Mataayo 2

Avamanyi va nondwe viiluta kimufuunya uYeesu

1 UYeesu wásawaagwa mu lijumbi lya Betelehemu, mu nyi ya Yudeya, mu luhaavi luna umutwa uHelode akhandi atemile. Lino mu luhaavi ulo, mu lijumbi lya ku Yelusalemu, vahumaga avamanyi va nondwe vina vahumile kunena. 2 Avamanyi va nondwe vala vavaposaaga avaanu vaajova, “Ali kwi, uMutwa wa Vayahuudi, yuna wáasawa? Taamanya kiija wáasawa, kiiva tayaaga inondwe yaakwe yihumile kunena. Lino kwa kiiva ya ilyo, lulwene tiyinsile kimufuunya.”

3 Umutwa uHelode pina wápulikhaga injowo iso, samulafyaga mandu mu numbula yaakwe lumo na vaanu woona va mu Yelusalemu. 4 Baheene wávakungaania avatambule avakhome na vamanyisaaji va ndaji sa Musa, wávaposa wáaja, “UMukulusaaji, asiisawe kwi?” 5 Woope vamugomosesa vaajova, “Asiisawe mu lijumbi lya Betelehemu, mu nyi ya Yudeya. Ago gageene gina gayandiikhwe nu mukuwamalago kiija,

6 ‘Owe lijumbi lya Betelehemu, yuna uli wa mu nyi ya Yuuda,

usili wa kisalwa hata padoodo

mu wulongosi wa nyi ya Yuuda!

Kwa kiiva umulongosaaji akhahuma kunyaakho

yuna akhavadiima avaanu vangu va Isilaheli.’”

7 Baheene uHelode wávashemeela avamanyi va nondwe vala kwa mbuusa, baheene vayinse vamutaviilile shiyooli uluhaavi luna vayaagaga inondwe yila. 8 Kuwudugo, wávafilikha ku Betelehemu, wávajovelaga wáaja, “Luti museese wunofu, mbakha mumanye kuna akwali umwana uyo. Baheene nda mumwaje, muyinse munitaviilile nyangu, na yuune nilute nimufuunye.”

9 Avamanyi va nondwe vala, vaganile kipulikha amaswi ga mutwa uHelode, vawuukha. Loleela inondwe yila yina yatalaga kiwonekha pina yidibula, yikhandi yivalongwele, yayiimaga pashaanya pina umwana yula akhandi. 10 Pina vayaagaga inondwe yila, vashendeevile mandu. 11 Baheene vayinjila mu nanda, vamwaga umwana ali nu maayi waakwe uMaliya, vafugama panyaakwe, vamufuunya. Vahudula ifiduvaji, vaahumya kwa mwana isahaabu, ifya kitinshilisa na mafuta ga kinunshilila.

12 Kuwudugo uNguluvi wávapavila mu malooto kiija, vasikhatinaga khanji kwa Helode. Vaawuya ku nyi yaanave kwa kishila insila iyinji.

Kisijila ku nyi ya Misili

13 Pina vawuukha avamanyi va nondwe vala, umalayikha wa Mutwa uNguluvi wámutwiwushilaga uYusufu mu malooto, wámujovela wáaja, “Lamukha, umutoole umwana nu maayi waakwe, musijile ku nyi ya Misili. Nikikulajisa ndeeni, kwa kiiva uHelode asiyinse kimusakula umwana uyo amubude. Lino musigalaje kukula mbakha uluhaavi luna nikhayinsa kivajovela kiija mutine.”

14 Ndeeno uYusufu wálamukha paashilo, wámutoola umwana nu maayi waakwe wáaluta ku Misili. 15 Wásigala kukula mbakha pina uHelode wáfwisaga. Goona ago gasenjekhaga ndeeno, baheene iliswi lila likwilane lina uMutwa wálilogolaga kwa nsila ya mukuwamalago waakwe kiija, “Namushemeelaga umwanangu kihuma ku Misili.”

Avaana avadiimi ava ku Betelehemu viibudwa

16 UHelode wáganaga kimanya kiija avamanyi va nondwe vala vamujanjilisa, wákhalalaga mandu. Baheene wálajisa kiija, avaana avadiimi woona kiyansa avashaali mbakha kijela maakha gavili, ava mu Betelehemu na va mu majumbi aganji gina gali mulubali, vabudwe. Wágahaga ndeeno kihuma uluhaavi lula luna akhandi ajoveelwe na vamanyi va nondwe mbakha uluhaavi luna ilamula kiija, vabudwe. 17 Ndeeno shilushwali iliswi lyakwilanaga lina uNguluvi wálilogolaga kwa nsila ya mukuwamalago uYelemiya kiija,

18 “Ishawuti nkhome yapulisikhaga mu lijumbi lya Lama.

Ishawuti iyi yikhandi ya Laheli ikivakhoolela avanaakwe,

khanji, ikhaana kisisimisiwa,

kwa kiiva avanaakwe vakwasiina khanji.”

Kitina kihuma ku nyi ya Misili

19 UHelode wáganile kiifwa, umalayikha wa Mutwa uNguluvi wámutwiwushilaga uYusufu mu malooto khanji kula ku Misili, 20 wámujovela wáaja, “Lamukha, umutoole umwana nu maayi waakwe, uwuye mu nyi ya Isilaheli kwa kiiva vala vina vakhandi visakula kimubuda umwana uyo, vafwisaga.”

21 Baheene uYusufu wáwuukha, wámutoola umwana nu maayi waakwe, vaawuya mu nyi ya Isilaheli. 22 Leelo uYusufu wápulikhaga kiija, uAlikelawo yumwene yuna ilongosa inyi ya Yudeya kipyanila pa wiihe uHelode. Kwa kiiva ya mola iso, wátiilaga kiluta kula. Baheene uNguluvi wámupavila mu malooto, wáwuukhaga wáaluta mu nyi ya Galilaya. 23 Wáaluta kikhala mu lijumbi lya Nasaleti. Ndeeno shilushwali iliswi lyakwilanaga lina uNguluvi wálilogolaga kwa nsila ya vakuwamalago kiija, “Akhava itambulwa, Munasaleti.”