2
1 Ndeeno,
nalamulaga kiija,
nisiyinsa khanji kunyeenyu kivalemasa mu numbula seenyu.
2 One nda nikivahonsa omwe kisugumilwa,
apo baheene kiija kusiina yuna ikinishendeefya,
leelo yuumwe vina nivalemeese!
3 Lulwene navayandishilaga mu balula yila kiija,
nisikhayinsa kunyeenyu,
nisaali nilemasiwe mu numbula yangu na vaanu vina vakhandi visakulwa kinishendeefya.
Shiyooli nimeenye kiija,
one nda nishendeeva,
na yuumwe woona mushendeeva.
4 Navayandishilaga ibalula kwa kisugumilwa mandu na mangʼuulo na maanyosi.
Ulugulumilo lwangu lusili kiija nikhandi nisakula kivalemasa mu numbula seenyu,
leelo nikhandi nisakula mumanye shina nivageene mandu.
Kisaajilwa kwa munansi
5 Lino umuunu yuna amulemeese uyunji mu numbula yaakwe,
asinilemeese yuune hela,
leelo avalemeese padoodo na yuumwe.
Leelo lino,
nisigeene kiluviikha ulo,
kiiva lujowo luvi mandu.
6 Amalava gina wápelwagwa umuunu uyo,
kihuma kwa vinshi kunyeenyu,
gamukwiliile.
7 Lino mwisakulwa kimusaajila na kimukhangasa umuunu uyo,
baheene asilaave asugumilwe mandu mbakha ayoolopwe khabisa.
8 Nikivalomba mumuwonense kiija,
mumugeene.
9 Ulugulumilo lwangu lwa kivayandishila ibalula yila,
lukhandi kimanya nda mukinipulikha mu goona.
10 Nda mumusaajile umuunu,
na yuune niiva namusaajila.
Nda kuna lujowo ulwa kisaajila,
nisaajila kwa kiiva yeenyu,
nayu Kilisito iimanya.
11 Tigahaje ndeeni,
baheene uShetaania asilaave atumene,
kwa kiiva taamanya uwusugu waakwe.
UPawulo mu lijumbi lya Tulowa
12 Lino,
pina naafikha mu lijumbi lya Tulowa kikhoma iMola iNofu ya Kilisito,
uMutwab wánidindulila umulyango gwa kisenga insengo yaakwe.
13 Leelo nisikhandi nu wulindamafu mu numbula yangu,
kwa kiiva nisikhamwajile kula umuhuvililaaji muyangu uTito.
Baheene nahwesa,
nawuukha kiluta ku nyi ya Makedoniya.
Kimena kwa ngufu ya Kilisito
14 Leelo tikimuhonjesa uNguluvi kiija,
kwa kilungana nu Kilisito ikitulongosa uluhaavi loona kivamena avalugu.
Khanji ikitugaha ose kiyalaalisa imola sa Kilisito imbali soona,
ngaja mununsi munofu shina guyalaalila koona.
15 Ose yuuse ngaja mununsi munofu gwa kinyaanywa nu Kilisito kwa Nguluvi,
guna gukivafishila woona vina vikulusiwa na vina viiyaga.
16 Kwa vina vikulusiwa,
umununsi ugo munofu,
gukivapeela uwuumi.
Leelo kwa vina viiyaga,
umununsi ugo muvi,
gukivapeela imfwa.
Lino yu naani yuna akwiliile kisenga insengo iyo iya kikhoma iMola iNofu?
17 Ose tisili ngaja avaanu vinshi vina vaviishile iLiswi lya Nguluvi ngaja shiinu sha kigusa.
Leelo tikilikhoma iLiswi ilyo mu wugolofu woona,
ngaja uNguluvi shina wátufilikhaga,
kwa kilungana nu Kilisito na pa Nguluvi.