Insengo ya vavanda va Kilisito
4
1 Avaanu vatumanye kiija,
ose tili vavanda va Kilisito,
tipeliilwe insengo iya kikhoma iliswi lya wufiho wa Nguluvi.
2 Lino,
umuunu yuna apeliilwe insengo,
isakulwa ave muvanda yuna umutwa waakwe amumeenye na muyinatifu.
3 Kunyangu one,
nigaya muninu nihigwe noomwe,
hata kihigwa ni livansa lyolyona ilya vaanu.
Khanji hata one nisikiyipiikha,
4 kwa kiiva nisiihigwa lyolyona mu numbula yangu.
Leelo ilyo lisikiniviikha kiija,
one nigaya wunansi.
UMutwa uYeesu yumwene yuna ikinihiga.
5 Lino,
musikhavahigaji avaanu pina lusinaafishe uluhaavi lwakwe,
leelo heepi mbakha ilijuva lina uMutwa uYeesu akhatina.
Umwene asimulishe ifiinu fyona fina fifihiilwe ku nshiisi,
na kiwonensa gina gali mu numbula sa vaanu.
Baheene uNguluvi asivasufye woona vina visakulwa kisufisiwa.
6 Vahuvililaaji vayangu,
naajova amaswi ago goona,
ulwa kunyangu one nu Apolo kiija tive shihwano kwa kiiva yeenyu,
baheene mugamanye gina gilogolwa mu lulogolo ulu,
“Mugayinatilaje gina gayandiikhwe mu Mayandikhwa aManofu.”
Nda muliyinatile ilyo,
musiiva vaanu vina vikiyitumfya kwa kiiva ya mumanyisaaji yumonga na kimusala uyunji.
7 Wuli!
Owe ukiyiwona kiija,
wifwaya kishila uyunji?
Shiinu shishi shina unashoope shina usinapelwajwe nu Nguluvi?
Nda upeliilwe,
kwashi ukiyisufya ngaja usipeliilwe?
8 Lino,
mukiyiwona shi muyikwite!
Mukiyiwona shimuli vawusi!
Mukiyiwona shimuli vatwa,
leelo ose tisili vatwa!
Shiba mwali muve vatwa shiyooli,
baheene ose titeme lumo noomwe!
9 Leelo ose vanandeje,
niiwona uNguluvi atuviishile kiiva vaanu va kisalwa kishila woona.
Ose tili ngaja vaanu vina vahigwagwa kibudwa,
ngaja vaanu va kihekhwa mu nyi,
pa vamalayikhaa na pa vaanu.
10 Avaanu vikitwaga ose tili vayasu,
kwa kiiva tisenga insengo ya Kilisito,
leelo omwe mukiyiwona muli vanya wumanyi kwa kiiva muhanjile nu Kilisito.
Ose tiwonekha tili vawoto,
leelo omwe mukiyiwona muna ngufu.
Ose tiisalwa,
leelo omwe mukiyiwona muli vatiilwa.
11 Hata isala isi,
tina njala ni nkhawu,
khanji tingaya menda amanofu.
Tipiitowa,
khanji tingaya hata makhalo.
12 Tikiyijimfilisa kisenga insengo seesu,
kwa mawokho geesu yuuse.
Avaanu pina vikituliga,
tikivayimiilila,
pina vikitulafya,
tigugumila,
13 pina vikitudehela,
tikivayankha wunofu.
Hata lino,
avaanu vikitwaga tili nkhakhala,
khanji kwa shila muunu ose tili wushaafu.
14 Nisikivayandishila amaswi aga kiija nivayegule,
leelo nisakula kivapavila ngaja vanangu vagani,
15 kwa kiiva hata nda muna vaanu vinshi vina vikivamanyisa kihanga nu Kilisito,
uwiheenyu ali yumo.
One yuune wiheenyu mwa Kilisito Yeesu,
kwa kiiva one navakhomaga iMola iNofu.
16 Lino,
nikivalomba muve musenga ngaja shina nisenga one.
17 Ilyo lilyene lina linigahile kimufilikha uTimoteo,
umwanangu mugani,
yuna muyinatifu mu nsengo ya Mutwa.
Namufilikhaga kiija,
ave ikivakumbusa gina one niyinatila mu wiikhasi wangu uwa kimufwata uYeesu Kilisito,
wuna nimanyisa shila luvala na mu fipuga fyona ifya vahuvililaaji.
18 Lino,
vakwali avanji munyeenyu vina vikiyitumfya,
vihiiva kiija nisiyinsa khanji kunyeenyu.
19 Nda uMutwa agane,
nikhayinsa nyangu.
Apo baheene nikhamanya amaswi gina viijova awo vina vikiyitumfya,
yisili kimanya amaswi geene duguli hela,
leelo hata kimanya ingufu saanave isa lihuuvi.
20 Niijova ndeeno,
kwa kiiva uWutwa wa Nguluvib wusiwonekha mu maswi geene duguli,
leelo wuwonekha hata mu ngufu.
21 Lino,
mwisakula nigahe shishi?
Nivayinsile nu lukwegu,
awu nivayinsile mu lugano na mu wuhuugu?