Ulugano
13
1 Hata naali nilogole kwa filogolo ifya vaanu ni fya vamalayikha,
leelo nda nive ningaya lugano,
niiva ngaja lyowo lya lidebe lina lingaya shiinu ni lyowo ilya fyuma fina fitunyana shaakha.
2 Khanji hata nive niikhoma iliswi kihuma kwa Nguluvi na kimanya imbuusa soona na kiiva nu wumanyi woona,
khanji nive ni lihuuvi likhome ilya kihaamya ifidunda,
leelo nda nive ningaya lugano,
nisili shiinu.
3 Khanji nda nihumye uwusi wangu woona nivapeele avapiina,
na niyihumye umuvili gwangu,
kiija gupye mu mooto,
leelo nda nive ningaya lugano,
apo nisiipata ulutono loloona.
4 Ulugano lukimugaha umuunu kigugumila,
kiiva nu lusungu,
mungaya jiila,
asikiyitumfya,
khanji iiva angaya matuupa.
5 Ulugano lukimugaha umuunu ave muyinatilaaji,
asikiyihiviilila mwene hela,
asikhalala nyangu,
hata kivishilisa inkhalasi mu numbula.
6 Ulugano lukimugaha umuunu asikigashendeevela gina gasili magolofu,
leelo ishendeevela ishiyooli.
7 Ulugano lukimugaha umuunu kigugumila mu goona,
kiiva ni lihuuvi uluhaavi loona,
kiiva munya luhuviililo luhaavi loona,
khanji kiiva mujimfu mu goona.
8 Kikhoma iliswi kihuma kwa Nguluvi,
kilogola kwa filogolo ifipya na kiiva nu wumanyi,
ifipeelwa ifi fina wudugo,
leelo ulugano lungaya wudugo.
9 Nilogola ndeeno,
kwa kiiva tigameenye masheefu,
khanji kikhoma kunyeesu iliswi kihuma kwa Nguluvi,
kusikhamiliishe.
10 Leelo uluhaavi luna lukhamiliishe lukhayinsa,
ago gina gasikhamiliishe,
gakhashila.
11 Uluhaavi pina nikhandi mwana,
nikhandi nilogola aga waana,
na kihiiva ngaja shina vihiiva avaana.
Leelo lino,
aga waana nagalekha kwa kiiva nili muvaha.
12 Shina tiloleela lino,
yili ngaja kiloleela ishiinu kwa shihwano mu shilole,
leelo paanyuma tikhayinsa kifiloleela kwa meeho shina fishwali.
Uluhaavi ulu timeenye masheefu hela,
leelo paanyuma tikhamanya mandu ngaja uNguluvi shina atumeenye ose.
13 Lino,
ifiinu fitatu ifi fisikhasila hata gwalimo,
ilihuuvi,
uluhuviililo nu lugano.
Mu fiinu ifyo,
ishiinu ishikhome kishila ifiinu fyona,
lugano.