Kihangusa ifiinu ifya kivatanga avahuvililaaji
16
1 Lino,
nilogola ulwa kihangusa ifiinu ifya kivatanga avahuvililaaji ava lijumbi lya ku Yelusalemu,
a mugahaje ngaja shina nafijovelaga ifipuga fya vahuvililaaji ava ku Galatiya.
2 Shila lisiku lya Nguluvi,
shila muunu munyeenyu ave ibaagula ifiinu na kifiviikha kilingana na shina apatile,
kiija pina nikhava niyinsa kunyeenyu,
muveesaje mukunganiise.
3 Uluhaavi pina nikhayinsa,
nikhavafilikha avaanu vina mwavahagulaga lumo ni balula iya kivakhoona,
baheene vatwale umuhangu ugo ku Yelusalemu.
4 Nda yifwaya na yuune nilute,
apo baheene nikhaluta lumo nawo.
Ulugoto lwa Pawulo kiluta ku Kolinto
5 Nikhayinsa kunyeenyu pina nihumile ku nyi ya Makedoniya,
kwa kiiva nisakula tangusiina kishilila ku Makedoniya.
6 Leelo pina nikhayinsa,
pamonga nikhakhala noomwe uluhaavi ulufupi awu uluhaavi loona ulwa mepo,
baheene munitanje nilute imbali sosoona sina nikhaluta.
7 Nisidobokha kiija titangaane lino kwa luhaavi lufupi,
ngaja muunu mushila nsila.
Nda uMutwa anitawule,
niilwa kikhala kunyeenyu kwa luhaavi.
8 Leelo,
nisigala ku lijumbi ilya Efeso mbakha kifikha ishiwungo sha Pentekositi.
9 Niigaha ndeeno,
kwa kiiva uNguluvi anipeelile uluhaavi lunofu ulwa kisenga insengo nkhome mu lijumbi ili,
leelo vakwali avaanu vinshi vina vikinisivila.
10 UTimoteo nda ayinse kunyeenyu,
muposheelaji wunofu,
baheene akhale wunofu asikhatiilaga,
kwa kiiva woope ikimusenjela uMutwa,
ngaja yuune.
11 Lino,
umuunu yoyoona asikhamusalaga.
Leelo mutanjilisaaji awuushe ukho kwa wulindamafu,
kiija ayinse kunyangu,
kwa kiiva one nikimuheepa lumo na vahuvililaaji vayeesu.
12 Lino,
nilogola ulwa muhuvililaaji muyeesu uApolo,
namulomba mandu kiija,
ayinsaje kunyeenyu lumo na vahuvililaaji avanji.
Leelo umwene ikhaana kiyinsa lino,
akhayinsa pina akhava wáapata imwenshe.
Inyunjila na maswi aga kihwesania
13 Muveesaje meeho na muyikhangasaaje kihuviilila iMola iNofu,
khanji jimbaji,
musikhatiilaji.
14 Insengo seenyu soona,
sengaji kwa lugano.
15 Mumeenye kiija uSitefano lumo na vaanu va mukhaaya yaakwe,
ava vaveene vakhandi va wutasi mu nyi ya Akaya kimuhuviilila uYeesu Kilisito,
woope vayihumyaga mandu kivatanga avahuvililaaji!
Vahuvililaaji vayangu,
nikivalomba mandu
16 muvatiilaje avaanu ngaja awo na vanji woona,
vina visenga lumo insengo iyi.
17 Nishendeeva mandu kivaaga uSitefano,
uFotunaato nu Akayiko,
kwa kiiva vanipeelaga umutango,
guna omwe musikhakwiliile kinipeela.
18 Vayiyishilisa inumbula yangu,
khanji vavayishilisa inumbula seenyu.
Lino muvatiilaje mandu,
avaanu ngaja ava.
19 Avaanu va fipuga fya vahuvililaaji va ku nyi ya Asiya,
vikivahunjila.
UAkila nu Pulisika,
lumo na vahuvililaaji vina vikungaana mu nanda yaanave,
vikivahunjila mandu kwa litaawa lya Mutwa uYeesu.
20 Avahuvililaaji woona vina vali panu,
vikivahunjila.
Muhunjilanaje kwa lugano lwa Yeesu Kilisito.b
21 One Pawulo,
niyandikha inyunjila iyi kwa liwokho lyangu yuune.
22 Umuunu yoyoona yuna asimugeene uMutwa uYeesu,
ayiijilwe.
Malanata!
Uluganulo lwakwe,
Mutwa weesu Yeesu uyinse!