Ifipeelwa kihuma kwa Numbula uMunofu
12
1 Lino vahuvililaaji vayangu,
nisakula mumanye wunofu ulwa fipeelwa kihuma kwa Numbula uMunofu.
2 Mumeenye kiija,
pina musikhandi mukimuhuviilila uNguluvi,
mukhandi mwijangwa na kilongosewa kigafuunya amanguluvi,
gina gasilogola.
3 Ndeeno nikivajovela kiija,
umuunu yoyoona yuna ilongosewa nu Numbula wa Nguluvi,
asikwiliile kilogola kiija,
“UYeesu ayiijilwe.”
Khanji umuunu yoyoona yuna asilongosewa nu Numbula wa Nguluvi,
asikwiliile kilogola kiija,
“UYeesu yumwene Mutwa.”
4 Fikwali ifipeelwa finshi paayo paayo,
leelo yuna itawula ifipeelwa ifyo fyona,
yu Numbula yumo yuuyo.
5 Khanji na kimusenjela uMutwa uYeesu,
kuli paayo paayo,
leelo yuna isenjelwa yu Mutwa yumo yuuyo.
6 Khanji na kisenga insengo kuli paayo paayo,
leelo yuna ikitugaha ose woona kisenga insengo iso soona,
yu Nguluvi yumo yuuyo.
7 Shila muunu apeliilwe kiwonensa bahawuvalafu insengo ya Numbula uMunofu,
kiija avaanu woona vapate ulutono.
8 Yumonga ipeelwa nu Numbula kilogola amaswi ga wumanyi,
uyunji uNumbula yuuyo ikimupeela kilogola amaswi ga luhala ulunofu.
9 UNumbula yuuyo ikimupeela yumonga ishipeelwa isha kiiva ni lihuuvi ilikhome,
uyunji ishipeelwa sha kivaponia avatamu,
10 uyunji kigaha amabikha,
uyunji kikhoma iliswi kihuma kwa Nguluvi,
uyunji kimanya uNumbula uMunofu nu numbula umuvi.
Uyunji kilogola ifilogolo ifipya,
uyunji kiganula ifilogolo ifyo.
11 Insengo soona isi,
ikisisenga uNumbula yuuyo,
khanji ikimupeela shila muunu ngaja shina ageene yumwene.
Umuvili gumo, guna filungo finshi
12 Umuvili shiinu shimo,
leelo guna filungo finshi.
Ifilungo fyona ifi,
hata five finshi,
fiiva fya muvili gumo.
Shigushwali ndeeno,
umuvili gwa Kilisito.
13 Ose woona,
tive Vayahuudi awu tisili Vayahuudi,
tive vavanda va muunu awu tisili vavanda va muunu,
woona tatwinisiwaagwa kwa Numbula uMunofu yumo na kimuposheela uNumbula uMunofu yumo,
kiija tive muvili gumo.
14 Umuvili gusina shilungo shimo hela,
leelo guna filungo finshi.
15 Iligulu nda lyali lijove,
“One nisili liwokho,
ndeeno one nisili luvala lwa muvili,”
wuli,
lisiiva lya muvili kwa kiiva ya ilyo?
16 Lyope ilikutu nda lyali lijove,
“One nisili liiho,
ndeeno one nisili luvala lwa muvili,”
wuli,
lisiiva lya muvili kwa kiiva ya ilyo?
17 Umuvili goona gwali guve liiho,
kipulikha ndi kwava wuli?
Awu umuvili goona gwali guve likutu,
kiyamba ndi kwava wuli?
18 Lino,
uNguluvi afipanjile ifilungo fya muvili,
shila shimo ngaja shina ageene yumwene.
19 Umuvili ndi gusaava muvili,
nda guve ni shilungo shimo hela.
20 Lino ifilungo finshi,
leelo umuvili guli gumo.
21 Iliiho lisikwiliile kilijova iliwokho kiija,
“Owe nisikikusakula.”
Hata umutwe goope,
gusikwiliile kigajova amagulu kiija,
“Omwe nisikivasakula.”
22 Leelo ifilungo fya muvili fina fiwonekha fiwoto,
fifyene fina fisakulwa mandu.
23 Khanji,
ifilungo fya muvili fina tihiiva kiija fisisakulwa kitiilwa,
fifyene fina tikifitiila mandu.
Ifilungo fyesu fina fihonga insoni,
ifyo fifyene tikififiha mandu,
24 ifilungo fyesu fina fisihonga insoni,
fisiifihwa ngaja ifinji.
Leelo uNguluvi agupanjile wunofu umuvili,
ifilungo fina fisitiilwa mandu,
afigahile fitiilwe,
25 baheene kusikhaveesaga na kibagunkhana mu muvili,
leelo ifilungo fyona fitanjilisaniaje.
26 Ishilungo shimo nda shilemale,
fyona filemala lumo ni shilungo isho.
Khanji ishilungo shimo nda shisufisiwe,
fyona fishendeeva lumo ni shilungo isho.
27 Lino,
omwe muli muvili gwa Kilisito na shila muunu mu omwe,
shilungo sha muvili ugo.
28 Mu shipuga sha vahuvililaaji,
uNguluvi wávaviikhaga ava wutasi avanandeje,
ava wuvili ava kikhoma iliswi kihuma kwa Nguluvi,
ava wutatu avamanyisaaji.
Kuunyuma wáviikha ishipeelwa isha kiponia avatamu,
ishipeelwa isha kivatanga avanji,
ishipeelwa isha kilongosa,
ni shipeelwa isha kilogola kwa filogolo ifipya.
29 Vasili vaanu woona vanandeje.
Vasili vaanu woona viikhoma iliswi kihuma kwa Nguluvi.
Vasili vaanu woona vamanyisaaji.
Vasili vaanu woona viigaha amabikha.
30 Vasili vaanu woona vana shipeelwa sha kiponia avatamu.
Vasili vaanu woona vilogola ifilogolo ifipya.
Vasili vaanu woona vapeliilwe kiganula amaswi aga filogolo ifyo.
31 Lino dobokhaji mandu kiiva ni fipeelwa ifikhome.
Lino tangusiina nisivajovele insila inofu mandu,
kishila insila isinji soona.