5
1 Timeenye kiija,
amavili geesu ngaja fiyumba fya luhaavi lufupi,
mu nyi muno.
Leelo pina fyananjikha,
uNguluvi akhatupeela inanda sa shiluta kunyaakwe,
sina sisisenjiilwe kwa mawokho ga vaanu.
2 Mu nyi iyi inumbula seesu siilava,
kwa kiiva ya ilyo tina lihaahi mandu ilya kiluta ku makhalo geesu kwa Nguluvi,
ukho uNguluvi akhatufwasa amavili amapya.
3 Nda tifwasiwe,
apo tisiiva bwinda.
4 Uluhaavi pina tishaanali tili mu mavili aga,
gina gali ngaja fiyumba fya luhaavi lufupi,
tiilava mu numbula seesu,
kwa kiiva ya kifunasiwa mu minshi.
Yisili kiija tisakula kiyaawula umuvili ugu guna gwifwa,
leelo tisakula kifwasiwa umuvili guna gusiifwa,
baheene umuvili ugu guna gwifwa,
gumilwe na guna gusiifwa.
5 UNguluvi yumwene yuna atuyandaliile ilyo,
atupeelile uNumbula waakwe uMunofu,
baheene timanye kiija,
shiyooli shilukhava.
6 Lino uluhaavi loona tina luhuviililo,
hata nda timeenye kiija,
pina tili mu muvili ugu,
tili kutali nu Mutwa.
7 Kiiva tiikhala pa nyi apa,
kwa kiyinatila ilihuuvi,
leelo yisili kwa gala gina giwonekha.
8 Shiyooli,
tina luhuviililo,
khanji tiiwona shiba tiguleshe umuvili ugu,
na kiluta kikhala nu Mutwa.
9 Ndeeno,
tive mu makhalo ga mu nyi,
awu tive mu makhalo kwa Nguluvi,
ulugulumilo lwesu luve kimushendeefya uMutwa.
10 Yili ndeeno,
kwa kiiva ose woona tikhayiima pa Kilisito na kihigwa nu mwene.
Shila muunu akhaposheela amahombo,
kwa gala gina wágahaga mu muvili gwakwe,
gave manofu awu gave mavi.
Kilinganisiwa nu Nguluvi kwa nsila ya Kilisito
11 Lino,
tijimba kivajovela avaanu kiija,
vave vikimuhuviilila uMutwa uYeesu,
kwa kiiva tiimanya kiija,
yisakulwa kimutiila umwene.
UNguluvi atumeenye wunofu shina tishwali,
one nihuviilila kiija na yuumwe mutumeenye wunofu.
12 Tisisakula kiyihala khanji kunyeenyu,
leelo tisakula kivajovela injowo isa kiyihala kwa kiiva ya ose.
Apo,
baheene musiive na maswi aga kivayankha vina vikiyihala kwa njowo sina siwonekha hela,
viilekha injowo isa mu numbula.
13 Nda tiwonekha tina lukwale,
tili ndeeno kwa kiiva ya Nguluvi,
leelo nda tiwonekha tina luhala,
apo tili ndeeno kwa kiiva yeenyu.
14 Ulugano lwa Kilisito lukitulongosa ose,
kwa kiiva tiimanya kiija,
umuunu yumo wáfwisaga kwa kiiva ya vaanu woona,
kwa kiiva ya ilyo,
avaanu woona vafwisaga.
15 Umuunu uyo,
wáfwisaga kwa kiiva ya vaanu woona,
baheene avaanu valeshe kikhala ngaja shina vageene,
leelo ngaja shina ageene uYeesu,
yuna wáfwisaga na kifyukha kwa kiiva ya veene.
16 Lino,
kihuma uluhaavi ulu,
tisimumeenye umuunu kwa nsila ya muvili.
Kwa luhaavi lumonga tikhamumeenye uKilisito kwa nsila ya muvili,
leelo lino tisimumeenye kwa nsila iyo.
17 Umuunu yoyoona nda alungane nu Kilisito,
iiva shiwumbwa shipya,
uwiikhasi waakwe uwa pawukuulu waashila,
lino uwiikhasi waakwe uwupya,
wayansa!
18 Ago goona gahumile kwa Nguluvi yuna wámufilikhaga uKilisito,
kiija atulingaanie ose nu mwene.
UNguluvi atupeelile insengo ya kivawonensa avaanu insila ya kilinganisiwa nu mwene.
19 Lulwene kiija kishilila uKilisito,
uNguluvi wáava ikivalingaania avaanu nu mwene,
ikivasaajila uwunansi waanave.
Khanji uNguluvi atupeelile insengo ya kivajovela avaanu imola iya kivalingaania.
20 Lino,
ose tisenga insengo kwa litaawa lya Kilisito.
Kishilila ose,
uNguluvi ikivakuviilisa avaanu kilinganisiwa nu mwene.
Shiisho ndeeno,
tikivalomba mandu kwa litaawa lya Kilisito kiija,
mulinganisiwe nu mwene.
21 UNguluvi wámuviikhaga uKilisito yuna angaya wunansi,
kiiva nu wunansi kwa kiiva yeesu,
baheene kwa kilungana nu Kilisito uyo,
tive vaanu vagolofu pa Nguluvi.