwa wula,
wuna wánipeelaga uMutwa.
Kiiva uMutwa uyo asinipeelile uwutawulilwa wa kivananga,
leelo uwa kivajinia mu lihuuvi.
Amaswi aga kihwesania
11 Lino vahuvililaaji vayangu,
shendeevaji,
muveesaje vagolofu khabisa,
muyishilisaniaje inumbula seenyu,
muveesaje shipuga shimo,
khanji khalaji kwa wulindamafu.
Nikimulomba uNguluvi yuna ikivapeela ulugano nu wulindamafu,
ave lumo noomwe woona.
12 Hunjilanaji kwa lugano lwa Yeesu Kilisito.b
13 Avahuvililaaji woona vina vali kuno,
vikivahunjila.
14 Imota ya Mutwa uYeesu Kilisito,
nu lugano lwa Nguluvi,
na kiiva shipuga shimo nu Numbula uMunofu,
yive lumo noomwe woona.