Insengo ya Pawulo
4
1 Ino,
kwa kiiva uNguluvi mu mota yaakwe atupeelile insengo iyi,
tisiyoolopwa.
2 Tikhaanile khabisa kisenga aga wufiho gina gana nsoni,
hata kivajanga avaanu,
na kihansinkhania iLiswi lya Nguluvi nu wudehi.
UNguluvi ameenye kiija tiijova ishiyooli bahawuvalafu,
baheene avaanu woona vamanye mu numbula saanave kiija,
tili va shiyooli.
3 Leelo nda iMola iNofu yina tikiyikhoma yisiviilwe yisimanyikha,
yikhava yisiviilwe kwa vina viiyaga.
4 Yisimanyikha kwa kiiva uShetaani umutwa umuvi wa nyi iyi,
avagubiishe uluhala lwa vina vasikimuhuviilila uYeesu,
baheene vapootwe kiloleela uwuvalafu wa Mola iNofu ya wutupikho wa Kilisito,
yuna shihwano sha Nguluvi.
5 Ose tisiyalaalisa imola seesu,
leelo tiyalaalisa kiija uYeesu Kilisito yumwene Mutwa,
na ose tili vavanda veenyu kwa kiiva ya Yeesu.
6 UNguluvi yuna wájovaga,
“Uwuvalafu wumulishe mu nshiisi,”
a yumwene yuna ikitupeela kimanya mu numbula seesu na kitugaha kimanya uwutupikho waakwe,
wuna wingʼaala pa weeni wa Yeesu Kilisito.
7 Ose vina tipeliilwe uwuvalafu uwo,
tili ngaja nkhonkholo sa lilongo sina sibojokha,
baheene yimanyishe kiija,
ingufu inkhome isa kisenga insengo iyo sisili seesu,
leelo siihuma kwa Nguluvi.
8 Gikitupata amalava paayo paayo,
leelo tisigombola.
Tiiva nu muninu,
leelo tisiyoolopwa.
9 Avaanu vikitulafya,
leelo uNguluvi asikitulekha yuuse duguli,
vikitukhanyisa,
leelo tisiifwa.
10 Insiku soona tili mu hataali ya kiifwa ngaja uYeesu,
baheene uwuumi wa Yeesu wuwoneshe mu mavili geesu.
11 Lulwene kiija,
ose vina tili wuumi,
uluhaavi loona tili mu hataali ya kiifwa kwa kiiva ya Yeesu,
baheene uwuumi waakwe wuwoneshe mu mavili geesu gina giifwa.
12 Lino,
ose tili mu hataali ya kiifwa,
mu ilyo,
omwe mwipata uwuumi.
13 Mu Mayandikhwa aManofu yiyandiikhwe kiija,
“Namuhuvililaga uNguluvi,
lulwene nakhomaga iliswi lyakwe.”
b Shiisho ndeeno,
na yuuse tikimuhuviilila uNguluvi,
lulwene tiikhoma.
14 Tilogola ilyo kwa kiiva timeenye kiija,
uNguluvi yuna wámufyusaaga uMutwa uYeesu,
akhatufyusa na yuuse,
kwa kiiva tilungeene nu Yeesu.
Umwene akhatuviikha pamwene,
lumo noomwe.
15 Lino amalava goona tiyanushila kwa kiiva ya omwe,
baheene imota ya Nguluvi yivafishile avaanu vinshi,
vina vakhamuhonjesa mandu uNguluvi.
Mu ilyo,
uNguluvi akhayitenekha kitupikhwa.
Uwutupikho wa shiluta
16 Ndeeno tisiyoolopwa,
hata nda amavili geesu gisakhala,
leelo mukhati yeesu uNguluvi ikiyitenekha kituwumba wupya,
shila lisiku.
17 Tisiyoolopwa,
kwa kiiva amalava geesu mapeefu,
khanji ga luhaavi lufupi hela.
Amalava ago,
gikituyandaalila uwutupikho wa shiluta.
Uwutupikho uwo wukhome mandu,
wukitugaha kiloleela amalava aga,
kiija gasili shiinu.
18 Ndeeno ifiinu fina fiwonekha,
fya luhaavi lufupi hela,
leelo fina fisiwonekha,
fya shiluta,
lulwene tikifituna ifiinu fina fisiwonekha.