UYoona iyinatila indaji ya MUTWA
3
1 UMUTWA wámujovile uYoona ulwa wuvili, 2 kiija, “Luta ku Ninaawi kula ku lijumbi ilikhome lila, uvapavile iliswi lina nakujovile!”3 UYoona wáwuushile iiluta ku Ninaawi, ngaja shishila shina wáali alajisiiwe nu MUTWA. Ilijumbi lya Ninaawi lyali likhome mandu.a Lwali lujendo lwa nsiku sitatu. 4 Wáganile kifikha uYoona wáyinjiile mu lijumbi, wájendile kihuma lwamilaawu mbakha shaamihe, apiikhoma injanga kiija, “Sisigeele insiku mashumi gana shiishi, omwe mu vaanu va ku Ninaawi uNguluvi asivabude!” 5 Avaanu ava ku Ninaawi vayitishiile iliswi lya Nguluvi, lina wávajoveele. Woope shila muunu, umunjaajila na yuna asili munjaajila, valeshile kiilya ishakiilya na kiingʼwa amalenga, vafwala amagunila. Vaagaha aga goona, ngaja shimanyilo sha kilambiisila.
6 Baheene iliswi lina wálogwele uYoona lyali limufishiile umutwa uwa ku Ninaawi, woope wálambisiile. Wáwuushile pa shitengo shaakwe isha wutwa, wáyawiile umwenda gwakwe ugwa shitwa, wáfwala iligunila na kikhala pa mafuliikho. Wáagaha aga goona kiwonensa kiija wálambiisila. 7 Umutwa wávajovile avakhaaya ava ku Ninaawi, “One ni mutwa na vatambule vangu, tiihumya indaji. Pasikhaveesaga nu muunu yoyoona, ingʼombe awu ifidiimwa fyofyona fina fidiimwa, kusiina kiilya shiinu shoshoona, wala kiingʼwa. 8 Avaanu woona vafwalaje amagunila, na fifidiimwa fyona mufifwasaaje amafwasi aga magunila. Khanji shila muunu, amufuunyaje uNguluvi kwa numbula yaakwe, aleshe inumbula imbi. 9 Maanyi! Pamonga uNguluvi angaseetula ulugulumilo lwakwe aleshe kitukhalalila na kitubuda!”
10 UNguluvi wáganile kivaaga avaanu vala vaalekha uwunansi waanave, wáleshile shina akhandi agulumiile kivabuda.