1 Vakolinto 7

Amataviililo aga noolana

1 Lino, nilogola ulwa gina mwaniyandishilaga kiija, “Lunofu umugoosi kilekha kigona nu mudala waakwe.” 2 Leelo kwa kiiva ya majelo aga kigaha uwushemi, shila mugoosi ave nu mudala waakwe yumwene, na shila mudala ave nu mugoosi waakwe yumwene. 3 Umugoosi ave ikimugahila umudala waakwe ngaja shina yisakulwa, woope umudala ave ikimugahila umugoosi waakwe ngaja shina yisakulwa. 4 Umuvili gwa mudala gusili gwakwe, leelo gwa mugoosi waakwe. Khanji, umuvili gwa mugoosi gusili gwakwe, leelo gwa mudala waakwe. 5 Musikhafinyanaji, leelo nda mupulinkheene kilekha kwa luhaavi lufupi hela, kiija muyihumye kimufuunya uNguluvi. Paanyuma muwuyiilane khanji, baheene uShetaani asilaave avajele mugahe uwushemi kwa kiiva musikwiliile kiyijimfilisa.

6 Navajovela amaswi ago kivatawula hela kiija, muleshe kwa luhaavi lufupi kwa kiiva ya kifuunya, yisili kiija nisakula kivakhamiilisa. 7 Nda yaali yive lugano lwangu, naava nidobokha avaanu woona vave ngaja one, leelo lusili ndeeno, kwa kiiva uNguluvi amupeelile shila muunu ishipeelwa shaakwe, yumonga shipeelwa ishi, uyunji shila.

8 Lino, nikivajovela vina vasinatoolane na vina vafwiliilwe kiija, lunofu vasigale veene duguli ngaja shina nishwali one. 9 Leelo nda vigombola kiyijimfilisa, apo lunofu kitoola awu kitoolwa, kwa kiiva shiba kigaha ndeeno, kulikho kiiva nu wupafu wukhome wa muvili.

10 Lino nikivapeela indaji vina vatoleene. Indaji iyo yisili yangu, leelo yihumile kwa Mutwa uYeesu kiija, umudala asikhalekhanaga nu mugoosi waakwe. 11 Leelo nda valekhane, asikhatolwagwa nu yunji, nda isakula kitoolwa, shiba apulinkhane nu mugoosi waakwe na kiwuyiilana. Woope umugoosi, asikhamulekhaga umudala waakwe.

12 Lino nilogola na vahuvililaaji avanji. Amaswi aga gina nilogola mahiiva gangu, gasili gina wálogolaga uMutwa uYeesu. Nda, umugoosi muhuvililaaji atoolile umudala yuna asili muhuvililaaji, na umudala uyo ayiitishe kiyitenekha kikhala nu mwene, asikhamulekhaga. 13 Woope uwashimaayi umuhuvililaaji, nda atoliilwe nu mugoosi yuna asili muhuvililaaji, na umugoosi uyo ayitiishe kiyitenekha kikhala nu mwene, asikhamulekhaga. 14 Niijova ndeeno, kwa kiiva uNguluvi ikimuviikha umugoosi yuna asili muhuvililaaji, ave mu vaanu vaakwe, kwa kiiva ya mudala waakwe. Woope umudala yuna asili muhuvililaaji, uNguluvi ikimuviikha kiiva waakwe, kwa kiiva ya mugoosi waakwe. Nda yisili ndeeno, avaana veenyu nda vasaviikhwa kiiva vaana va Nguluvi, leelo lino uNguluvi ikivaviikha.

15 Leelo nda yuna asili muhuvililaaji isakula kilekhana nu muhuvililaaji, mulekhaga agahe ndeeno. Apo umuhuvililaaji uyo, asidindilwa mu noolana iyo. Mumanye kiija, uNguluvi atushemeelile kikhala kwa wulindamafu. 16 Owe washimaayi muhuvililaaji, usikwiliile kimanya! Pamonga umugoosi waakho akwiliile kiiva muhuvililaaji kwa kiiva ya lihuuvi lyakho. Na yuuwe mugoosi yuna uli muhuvililaaji, usikwiliile kimanya! Pamonga umudala waakho akwiliile kiiva muhuvililaaji kwa kiiva ya lihuuvi lyakho.

Shila muhuvililaaji asigale ngaja uluhaavi luna uNguluvi wámushemeelaga

17 Shila muunu akhale ngaja shina uMutwa uYeesu wámuviikhaga, khanji asigale ngaja shina akhandi ashwali uluhaavi luna uNguluvi wámushemeelaga. Iyi yiyeene ndaji yangu kwa fipuga fyona ifya vahuvililaaji. 18 Nda umuunu wáshemelwagwa nu Nguluvi pina ayinjisiiwe ijando, uyo asikhayiviikhaga ngaja asikhayinjisiiwe ijando. Khanji, umuunu yuna wáshemelwagwa nu Nguluvi pina asiyinjisiiwe ijando, uyo asikhayinjisiwaagwa ijando. 19 Uyinjisiiwe ijando awu usiyinjisiiwe ijando, kusiina lutono. Ishiinu ishinya lutono, kisiyinatila indaji sa Nguluvi.

20 Ndeeno, shila muunu asigale ngaja shina akhandi ashwali uluhaavi luna uNguluvi wámushemeelaga. 21 Nda uNguluvi wákushemeelaga uluhaavi uli muvanda, ilyo lisikhakulafyaga. Leelo nda upate insila iya kikuviikha mu wuyeeshelo, shiba ugahe ilyo. 22 Nilogola ndeeno kwa kiiva umuunu yuna akhandi muvanda uluhaavi luna uMutwa wámushemeelaga, uyo ayiyesheele kwa Mutwa. Woope yuna akhandi ayiyesheele uluhaavi luna ishemeelwa, uyo muvanda wa Kilisito. 23 Mwagulwagwa kwa lifungu likhome. Ndeeno, musikhaveesaga vavanda va vaanu. 24 Vahuvililaaji vayangu, shila muunu asigale pa Nguluvi, ngaja shina akhandi ashwali uluhaavi luna wáshemelwagwa nu mwene.

Amataviililo kwa vina vasinatoolwe na kwa vafwile

25 Lino, nikivagomosesa luna mwaniposa ulwa vahinja vina vasinatoolwe, ningaya ndaji kihuma kwa Mutwa uYeesu. Leelo nikivawulanisa kwa mahiiva gangu, one yuune yuna nili muyinatifu, kwa lusungu lwa Mutwa. 26 Ndeeno kwa kiiva kuna malava insiku isi, nihiiva kiija lunofu umuunu asigale ngaja shina ashwali. 27 Wuli, ubaanyile? Lino usikhasakulaga kilekhana. Wuli, usinabaanye? Lino usikhasakulaga kitoola. 28 Leelo hata nda witoola, usiiva wiigaha wunansi. Hata umuhinja woope nda itoolwa, asiiva iigaha wunansi. Leelo, vina vatoleene vakhava na malava ga mu nyi. One nisakula kivapavila, baheene gasikhavapataga ago.

29 Vahuvililaaji vayangu, nisakula kilogola ndeeni, uluhaavi luna lusigeele mbakha uKilisito pina akhatina, ludoodo. Ndeeno kihuma uluhaavi ulu vina vatoolile, valeshe kivahiviilila avadala vaanave hela, baheene vasengaje insengo ya Mutwa. 30 Woope vina vikhoola, vina vashendeevile, vina viigula ifiinu, 31 na vina viigaha ifiinu fya mu nyi iyi, vasikhahiivaga mandu ago, kwa kiiva inyi ngaja shina yishwali, yiishila.

32 Lino nisakula musikhaveesaga nu muninu ulwa nsengo sa wiila. Umuunu yuna asinatoole, ikiyihumya kisenga insengo sa Mutwa, ihiiva shina hambi ikimushendeefya uMutwa. 33 Leelo umuunu yuna atoolile, ikiyihumya kisenga insengo sa wiila, ihiiva shina hambi ikimushendeefya umudala waakwe, 34 amahiiva gaakwe gakhava mbali sivili. Woope uwashimaayi yuna angaya mugoosi, hata umuhinja ikiyihumya kisenga insengo ya Mutwa, baheene ave mubaagule inumbula nu muvili. Leelo uwashimaayi yuna ana mugoosi, ikiyihumya kisenga insengo sa wiila, ihiiva shina hambi ikimushendeefya umugoosi waakwe. 35 Nilogola amaswi aga kwa lutono lwenyu, yisili kiija nisakula kivasivila, leelo nisakula kivatanga. Nisakula kiija, muveesaje mwikhala ngaja shina yifwaya, muveesaje mukimusenjela uMutwa kwa numbula yoona, musikhahiivaji aganji.

36 Umuunu yoyoona yuna iiwona hambi iiva asikimugahila wunofu kimulekha umuhinja yuna amubaanyile, khanji nda amaakha gaakwe aga kitoolwa gashilile, na umuunu uyo iiwona lunofu vatoolane, agahe ngaja shina isakula, vatoolane. Apo asiiva agahile uwunansi. 37 Na umudiimi nda wálamula mu numbula kiija asitoola, na kusiina ava kimugaha asikhatoolaga, khanji akwiliile kigumena umuvili gwakwe, apo iiva wáagaha wunofu. 38 Ndeeno, yuna itoola umuhinja waakwe yuna amubaanyile iigaha wunofu. Woope yuna asitoola, iigaha wunofu mandu.

39 Uwashimaayi yuna atoliilwe, asigalaje mu noolana, uluhaavi loona luna umugoosi waakwe muumi. Leelo nda umugoosi waakwe afwe, apo iiva wáyiyeeshela kitoolwa nu muunu yoyoona yuna ikimusakula, leelo umugoosi uyo ave muvanda wa Mutwa uYeesu. 40 Leelo shiba umufwile uyo asikhatolwagwa. Ago mahiiva gangu, leelo nihiiva kiija na yuune uNumbula wa Nguluvi ikinilongosa kilogola amaswi ago.