Amapavilo ulwa kilekha kimukhalasa uNguluvi
10
1 Vahuvililaaji vayangu,
nisakula mumanye wunofu kiija,
avambuyeesu uluhaavi luna vahumile ku Misili na viishila mu mbanda,
woona vakhandi vilongosewa ni lifunde,
a khanji woona vashilile paakhati naakhati ya bahali.
2 Pina valongosewaagwa ni lifunde na kishila paakhati naakhati ya bahali,
kuveene vaava ngaja vitwinisiwa,
kiiva vavanda va Musa.b
3 Woona valiisaga ishakiilya shishiimo shina shahumaga kwa Nguluvi.c
4 Khanji woona vangʼwesaga amalenga gagaamo gina giihuma kwa Nguluvi,
vakhandi viingʼwa amalenga kihuma mu lipaama lya Nguluvi.
d Ilipaama ilyo akhandi yu Kilisito yuna akhandi ijenda lumo na woope.
5 Leelo vinshi mu vaanu awo,
vakhandi viigaha gina gasikimushendeefya uNguluvi,
kwa kiiva ya ago vafwisaga,
amafimba gaanave gayalaalila mu mbanda.
6 Ndeeno,
ago goona gina gavapataga aveene gayandiikhwe,
baheene gave fihwano kunyeesu kwa kiiva ya kitupavila,
ulugulumilo tisikhadobokhaga amavi ngaja shina vakhandi vidobokha aveene.
7 Musikhafuunyaji amanguluvi ngaja avanji mu veene shina vakhandi viigaha,
ngaja shina yiyandiikhwe mu Mayandikhwa aManofu kiija,
“Avaanu vakhalaga viilya na kiingʼwa,
vaganaga kiyikuta vayiima kineena kwa kibwindunkhana.”e
8 Khanji tisikhawafukhaga ngaja avanji mu veene shina vakhandi viigaha,
mbakha vabudwagwa kwa lijuva limo avaanu magana ishumi mashumi gavili na magana mashumi gatatu (23,000).
9 Khanji tisikhamujelaga uKilisito ngaja avanji mu veene shina vagahaga,
vaalumwa ni njokha,
vaafwa.
10 Khanji musikhangʼuulaji ngaja avanji mu veene shina vagahaga,
vabudwagwa nu malayikha umubudaaji.
11 Lino ago goona gina gavapataga aveene,
shihwano hela,
na gayandiikhwe kitupavila ose vina tiikhala mu nsiku isi isa wudugo.
12 Ndeeno yuna ikiyiwona kiija,
ayiimile wunofu mu lihuuvi,
ayiyangalilaje kiija asikhagwisaga.
13 Amajelo gina vajelwagwa,
gali ngaja gina avaanu vanji viijelwa wiila.
Leelo uNguluvi muyinatifu,
umwene asivalekha mujelwe kishila ingufu seenyu.
Uluhaavi luna omwe mwijelwa,
ikivapeela ingufu isa kiyijimfilisa ni nsila ya kipoolela.
Amapavilo ulwa kiilya ishakiilya sha malungu
14 Ndeeno vagani vangu,
sigaji musikhagafuunyaji amanguluvi!
15 Nilogola noomwe vina muna wumanyi,
mulamulaje wunofu gina hambi nilogola.
16 Aasi,
pina tikimuhonjesa uNguluvi kwa kiiva ya khoomasi yila yina tingʼwelela uluhaavi lwa Shakiilya sha Mutwa uYeesu,
tisiiva tihanga mu danda ya Kilisito?
Khanji uluhaavi pina timenyula umukhaate na kiilya,
apo tisiiva tihanga mu muvili gwa Kilisito?
17 Umukhaate ugo guli gumo,
ose woona tikigulya.
Kwa kiiva ya ilyo,
ose tili muvili gumo,
hata nda tili vinshi.
18 Muloleelaje aVaisilaheli,
vina viilya shina vafunyiile pa luvala ulwa kihumisa ishadanda,
viiva shipuga shimo kimufuunya uNguluvi.f
19 Lino niijova shishi?
Wuli,
niijova kiija ifiinu fina fihumisiwa ku manguluvi fina lutono loloona?
Khanji kiija,
hata amanguluvi goope ga shiyooli?
20 Ndaali!
Leelo nilogola kiija,
ifiinu fina viihumya vina vasikimuhuviilila uNguluvi,
vasikimuhumisa uNguluvi,
leelo viihumya ku malungu.
One nisidobokha kiija,
omwe mwihanga na malungu.
21 Musisakulwa kingʼwelela ikhoomasi ya Mutwa uYeesu,
khanji kingʼwelela ikhoomasi ya malungu.
Musisakulwa kiilya iShakiilya sha Mutwa uYeesu,
khanji kiilya ishakiilya sha malungu.
22 Aasi,
tisakula kimugaha uMutwa uNguluvi ave nu wiifu?
Shiyooli,
tina ngufu kishila umwene?
Muveesaje mwisenga kwa wutupikho wa Nguluvi
23 Avanji munyeenyu viijova,
“Ifiinu fyona fiyitiikhwe kigahwa,”
leelo one niijova gasili goona gina gana lutono ku vahuvililaaji vayeenyu.
Hata nda avanji viijova,
“Ifiinu fyona fiyitiikhwe kigahwa,”
one niijova gasili goona gina gikivajinia avahuvililaaji vayeenyu.
24 Umuunu yoyoona asikhatuna kisakula ulutono lwakwe mwene,
leelo agatunaje gina gikivatanjilisa avayine.
25 Inyama sina viigusa mu munaada,
muveesaje mwilya,
musikhaposaaji kiija sihumile kwi.
Ago gasikhavalafyaji mu numbula seenyu,
26 kiiva,
mu Mayandikhwa aManofu yiyandiikhwe kiija,
“Inyi lumo ni fiinu fyona fina fikwali fya Mutwa.”g
27 Umuunu yuna asili muhuvililaaji,
nda avashemeelile kiilya,
na omwe muyiitishe kiluta,
liisaji musikhaposaaji ifiinu fyona fina avatelesheele kiija,
musikhalavaji mu numbula seenyu.
28 Leelo umuunu nda avajovele kiija,
“Ishakiilya ishi shihumisiiwe ku manguluvi,”
apo musikhaliisaji ishakiilya isho,
kwa kiiva ya muunu yuna wávajovela,
khanji kwa kiiva ya wuhigo wa mu numbula.
29 Pina nilogola,
“Kwa kiiva ya wuhigo wa mu numbula,”
nisikivajova omwe,
leelo nikimujova umuunu yuna avajoveele.
h Leelo kwashi uwuhigo wa mu numbula ya yunji,
wusivile uwuyeeshelo wangu?
30 Nda one niilya ishakiilya isho kwa kimuhonjesa uNguluvi,
kwashi nipiikhwa kwa kiiva ya fyakiilya fina nimuhonjeese uNguluvi?
31 Lino goona gina mwisenga,
mwilya,
mwingʼwa,
muveesaje mwisenga kwa wutupikho wa Nguluvi.
32 Musikhavapinsaaji aVayahuudi na vina vasili Vayahuudi hata ishipuga sha vahuvililaaji va Nguluvi.
33 Muveesaje ngaja one shina nishwali.
Nijimba kivashendeefya avaanu woona kwa njowo soona sina niigaha.
Yisili kiija niigaha ndeeno baheene nipate ulutono yuune,
leelo niigaha ndeeno,
baheene avaanu vinshi vapate ulutono kwa kipata uwukulukho.