1 Vakolinto 15

Kifyukha kwa Kilisito

1 Lino vahuvililaaji vayangu, nikivakumbusa iMola iNofu yina nakhomaga kunyeenyu, na omwe mwayiyanushila. Iyo yiyeene yikivagaha kiyiima mu lihuuvi. 2 Nda mwiyinatila iliswi ilyo lina navakhomaga ulwa wufyukho, apo mwipata uwukulukho. Leelo nda musiyinatila, ilihuuvi lyenyu liiva lingaya lutono.

3 Navamanyisaaga amamanyiso amakhome gina one nagayanushilaga, kiija uKilisito wáfwisaga kwa wunansi weesu, ngaja shina yiyandiikhwe mu Mayandikhwa aManofu. 4 Khanji wásiilwa, ilisiku lya wutatu wáfyukha, ngaja shina yiyandiikhwe mu Mayandikhwa aManofu. 5 Khanji wámutwiwushilaga uPetulo, baheene wávatwiwushila avanandeje vaakwe ishumi na vavili. 6 Paanyuma wávatwiwushila avahuvililaaji kishila magana gasaanu (500) ndeeni vina vakhandi lumo. Vinshi mu awo, hata lino vapili wuumi, leelo vamonga vafwile. 7 Paanyuma, wámutwiwushila uYaakobo, paanyuma wávatwiwushila avanandeje woona. 8 Kuwudugo wa vaanu woona, wánitwiwushila one yuna nili ngaja muunu yuna wáasawa uluhaavi luna lusili lulwene. 9 One nili munangʼana mu vanandeje, nisikwiliile hata kitambulwa mwanandeje, kwa kiiva nafilafyaga ifipuga fya vahuvililaaji va Nguluvi. 10 Leelo kwa mota ya Nguluvi, one nikwiliile kiiva mwanandeje. Imota yaakwe kunyangu, yiveele lutono lukhome, kwa kiiva ya mota iyo, nisenjile insengo nkhome kishila avanandeje woona. Nisigahile ago kwa ngufu sangu, leelo kwa mota ya Nguluvi yina yili lumo noone. 11 Lino one nive niikhoma awu vave vanandeje avanji vala, tiikhoma imola yiyila, khanji yiyeene yina muhuviliile.

Ulufyukho lwa vina vafwile

12 Lino, uKilisito nda iikhomwa kiija wáfyukhaga kihuma kwa vina vafwile, kwashi avanji mu omwe vikhaania kiija kusiina ulufyukho? 13 Nda kusiina ulufyukho, apo uKilisito woope asikhafyushile. 14 Khanji, nda uKilisito asikhafyushile, apo kikhoma kwesu kusiive kungaya lutono, hata ilihuuvi lyenyu lisiive lingaya lutono. 15 Mandu mu ago, ose ndi tawonekha kiija, tili valunjikhaaji va wudehi ulwa mola sa Nguluvi, kwa kiiva tilunjikha kiija, uNguluvi wámufyusaaga uKilisito kihuma kwa vina vafwile. Leelo nda shiyooli kiija vina vafwile vasikhafyukha, humbe uNguluvi asikhamufyusiise uKilisito. 16 Nilogola ndeeno kwa kiiva, nda vina vafwile vasifyusiwa, uKilisito woope asikhafyusiiwe. 17 Nda uKilisito asikhafyusiiwe, ino musinaapate shiinu shoshoona kwa kimuhuviilila uKilisito, ndeeno musiive mushaanali musinakulusiwe kihuma mu wunansi weenyu. 18 Woope vina vafwile vapikimuhuviilila uKilisito, viiva vayajile mandu. 19 Nda uluhuviililo lwesu mwa Kilisito lujelile mu luhaavi lwa kiifwa, apo baheene ndi taava vaanu va kisungupilwa kishila avaanu woona.

20 Leelo lino, ishiyooli shisheene ishi, uKilisito wáfyukhaga kihuma kwa vina vafwile, uyu yumwene wa wutasi kifyukha, paanyuma vina vafwile, woope vakhafyusiwa. 21 Ngaja shina imfwa yayinsaga kishilila kwa muunu yumo, shiisho ndeeno loope ulufyukho lwayinsaga kishilila kwa muunu yumo. 22 Ngaja shina yishwali, kwa kilungana nu Adamu, avaanu woona viifwa, shiisho ndeeno kwa kilungana nu Kilisito, avaanu woona vakhafyukha. 23 Ulugoto ulwa kifyukha lulwene ulu, uKilisito yumwene wa wutasi kifyukha, paanyuma vakhafyusiwa avaanu vaakwe pina akhatina. 24 Apo baheene wukhayinsa uwudugo wa fyona, pina uKilisito akhamutawulila uWutwa uNguluvi uDaada, pina wáwuyasilinkhania uwutwa woona nu wutawulilwa woona na vanya ngufu woona. 25 Nilogola ndeeni, kwa kiiva yisakulwa uKilisito ateme, mbakha avamene na kivaviikha avalugu vaakwe mu wutawulilwa waakwe. 26 Umulugu uwa wudugo yuna akhabudwa, mfwa. 27 AMayandikhwa aManofu giijova, “UNguluvi aviishile ifiinu fyona mu wutawulilwa waakwe.” Amaswi ago “ifiinu fyona” gasili kiija woope uNguluvi avishiilwe pansi ya wutawulilwa uwo. Ndaali, kwa kiiva umwene yumwene aviishile ifiinu ifyo, pansi ya wutawulilwa wa Kilisito. 28 Leelo ifiinu fyona pina fikhava fyaviikwa mu wutawulilwa wa Lusawo lwakwe, baheene woope uLusawo akhayiviikha mu wutawulilwa wa Nguluvi, yuna afiviishile ifiinu fyona mu wutawulilwa wa Lusawo lwakwe, kiija uNguluvi afiteme fyona.

29 Lino, avaanu vina vitwinisiwa kiiva ya vina vafwile, vihuviilila shiinu shishi? Nda vina vafwile vasifyukha hata lijuva limo, kwashi avaanu awo vitwinisiwa kwa kiiva ya vina vafwile? 30 Na yuuse kwashi tikiyiviikha mu hataali wiila? 31 Vahuvililaaji vayangu, wiila one nili mu hataali ya kiifwa. Na ishi shiyooli, ngaja shina shiyooli kiija, nikiyisufya kwa kiiva yeenyu, kwa kiiva muhanjile nu Mutwa weesu uKilisito Yeesu. 32 Nda kungaya lufyukho, kiilwa na vala vina vali ku Efeso, vina vali ngaja nkhanu inkhali, kusinipeele lutono lushi? Nda vina vafwile vasifyusiwa, lino,

“Tive tiilya, tive tiingʼwa,

kwa kiiva pamulaawu tikhafwa.”

33 Musikhajangwaji na vaanu vina viijova ndeeno, kwa kiiva “Avamanyi avavi, vinanga injendo inofu.” 34 Muveesaje nu luhala na kihiiva wunofu, musikhagahaji uwunansi. Avanji mu omwe vasimumeenye uNguluvi. Nilogola ago, kiija nivayegule.

Umuvili gwa wufyukho

35 Umuunu akwiliile kiposa kiija, “Avaanu vina vafwile, vakhafyusiwa wuli? Vakhava na mavili gina gali wuli?” 36 Amahiiva gaakho, ga shiyasu! Yuuwe owe umeenye kiija, imbeyu nda uvyale, yisikwiliile kimela nda yisifwile tangusiina. 37 Imbeyu yina wivyala, yive ya ngano awu imbeyu iyinji, iyo mbeyu hela, yisihwanana ni shimelo shaakwe. 38 UNguluvi ikiyipeela imbeyu umuvili ngaja shina isakula, shila mbeyu ikiyipeela umuvili gwakwe ugunji.

39 Ifiwumbwa fyona fina mavili, leelo amavili ago gasihwanana, amavili ga vaanu gali paayo, aga nkhanu gali paayo, aga nyuni gali paayo na ga nswi goope, gali paayo. 40 Khanji gakwali amavili aga fiinu ifya ku wulanga na mavili aga mu nyi. Uwunofu uwa mavili aga fiinu ifya ku wulanga, wuli paayo, nu wunofu uwa mavili aga mu nyi woope wuli paayo. 41 Uwunofu uwa lijuva wuli paayo, uwunofu wa mwesi wuli paayo, nu wunofu wa nondwe woope wuli paayo. Soope inondwe, shila yimo yina wunofu waakwe.

42 Ndeeno shilushwali, ulufyukho lwa vina vafwile. Ngaja imbeyu, umuvili guna gwisiilwa gwinanjikha, leelo pina gwifyusiwa, gusinanjikha. 43 Umuvili pina gwisiilwa, gwisalwa, leelo pina gwifyusiwa, gwiva nu wunofu. Pina gwisiilwa gwiva muwoto, leelo pina gwifyusiwa, gwiva guna ngufu. 44 Umuvili pina gwisiilwa, gwiva muvili gwa mu nyi, leelo umuvili pina gukhafyusiwa, gukhava muvili mupya, guna gwiwumbwa nu Numbula uMunofu. Gukwali umuvili gwa mu nyi, ndeeno gukwali hata umuvili umupya guna uNumbula uMunofu, ikiguwumba.

45 Mu Mayandikhwa aManofu yiyandiikhwe kiija, “Umuunu uwa wutasi uAdamu, wáwumbiilwe wáava muunu muumi,” leelo uAdamu wa wudugo, uKilisito, iikhala kwa Nguluvi, ikivapeela avaanu uwuumi. 46 Leelo umuvili guna gwilongola, muvili gwa mu nyi, kuunyuma gwiyinsa umuvili umupya, guna uNumbula uMunofu ikiguwumba. 47 UAdamu, muunu wa wutasi, umuvili gwakwe gwa mu nyi iyi, wáwumbiilwe kihuma mu lilongo. UKilisito, muunu wa wuvili, umuvili gwakwe guna gwafyukhaga gwa kihuma kushaanya. 48 Ndeeno, avaanu woona mu nyi vana muvili gwa mu nyi, ngaja umuvili gwa Adamu. Na vaanu woona ava kushaanya vakhava nu muvili gwa kushaanya, ngaja umuvili gwa Kilisito. 49 Ngaja shina tihwaneene nu Adamu, yuna wáwumbiilwe kihuma mu lilongo, shiisho ndeeno na yuuse tikhahwanana nu Kilisito, yuna ana muvili gwa kushaanya.

50 Lino vahuvililaaji vayangu, nilogola kiija, umuvili gwa nyama ni danda gusikwiliile kiyinjila mu Wutwa wa Nguluvi, hata shina shinanjikha shisikwiliile kiiva nu wuumi wa shiluta. 51 Puliisi, nikivajovela iliswi ilya wufiho. Ose tisikhafwa woona, leelo woona tikhahambusiwa 52 shitu gwalimo. Yikhava ngaja umuunu pina isinsiila na kidaamula ameeho. Ibalagumu ya wudugo pina yikhakhoola, vina vafwile vakhafyusiwa na kipeelwa amavili gina gasiiwola kaa. Ose woona tikhahambusiwa, 53 kwa kiiva umuvili ugu guna gwinanjikha, gwisakulwa guhambushe guve muvili guna gusinanjikha. Umuvili guna gwifwa, guhambushe guve muvili ugwa wuumi wa shiluta. 54 Ndeeno, umuvili ugu guna gwifwa na kinanjikha, pina guhambukha kiiva muvili guna gusinanjikha gwa wuumi wa shiluta, apo baheene likhava lyakwilana iliswi lina liyandiikhwe mu Mayandikhwa aManofu lina liijova,

“UNguluvi wáyimena imfwa, yaamenwa mandu!”

55 “Owe mfwa, ulumeno lwakho luli kwi?

Sili kwi ingufu saakho isa wuvafi?”

56 Imfwa, yiipata ingufu saakwe isa wuvafi mu wunansi, woope uwunansi wiipata ingufu saakwe mu ndaji. 57 Leelo tikimuhonjesa uNguluvi, yuna ikitupeela kimena kwa nsila ya Mutwa weesu uYeesu Kilisito.

58 Lino vahuvililaaji vayangu vagani, mujinaje mu lihuuvi ilyo, musikhayitikhaji kijanjilisiwa. Yitenekhaji wiila kisenga insengo ya Mutwa kwa ludali, kwa kiiva mumeenye kiija, insengo yina mwisenga kwa kiiva ya Mutwa, yisili kiija ya bule.