1 Vakolinto 11

1 Ndeeno munifwatanisaaje one, ngaja na yuune shina nikimufwatanisa uKilisito.

Ulugoto ulwa kifuunya mu fipuga fya vahuvililaaji

2 Nikivasufya kwa kiiva mukinikumbukha mu goona, na kigayinatila amamanyiso gina nagaposheelaga na kivamanyisa. 3 Lino nisakula mumanye kiija, umutwe gwa mugoosi yoyoona umuhuvililaaji yu Kilisito, umutwe gwa washimaayi yu mugoosi, umutwe gwa Kilisito yu Nguluvi. 4 Ndeeno, mu fipuga fya vahuvililaaji umugoosi yoyoona umuhuvililaaji, yuna ayigubiishe umutwe gwakwe pina ifuunya, awu pina iikhoma iliswi kihuma kwa Nguluvi, uyo iiva ikimuyegula uKilisito, yuna mutwe gwakwe. 5 Woope umudala yoyoona umuhuvililaaji, yuna asikiyigubikha umutwe gwakwe pina ifuunya, awu pina iikhoma iliswi kihuma kwa Nguluvi, uyo iiva ikimuyegula umugoosi, yuna mutwe gwakwe, kwa kiiva iiva ngaja umudala yuna asheetile ishipala. 6 Nda umudala asikiyigubikha umutwe, yisakulwa asheete inyele saakwe. Leelo, kisheeta inyele umudala wuyegufu, shiba agubikhaje umutwe gwakwe.

7 Pina nikhalogwele kiija, umugoosi yisisakulwa kigubikha umutwe, nikhalogwele ndeeno kwa kiiva umwene shihwano sha Nguluvi, khanji iwonensa uwutupikho wa Nguluvi. Leelo umudala iwonensa uwutupikho wa mugoosi. 8 Nilogola ndeeno, kwa kiiva uNguluvi asikhamuwumbile umugoosi uAdamu kihuma kwa washimaayi, leelo wámuwumbaga uwashimaayi kihuma kwa mugoosi. 9 Khanji uNguluvi asikhamuwumbile umugoosi kwa kiiva ya mudala, leelo wámuwumbaga uwashimaayi kwa kiiva ya mugoosi. 10 Kwa kiiva ya ilyo, khanji kwa kiiva ya malayikha, umudala isakulwa kigubikha umutwe, kiwonensa kiija wukwali uwutawulilwa pamwene.

11 Hata ndeeno, pa Mutwa uYeesu, umudala nu mugoosi, woona vihuvililana. 12 Nilogola ndeeno, kwa kiiva ngaja uwashimaayi shina wáwumbwagwa kihuma kwa mugoosi, woope umugoosi iisawa nu washimaayi. Leelo ifiinu fyona fiihuma kwa Nguluvi, yuna wáwumbile ifiinu fyona. 13 Lino lamulaji yuumwe, wuli, yifwaya umudala kifuunya kwa Nguluvi pa vaanu, ave asiyigubiishe umutwe? 14 Mbona hata ingʼoma siseene siwonensa kiija, umugoosi kiiva ni nyele inali, yiiva nsoni kunyaakwe! 15 Leelo kwa washimaayi kiiva ni nyele inali lutogo, kwa kiiva apeliilwe inyele inali, baheene sive ngaja mwenda gwa kigubikha ku mutwe. 16 Leelo nda umuunu isakula kikhaania ulwa maswi ago, wáali amanye kiija ose ni fipuga fya vahuvililaaji va Nguluvi, tisiina ingʼoma isinji.

Amapavilo aga lugoto lwa Shakiilya sha Mutwa uYeesu

17 Lino ulwa kivapeela amalajiso gina gifwata, nisikivasufya omwe, kwa kiiva pina mukungaanile mwigahilana amavi mandu, kishila kigahilana amanofu. 18 Iliswi ilya wutasi khabisa, napulikha kiija pina mukungaanile omwe shipuga sha vahuvililaaji, mwibagunkhana. Mu ago gina nagapulikhaga, gamonga nikigahuviilila. 19 Wuli, muhiiva kiija mbakha mubagunkhane? Wuli, mwisakula vamanyishe vina vifwaya pa Nguluvi? 20 Lino, pina mukungaanile musiilya iShakiilya sha Mutwa uYeesu shina yisakulwa, 21 kwa kiiva avamonga mu omwe viilya nyangu ifyakiilya fyanave, vasikivaheepa avayaanave. Ilyo likivagaha avanji kiiva ni njala, avanji kigaala. 22 Kwani! Mungaya nanda seenyu muna mukwiliile kiilya na kiingʼwa? Kwashi mukishisala ishipuga sha vahuvililaaji va Nguluvi na kivayegula vina vangaya shiinu? Nivajovele shishi? Nivasufye? Ndaali! Mu ili, nisikivasufya.

23 Amamanyiso gina nagayanushilaga kwa Mutwa uYeesu, gageene gina navapeelaga omwe, kiiva uMutwa uYeesu ishilo shila pina wádolelwagwa, wátoolaga umukhaate, 24 wámuhonjesa uNguluvi, wágumenyulania, wávajovela wáaja, “Ugu gugwene muvili gwangu, guna guhumisiwa kwa kiiva yeenyu. Mugahaje ndeeni, kwa kinikumbukha one.” 25 Vaganaga kiilya, uYeesu wáagaha khanji shishila, wátoola ikhoomasi ya divaayi wávajovela wáaja, “Idivaayi iya mu khoomasi iyi, shimanyilo sha lufingo ulupya luna lusenjekha kwa danda yangu. Gahaji shiishi, shila luhaavi pina mwingʼwa, kwa kinikumbukha one.” 26 Ndeeno pina mwilya umukhaate ugo na kingʼwelela mu khoomasi iyo, mwiva mwiyalaalisa kiifwa kwa Mutwa uYeesu mbakha pina akhayinsa.

27 Umuunu yoyoona yuna iilya umukhaate ugo, na kingʼwelela mu khoomasi iyo shina yisisakulwa, iiva agahile uwunansi, kiiva agusalile umuvili ni danda ya Mutwa uYeesu. 28 Lino shila muunu ayisesaaje mwene, baheene aliisaje umukhaate na kingʼwelela mu khoomasi. 29 Niijova ndeeno kwa kiiva, umuunu nda iilya umukhaate na kingʼwelela mu khoomasi, leelo umwene asiimanya uluganulo ulwa kihanga nu muvili gwa Mutwa uYeesu, umuunu uyo iiva ikiyileetela mwene uwuhigo wa Nguluvi. 30 Lulwene vakwali vinshi munyeenyu vina vawoto, vamonga vatamu, khanji avanji vafwile. 31 Nda taali tive tikiyiseesa wunofu yuuse, uMutwa ndi asatuhiga. 32 Leelo nda tiihigwa nu mwene, apo tiiva timanyisiwa, kiija tisilaave tihigwe na kilafisiwa ngaja shina vilafisiwa vina vasimumeenye uNguluvi. 33 Lino vahuvililaaji vayangu, pina mukungaana kiilya ishakiilya, muhepanaje. 34 Umuunu nda ana njala, atalaje kiilya tangusiina kunyaakwe, kiija pina mwikungaana, musikhahigwagwa. Injowo isinji sina sisigeele, nikhasiviikha wunofu pina nikhayinsa.