Avasenga nsengo va lufingo ulupya
3
1 Wuli,
muhiiva kiija tiyansiise khanji kiyisufya?
Ndaali,
ose tisili ngaja avaanu avanji vina vikivaleetela ibalula isa kiyikhoona kunyeenyu,
awu kilomba ibalula kunyeenyu isa kivakhoona ku vaanu avanji.
2 Omwe,
muli ngaja balula yina yikitukhoona ose,
yina tiyiviishile mu numbula seesu.
Shila muunu yuna iyimba ibalula iyi,
hambi iimanya kiija ose tikwiliile kisenga insengo ya Nguluvi.
3 Mwiwonekha kiija,
omwe yuumwe balula ya Kilisito,
kwa kiiva ya nsengo yina tayisenga kunyeenyu.
Ibalula iyo,
yisili ngaja ibalula yina yiyandiikhwe kwa khalaamu,
leelo yiyandiikhwe kishilila uNumbula wa Nguluvi,
yuna muumi.
Khanji musili ngaja balula yina yiyandiikhwe mu mangʼanga,
leelo yina yiyandiikhwe mu numbula sa vaanu.
4 Tiijova ago,
kwa kiiva ulo lulwene luhuviililo lwesu kwa Nguluvi,
kwa nsila ya Kilisito.
5 Yisili kiija tihiiva kiija tiigaha shoshoona kwa ngufu seesu,
leelo ingufu seesu siihuma kwa Nguluvi.
6 Umwene atugahile kiiva vavanda va lufingo lwakwe ulupya,
a ishiyanso sha lufingo ulo,
yisili ndaji ya kiyandikhwa,
leelo ishiyanso shaakwe uNumbula uMunofu.
Kiiva indaji yina yiyandiikhwe yileeta imfwa,
leelo uNumbula uMunofu,
ileeta uwuumi.
Uwutupikho uwa lufingo ulupya
7 Indaji sina sayandikhwagwa mu mangʼanga,
b sina sahonsaaga imfwa,
sayinsaga mu wutupikho wuna wingʼaala.
Ndeeno aVaisilaheli vapotwagwa kimuloleela uMusa ku meeho,
hata nda uwutupikho uwo wangʼaalaga kwa luhaavi lufupi hela.
c Nda indaji sina sihonsa imfwa sayinsaga mu wutupikho ngaja uwo,
8 lino uNumbula uMunofu asikhava nu wutupikho kishila uwutupikho uwa ndaji?
9 Nda insengo yina yiigaha avaanu kihigwa yina wutupikho,
lino insengo yina yiigaha avaanu kiiva vagolofu pa Nguluvi,
yisikhava nu wutupikho mandu?
10 Lino,
uwutupikho uwa lufingo ulukuulu wusilingaana nu wutupikho uwa lufingo ulupya,
kwa kiiva uwutupikho uwa lufingo ulupya,
wukhome mandu.
11 Nda ishiinu shina shikhandi shikwali kwa luhaavi lufupi hela,
shikhandi nu wutupikho,
apo baheene ishiinu isha luhaavi lwa shiluta,
shikhava nu wutupikho mandu.
12 Ulo lulwene luhuviililo lwesu,
ndeeno tiigaha kwa wukhangafu mandu.
13 Ose tisiigaha ngaja uMusa yuna wáyifunikhaga ku meeho kwa shitambala,
kiija aVaisilaheli vasikhaloleelaga uwudugo wa lungʼaalo.
14 Leelo aVaisilaheli vasikhageene kimanya.
Pina viyimba amataafili ga Lufingo uLukuulu,
viiva ngaja vasiviilwe ni shitambala isho.
Ishitambala isho shishaanali kiwuusiwa kwa kiiva yu Kilisito mwene duguli,
yuna akwiliile kishiwuusa.
15 Shiyooli,
mbakha lino pina viyimba amataafili ga ndaji sa Musa,
vigombola kimanya.
16 Leelo umuunu yoyoona yuna ikimusetushila uMutwa,
uMutwa ikimuwuusa ishitambala isho.
17 Lino uMutwa yumwene Numbula,
pina akwali uNumbula wa Mutwa,
kuna wuyeeshelo.
18 Lino,
ose woona vina tisifuniikhwe ku meeho ni shitambala,
tiwonensa uwutupikho wa Mutwa ngaja shilole,
shina shiwonensa ishihwano shaakwe.
UNumbula wa Mutwa yumwene ikituseetula tihwanane nu mwene.
Akhava ikituyonjelesa uwutupikho,
mbakha kifikha ku wutupikho uwukhome mandu.