1 Vakolinto 9

Ifiinu fina visakulwa kitanjilisiwa avanandeje

1 Aasi, one nisiyiyesheele? One nisili mwanandeje? One nisikhamwajile uYeesu uMutwa weesu? Khanji, insengo yina nagahaga one yisili yiyeene yina yivaviishile omwe kimuhuviilila uMutwa? 2 Hata nda avaanu vanji vikinyaaga kiija, nisili mwanandeje, leelo kunyeenyu one nili mwanandeje, kwa kiiva ilihuuvi lyenyu kwa Kilisito, shimanyilo shina shiwonensa kiija, one nifiliikhwe nu Mutwa.

3 Ndeeno avaanu vina vikinilogola one kiija nisili mwanandeje, nikivajovela kiija, 4 wuli, ose tisikwiliile kipeelwa ifyakiilya ni fyakiingʼwa kwa kiiva ya nsengo iyi? 5 Aasi, muhiiva kiija ose tisikwiliile kishuula na vadala avahuvililaaji, ngaja shina vishuula nawo avanandeje avanji, uPetulo na vanangʼana va Mutwa? 6 Aasi, one nu Balinaaba yuuse duguli, vina tisakulwa kisenga insengo iyinji, baheene tipate amahombo? 7 Musulukhali mushi yuna iiluta ku wulugu uluhaavi loloona, kwa lifungu lyakwe yumwene? Mulimaaji mushi yuna ivyala amasabiibu, na asiilya amakhomo gaakwe? Khanji, mudimaaji mushi yuna idiima ifidiimwa, na asiingʼwa utupyo twa fidiimwa fyakwe?

8 Amahiiva aga, ga vaanu hela. Leelo hata indaji sa Musa sitaviilila shiisho. 9 Mu mataafili ga ndaji sa Musa yiyandiikhwe kiija, “Ingʼombe pina yijenda yiikhanya ingano yisoyowola, usikhayipinyaga umulomo yigombole kiilya.” Lino, mu shihwano ishi, muhiiva kiija, uNguluvi ihiiva ulwa ngʼombe? 10 Awu akhandi ilogola ago kwa kiiva yeesu? Shilushwali! Amayandikhwa ago gakhayandiikhwe kwa kiiva yeesu! Umuunu yuna iilima umugunda, na yuna ikungula mu mugunda gula, woona visakulwa kiyihuviilila kiija, vakhapata iligawo. 11 Lino, ose taakhoma iMola iNofu kunyeenyu, ngaja umuunu yuna ivyala imbeyu sa shinumbula. Wuli, yikhava lukhamu kipeelwa ifiinu kihuma kunyeenyu ifya kitutanga mu muvili, ngaja umuunu yuna ikungula? 12 Nda avanji vakwiliile kipeelwa ifiinu kihuma kunyeenyu, lino ose, tisikwiliile mandu?

Leelo ose tisadaayaga gina tisakulwa kipeelwa noomwe, leelo tayijimfilisaaga mu goona baheene tisilaave tivasivile avaanu kihuviilila iMola iNofu ya Kilisito. 13 Aasi, musimeenye kiija vina visenga insengo mu nanda imbaagule iya kifuunyila, viilya ishakiilya shaanave kihuma mu nanda iyo? Woope vina visenga insengo pa luvala ulwa kihumisa ishadanda, viposheela iligawo kihuma mu sadaakha? 14 Khanji uMutwa alajiise shiisho ndeeno kiija, vina viikhoma iMola iNofu, vave viilya kihuma mu nsengo iyo.

15 Leelo one, nisinajelaje kidaayi hata gwalimo mu ago gina nikwiliile kipeelwa. Khanji nisiyandikha aga kiija, nipeelwe ago. Kunyangu shiba kiifwa kulikho umuunu yoyoona kinisivila one kiyihala, kwa kiiva ya kikhoma iMola iNofu pina pangaya mahombo. 16 Pina niikhoma iMola iNofu, nisikwiliile kiyihala, kwa kiiva ilyo lilyene lina nilajisiiwe mbakha nilisenje. Khanji aka, nda nisiikhoma iMola iNofu iyo. 17 Nda nive nihagwile insengo iyi, kwa kiiva nikhandi nisakula yuune, naava niiva nihuviilila amahombo, leelo lino nisakulwa kisenga, kwa kiiva uNguluvi anipeelile insengo iyi, kwa kiiva umwene akhandi isakula. 18 Lino amahombo gangu shishi? Amahombo gangu gageene kikhoma iMola iNofu pangaya kihombwa, pangaya kidaayi gina nikwiliile kipeelwa, kwa kiiva ya kikhoma imola iyi.

Gina avanandeje visakulwa kisenga

19 One nisili muvanda wa muunu yoyoona, niyiyesheele. Leelo, niyiviishile kiiva muvanda wa vaanu woona kwa kiiva ya kivatanga avaanu vinshi vamuhuviilile uKilisito. 20 Kwa Vayahuudi, nikhandi niikhala ngaja Muyahuudi, baheene nivatanje aVayahuudi vamuhuviilile uKilisito. Kwa vala vina viyinatila indaji sa Musa, nikhandi ngaja nilongosewa ni ndaji iso. Nagahaga ndeeno baheene nivatanje vina vilongosewa ni ndaji, vamuhuviilile uKilisito. 21 Kwa vina vasisimeenye indaji sa Musa, nikhandi ngaja muunu yuna asisimeenye indaji iso, baheene nivatanje vamuhuviilile uKilisito, yisili kiija, nisiyinatila indaji sa Nguluvi, leelo nikisiyinatila, kwa kiiva nilongosewa ni ndaji sa Kilisito. 22 Kwa vina vawoto, nikhandi ngaja yuna muwoto, baheene nivatanje avawoto vamuhuviilile uKilisito. Nagahaga goona kwa vaanu woona, kiija kwa nsila yoyoona nivakuluse avamonga. 23 Niigaha aga goona kwa kiiva ya Mola iNofu, kiija nihanje na vanji uluyimiililo lwa Mola iNofu iyi.

24 Musimeenye kiija avaanu vina vimenana uluvilo, woona viisiga, leelo yuna iyanushila ulutono ali yumo? Ndeeno muveesaje mwisiga mandu, baheene na yuumwe mukhayanushila ulutono. 25 Vina vimenana mu muneeno, vikiyiyandaala na kiyiyangalila amavili gaanave kwa kimenana. Viigaha ago, baheene vaposheele ulutono lwa luhaavi lufupi hela. Leelo ose tiigaha ndeeno, baheene tiyanushile ulutono luna lusinanjikha hata lijuva limo. 26 Shiisho ndeeno, na yuune nisiisiga ngaja umuunu yuna iisiga shaakha, khanji nisitovana ngaja muunu yuna itoosa kwa ngufu ingumi mwalu mwalu. 27 Leelo nikigulafya na kigumanyania umuvili gwangu kiyijimfilisa, baheene pina navakhoma avaanu iMola iNofu, one nisilaave nikhaanwe pa Nguluvi.