1 Vakolinto 14

Kikhoma iLiswi lya Nguluvi kukwene kusakulwa mandu

1 Jimbaji kiiva nu lugano na kidobokha mandu kiiva ni fipeelwa kihuma kwa Numbula uMunofu, mandu ishipeelwa sha kikhoma iliswi kihuma kwa Nguluvi. 2 Umuunu yuna ilogola ishilogolo ishipya, asilogola na vaanu, leelo ilogola nu Nguluvi. Kusiina yuna ikigamanya gina ilogola, kwa kiiva ilogola aga mbuusa mu numbula yaakwe. 3 Leelo yuna iikhoma iliswi kihuma kwa Nguluvi, ilogola na vaanu amaswi ga kivajinia mu lihuuvi, kivayishilisa na kivakhangasa mu numbula. 4 Umuunu yuna ilogola ishilogolo ishipya, ikiyijinia mwene hela mu lihuuvi, leelo yuna iikhoma iliswi kihuma kwa Nguluvi ikishijinia ishipuga sha vahuvililaaji. 5 One nisakula omwe woona mulogolaje kwa filogolo ifipya, leelo mandu nisakula muve mwikhoma iliswi kihuma kwa Nguluvi. Nilogola ndeeno kwa kiiva, kikhoma iliswi kihuma kwa Nguluvi kukwene kukivajinia avahuvililaaji vinshi, kishila kilogola kwa filogolo ifipya nda kusiina yuna iganula ifilogolo ifyo. Ndeeno, yuna ilogola kwa shilogolo ishipya aganulaje, kiija ashijinie ishipuga sha vahuvililaaji.

6 Lino vahuvililaaji vayangu, nda niyinse kunyeenyu na kilogola kwa shilogolo ishipya, wuli, musiipate lutono lushi? Musiipata lutono loloona. Leelo nda nivajovele gina uNguluvi wánigubutulila, awu nivapeele uwumanyi, awu nikhome iliswi kihuma kwa Nguluvi awu nimanyise, apo baheene musiipate ulutono. 7 Shilushwali na kwa fiinu fina fingaya wuumi, fina fikhoola pina fiitowa, sive ndemo, live ligombo. Nda fikhoola shaakha, umuunu akwiliile kimanya wuli kiija, luyeyemo lushi? 8 Hata ibalagumu nda yikhoole, leelo ishawuti yaakwe yisimanyikha kwa vaanu, yu naani yuna asiyipinyanje kiilwa uwulugu? 9 Shilushwali hata na kunyeenyu, nda mwilogola gina gasimanyikha, yu naani yuna akwiliile kimanya gina mwilogola? Apo gina mwilogola gasiive giiluta ni mepo.

10 Mu nyi fikwali ifilogolo finshi paayo paayo, leelo shila shilogolo shina nsengo ya kigaha avaanu vapulinkhane. 11 Lino nda nisiimanya ishilogolo shina ilogola umuunu uyunji, niiva ngaja muhensa kunyaakwe, woope iiva ngaja muhensa kunyangu. 12 Shilushwali na kunyeenyu. Mwidobokha mandu kiiva ni fipeelwa kihuma kwa Numbula uMunofu, ndeeno jimbaji mandu kipata ifipeelwa fina fiijinia ishipuga sha vahuvililaaji va Yeesu.

13 Ndeeno, umuunu yuna ilogola kwa shilogolo ishipya, isakulwa amufuunye uNguluvi, kiija amutanje kivaganulila avaanu ago gina ikigalogola. 14 Nilogola ndeeno, kwa kiiva pina nifuunya kwa shilogolo ishipya, inumbula yangu yiyeene yina yifuunya, leelo uluhala lwangu lusikivatanga avanji. 15 Lino nisakulwa kigaha shi? Nisifuunye kwa numbula kwa shilogolo ishipya, leelo nisifuunye khanji kwa luhala, nisiyeyeme kwa numbula kwa shilogolo ishipya, leelo nisiyeyeme khanji kwa luhala. 16 Nda umusufye uNguluvi kwa numbula yeene hela, pina waamala kimuhonjesa, umuunu yuna asiimanya hambi iyitishila wuli kiija, “Amina,” kuno asigameenye gina wilogola? 17 Shiyooli owe usiive ukimuhonjesa uNguluvi, leelo avanji awo gasikivajinia shiinu mu lihuuvi. 18 Nikimuhonjesa uNguluvi kwa kiiva nilogola kwa shilogolo ishipya kishila omwe woona, 19 leelo mu shipuga sha vahuvililaaji nidobokha mandu kilogola amaswi gasaanu gina gimanyikha kwa luhala, baheene nivamanyise avanji. Ilyo lilyene linofu mandu kishila kilogola amaswi magana mashumi ishumi (10,000), kwa shilogolo ishipya.

20 Vahuvililaaji vayangu, musikhahiivaji ngaja vaana, leelo hiivaji ngaja vaanu vavaha. Leelo ulwa wunansi, apo muveesaje ngaja vaana avashaali. 21 Mu Mayandikhwa aManofu yiyandiikhwe kiija,

“UMutwa iijova,

‘Nikhalogola na vaanu ava,

kishilila avahensa ava kutali,

vina vilogola kwa shilogolo ishihensa,

hata ndeeno vasinipuliisa.’ ”

22 Amaswi ago giwonensa kiija, kilogola kwa shilogolo ishipya, shimanyilo sha ngufu ya Nguluvi kwa vaanu vina vasili vahuvililaaji, yisili shimanyilo kwa vahuvililaaji. Leelo iliswi kihuma kwa Nguluvi liikhomwa kwa vahuvililaaji, yisili kwa vina vasili vahuvililaaji. 23 Lino, nda omwe shipuga sha vahuvililaaji mukungaanile mufuunya, woona mwiyansa kilogola kwa filogolo ifipya, baaho viyinjila avaanu vina vasiimanya ifilogolo ifyo awu vina vasili vahuvililaaji, wuli, vasingajova kiija muna lukwale? 24 Leelo nda woona mwikhoma iliswi kihuma kwa Nguluvi, baaho ayinse umuunu yuna asimeenye, awu yuna asili muhuvililaaji, goona gina ipulikha kihuma kwa woona gasimugahe kiwumanya uwunansi waakwe. Khanji gasimugahe kimanya kiija, isakulwa kilambiisila. 25 Amaswi aga mbuusa gina gali mu numbula yaakwe, gakhava bahawuvalafu kwa mwene, baheene akhafugama na kimutupikha uNguluvi kiija, “Shiyooli, uNguluvi ali lumo noomwe!”

Ulugoto lwa kifuunya

26 Lino vahuvililaaji vayangu, tijove shishi? Pina mukungaanile kifuunya, yumonga ana luyeyemo, uyunji ana mamanyiso, uyunji ilogola gina uNguluvi wámugubutulila, uyunji ilogola kwa shilogolo ishipya, uyunji iganula. Aga goona gasenjekhaje kwa lugulumilo lwa kijinia ishipuga sha vahuvililaaji. 27 Nda vakwali avaanu vina vilogola ishilogolo ishipya, valogolaje vavili awu vatatu, vasikhashilaga apo, valogolaje kwa kivinjilisania yumo yumo, khanji aveesaje akwali umuunu uwa kiganula gina vilogola. 28 Nda akwasiina uwa kiganula, umuunu yuna ilogola ishilogolo ishipya, asikhalogolaga mu shipuga sha vahuvililaaji, leelo alogolaje nu Nguluvi mu numbula yaakwe.

29 Woope vina viikhoma iliswi kihuma kwa Nguluvi, vakhomaje vavili awu vatatu, avanji vagasesaaje amaswi ago. 30 Umuunu yumonga mu vala vina vipuliisa, nda limuyinsile iliswi lya kilogola kihuma kwa Nguluvi, apo umuunu yuna wáava iikhoma asisimaje. 31 Kwa nsila iyo omwe woona mukwiliile kikhoma yumo yumo, baheene avaanu woona vayimanyise na kiyishilisiwa. 32 Ishipeelwa sha kikhoma iliswi kihuma kwa Nguluvi, shilongosewa na yuna iikhoma, 33 kwa kiiva uNguluvi weesu asili wa libaatu, leelo Nguluvi wa wulindamafu.

Ngaja shina lushwali mu fipuga fyona ifya vahuvililaaji, 34 pina mukungaanile omwe shipuga sha vahuvililaaji, avashimaayi vasisimaje tototo, kwa kiiva vasitawuliilwe kilogola, vave vitiila ngaja shina siijova indaji. 35 Nda visakula kimanya lujowo lumonga, vave vikivaposa avagoosi vaanave kukhaaya, kwa kiiva nsoni uwashimaayi kiyiima na kilogola pa shipuga sha vahuvililaaji. 36 Wuli, iLiswi lya Nguluvi lihumile kunyeenyu? Wuli, iLiswi lya Nguluvi liyinsile kunyeenyu yuumwe duguli? 37 Umuunu nda ikiyiwona kiija ana shipeelwa sha kikhoma iliswi kihuma kwa Nguluvi, awu ilongosewa nu Numbula uMunofu, ayitikhaje kiija, aga gina nikivayandishila, ndaji kihuma kwa Mutwa uYeesu. 38 Leelo umuunu yuna ikigasala aga, woope ave iisalwa.

39 Lino vahuvililaaji vayangu, dobokhaji mandu ishipeelwa sha kikhoma iliswi kihuma kwa Nguluvi, khanji musikhamusivilaji umuunu kilogola ishilogolo ishipya. 40 Leelo, aga goona gasenjekhaje wunofu, khanji kwa lugoto.