Ifyakiilya fina fihumisiiwe ku manguluvi
8
1 Mukhaniposiise ulwa njowo sa shakiilya shina shihumisiiwe ku mafuunyo ga manguluvi.
a Nimeenye mwijova kiija,
“Ose woona tina wumanyi.”
Leelo uwumanyi wukivagaha avaanu kiyitumfya.
Leelo ulugano lulwene luna lukivajinia avaanu mu lihuuvi.
2 Umuunu yuna ikiyiwona kiija,
ana wumanyi uwa liswi limonga,
uyo asimeenye ngaja shina isakulwa kimanya.
3 Leelo umuunu yuna ikimugana uNguluvi,
uyo yumwene imanyikha nu Nguluvi yumwene.
4 Lino ulwa kiilya ifyakiilya fina fihumisiiwe ku mafuunyo ga manguluvi,
ose woona timeenye ngaja shina mwijova kiija,
“Amanguluvi gina gigagaatilwa gasili shiinu mu nyi iyi.”
Khanji timeenye kiija,
“Akwali uNguluvi yumo hela.”
5 Hata nda fikwali ifiinu fina vikifijova manguluvi,
yive kushaanya,
awu mu nyi,
hata nda fikwali ifiinu fina vikifijova manguluvi,
yive kushaanya,
awu mu nyi,
hata nda viijova gakwali amanguluvi minshi na vanya wutawulilwa vinshi,
6 leelo kunyeesu,
akwali uNguluvi yumo hela.
Umwene Daada,
yumwene yuna wáwumbile ifiinu fyona,
na yuuse tiikhala kwa kiiva yaakwe.
Khanji akwali uMutwa yumo hela,
yumwene uYeesu Kilisito,
kishilila kwa mwene ifiinu fyona fiwumbiilwe,
khanji kishilila kwa mwene ose tili wuumi.
7 Leelo vasili vahuvililaaji woona vina vameenye ago.
Ulwamwandi vakhandi vakwali avaanu vina vavaliliile ingʼoma ya kifuunya amanguluvi.
Ndeeno,
nda valye ifyakiilya fina fihumisiiwe ku mafuunyo ga manguluvi,
fikivatinia kihiiva kiija vifuunya amanguluvi ga shiyooli.
Lino,
kwa kiiva vawoto mu numbula saanave,
vilemala mandu,
vikiyiwona kiija vanansi.
8 Leelo ishakiilya shisikituviikha tive nkholeela nu Nguluvi,
kwa kiiva hata nda tileshe kiilya,
tisishepushilwa shiinu,
khanji hata nda tilye,
tisiyonjelesewa shiinu.
9 Hata ndeeno muyivavalaje wunofu,
pina mukiwusenjela uwumanyi weenyu,
wusikhavapinsaaga avawoto vagahe uwunansi.
10 Nilogola ndeeno kwa kiiva umuunu yuna muwoto,
nda akwaje owe yuna ukiyiwona una wumanyi,
uli mu lilonjelo ilikhome wiilya ishakiilya,
wuli,
asihiiva mu numbula yaakwe kiija,
woope akwiliile kiilya na ndeeno asiyiwona kiija,
ikigafuunya amanguluvi?
11 Mu ilyo,
umuhuvililaaji muyaago yuna muwoto,
yuna uKilisito wámufwililaga,
iiyaga kwa kiiva ya wumanyi waakho.
12 Ndeeno pina mukivananjila avahuvililaaji vayeenyu kwa kivapinsa vagahe ulujowo luna viiwona kiija wunansi na kivatesa inumbula saanave,
apo musiive mukimunanjila uKilisito yumwene.
13 Lino,
nda ishakiilya shina niilya,
shikimupinsa umuhuvililaaji muyangu kigaha uwunansi,
apo nisikhalya hata lijuva limo ishakiilya isho,
kiija nisilaave nimupinse umuyangu agahe uwunansi.