1 Vakolinto 5

Uwushemi wukhaanwe mu shipuga sha vahuvililaaji

1 Shiyooli imola yipulisiishe kiija, paakhati yeenyu kuna wushemi uwa muunu kijenda nu mudala wa wiihe. Uwushemi uwo hata indaji sa vaanu vina vasikimuhuviilila uNguluvi sikhaana. 2 Wuli! Kwashi omwe mukiyitumfya? Shiba musugumilwe na kimuwuusa umuunu yula yuna iigaha ago paakhati yeenyu! 3 One hata nda nili kutali noomwe, inumbula yangu yili lumo noomwe, tayaali shi namuhiga umuunu uyo. Ilyo lilyene ndi naligaha, nda naali nive ukho. 4 Uluhaavi luna mukungaanile mu litaawa lya Mutwa weesu uYeesu, one niiva lumo noomwe shinumbula, khanji ingufu sa Mutwa weesu uYeesu siiva lumo noomwe. 5 Apo, mumuwuuse umuunu uyo mu omwe na kimulekha mu wutawulilwa wa Shetaani, baheene uwiikhasi waakwe uwa wunansi wufwe, kiija umwene akulusiwe ilijuva lina uMutwa uYeesu akhatina.

6 Kiyihala kwenyu kusifwaya. Aasi, musimeenye kiija ilihelu lidoodo hela, liwumula ilisapikhwa lyona? 7 Ndeeno muyivalase, muve muwuusa ilihelu lya pawukuulu, baheene muveesaje ngaja lisapikhwa ilipya ilya mukhaate lina lingaya lihelu. Shimushwali ndeeno, kwa kiiva uNguluvi wámuhumyaga uKilisito kiiva shadanda ngaja nyana nkholo ya shiwungo sha Pasaakha, wátukulusa. 8 Ndeeno, tisikhawungaga iPasaakha kwa lihelu lya pawukuulu, uluganulo lwakwe kigaha amavi nu wunansi, leelo tiwungaje kwa kiilya amakhaate gina gangaya lihelu, iyo yiyeene numbula mbalafu na ya shiyooli.

9 Mu balula yina navayandishilaga, navajovelaga kiija, musikhahangaji shipuga shimo na vaafu. 10 Yisili kiija, musikhahangaji na vina vasili vahuvililaaji va Nguluvi, vina vaafu, vapafu va fiinu, vapokhaaji, hata vina vifuunya amanguluvi. Nda mwamugahe ndeeno, mwamwisakulwa kiwuukha mu nyi iyi. 11 Leelo lino, mu balula iyi yina nikivayandishila nisakula kilogola kiija, musikhahangaji shipuga shimo nu muunu yuna itambulwa umuhuvililaaji muyeenyu, leelo mwafu, mupafu wa fiinu, yuna ifuunya amanguluvi, muhomegania, mugaasi, mupokhaaji. Umuunu ngaja uyo, musikhahangaji hata kiilya lumo.

12-13 Lino yisili nsengo yangu kihiga vina vasili vahuvililaaji, leelo uNguluvi yumwene yuna akhavahiga. Leelo omwe muyiitikhwa kivahiga vina vali mu shipuga sha vahuvililaaji, ngaja shina yiyandiikhwe mu Mayandikhwa aManofu, “Umuunu umunansi paakhati yeenyu, mudagaji.”