Kisitaakhana kwa vahuvililaaji
6
1 Nda umuyeenyu yumonga ana mukhole nu muhuvililaaji muyine,
asikhajelaga kitwala umukhole gwakwe kihigwa kwa vina vasili vahuvililaaji.
Wuli,
lusili lunofu kitwala kihigwa kwa vahuvililaaji vayine?
2 Musimeenye kiija,
avahuvililaaji vaveene vina vakhavahiga avaanu woona va nyi?
Lino,
nda omwe vahuvililaaji musiihije avaanu va nyi,
kwashi mwigombola kihiga umukhole umupeefu paakhati yeenyu?
3 Musimeenye kiija mukhavahiga hata avamalayikha?
Lino nda mukhavahiga avamalayikha,
kwashi mwigombola kihiga injowo sa wiila?
4 Lino,
kwashi pina munangeene mu njowo sa wiila,
mutwala amakhole geenyu kwa vaanu vina vasili vahuvililaaji,
kwa kiiva awo vasitiilwa mu shipuga sha vahuvililaaji va Nguluvi?
5 Nilogola ndeeno,
kiija muwone nsoni.
Wuli,
munyeenyu akwasiina hata yumo umunya wumanyi,
yuna akwiliile kihiga umukhole gwenyu?
6 Leelo,
omwe muvaliliile kimusitaakha umuhuvililaaji munyeenyu pa vina vasili vahuvililaaji!
7 Kisitaakhana ukho kuwonensa kiija,
mwagombola khabisa.
Aasi,
yisili shiba kimulekha umuunu akugahile fivi awu akuposhe ifiinu fimonga?
8 Leelo lino omwe,
lulwene mwisenga fivi mandu na kipokha ifiinu,
khanji mwisenga ago kwa vahuvililaaji vayeenyu!
9 Musimeenye kiija,
avanansi vasikhayinjila mu Wutwa wa Nguluvi?
Musikhayijangaji!
Avaafu,
vina vifuunya amanguluvi,
avashemi,
vina viwafushilana vagoosi kwa vagoosi,
10 avahiiji,
avapafu va fiinu,
avagaasi,
avahomegania,
avapokhaaji,
awo woona vasikhayinjila mu Wutwa wa Nguluvi.
11 Avanji munyeenyu,
shivakhandi vashwali.
Leelo lino mu litaawa lya Mutwa weesu uYeesu Kilisito na mu Numbula wa Nguluvi weesu,
muyosiiwe uwunansi weenyu,
muvalasiiwe,
na muvasiiwe kiiva vagolofu pa Nguluvi.
Senjelaji amavili geenyu kwa kimusufya uNguluvi
12 Avanji munyeenyu viijova,
“Ifiinu fyona fiyitiikhwe kigahwa noone,”
leelo one Pawulo niijova ifiinu fyona fingaya lutono.
Avanji mu omwe viijova,
“Ifiinu fyona fiyitiikhwe kigahwa noone,”
leelo one nisiyiitikha kiiva muvanda wa shoshoona.
13 Avanji munyeenyu viijova,
“Pina tina njala tisakulwa kiilya,
kwa kiiva amavili gisakula ishakiilya.
Lumo na ago,
luyinsa uluhaavi pina uNguluvi akhaseetula amavili geesu,
gakhava gasisakula ishakiilya.”
Leelo musikhajovaji ndeeni,
pina mwisakula kiija,
yiyiitikhwa kigaha uwushemi pina tina lihaahi,
ngaja shina yisakulwa kiilya pina tina njala.
UNguluvi asikhawumbile amavili geesu kwa kiiva ya wushemi,
leelo wáwumbile kwa kiiva ya kimusenjela uMutwa,
woope uMutwa ikigayangalila amavili geesu.
14 Khanji uNguluvi akhafyusa amavili geesu kwa ngufu saakwe,
ngaja shina wámufyusaaga uMutwa kihuma mu mfwa.
15 Musimeenye kiija,
amavili geenyu filungo fya muvili gwa Kilisito?
Lino ukwiliile kitoola ishilungo sha muvili gwa Kilisito na kilunga nu muvili gwa mushemi?
Ndaali hata padoodo!
16 Musimeenye kiija,
umuunu yoyoona yuna ihanga nu mushemi,
iiva muvili gumo nu mwene.
Shiisho ndeeno shina yiyandiikhwe mu Mayandikhwa aManofu kiija,
“Vavili ava vasiive muvili gumo.”a
17 Leelo umuunu yoyoona yuna ilungana nu Mutwa,
iiva numbula yimo nu mwene.
18 Wuhegukhaji mandu uwushemi.
Mwijova,
“Uwunansi woona wuna umuunu iigaha wuli kunja ya muvili gwakwe,”
leelo one niijova umuunu yuna iwaafukha,
ikigugahila uwunansi umuvili gwakwe yumwene.
19 Lino,
musimeenye kiija amavili geenyu gageene nanda nofu ya Numbula uMunofu yuna uNguluvi wávapeelaga,
khanji iikhala mukhati yeenyu?
Lino amavili ago gasili geenyu,
leelo wusi wa Nguluvi,
20 kwa kiiva avagulile kwa lifungu likhome.
Lino mumusufyaje uNguluvi mu mavili geenyu.