Yoona 4

UYoona ikhalala kwa kiiva uNguluvi ana lusungu

1 UYoona wákhalasiiwe pina akhaweene uNguluvi asivabudile ava ku Ninaawi, woope wákhaleele mandu. 2 UYoona wámulombile uMUTWA wájovile, “Pina nikhandi kukhaaya nahiivaga ukwiliile kivasungupila, lulwene najesaaga kisijila ku Talashiishi. Namanyaga kiija owe MUTWA uli wa wugani nu lusungu. Owe usikhalala nyangu, owe uli mwinshi wa lusungu, uli nkholeela kiseetula ulugulumilo lwakho luhaavi loloona lula usinanga. 3 Lino ee MUTWA nikikulomba umbude, niiwona shiba one nifwe.” 4 Woope uMUTWA wámugomoseese uYoona, “Shiyooli owe ukwiliile kikhalala?”

5 Pina wáali ashaanali uNguluvi asinavasungupile avaanu ava ku Ninaawi, uYoona wáhumile kunja ku lijumbi lya ku Ninaawi kulubali ulwa kunena. Wáatile wásenga ingono yaakwe, wákheele pa mumepo kuno ahepeleese shina hambi shiwonekha mu lijumbi lila. 6 UMUTWA uNguluvi wálamwile kilemfya umuyemba, baheene uYoona wápeliilwe umumepo ugwa kisheepusa amalava ga lijuva gina akhandi nago, woope uYoona wágushendeveele gula umuyemba. 7 Ilisiku lya wuvili kwaganile kihenga kunena, uNguluvi wáfiliishe imeenya yangʼengʼeene ishimelo, ishimelo shayuuma. 8 Lyaganile kidibula ilijuva, uNguluvi wáleetile ilipepo ilinya lifushe kihuma kunena. Ilijuva lyamunyaanyile mandu uYoona pa mutwe, panangʼana asilishe. UYoona wájovile, “Shiba kiifwa.”

9 Baheene uNguluvi wámujovile uYoona, “Shiyooli owe ukwiliile kishikhalalila, pina shayuuma ishimelo ishi?” UYoona wámujovile, “Ee, niigaha lunofu kikhalala hata nda nifwe!”

10 UMUTWA wámujovile, “Owe ukugulavila umuyemba guna usikhagusenjeele insengo, hata kigulemfya, gwalembaga lijuva limo na kiyuuma lijuva limo. 11 Na yuune wuli! Lusili lunofu kiyilavila iNinaawi ilijumbi lila ilikhome? Mukhati lina vaanu magana mashumi ishumi na magana mashumi gavili (120,000), vina vasikwiliile kimanya ilinofu ni livi, khanji mula muna fidiimwa finshi!”