Ilifuunyo lya Yoona
2
1 UYoona pina wáali mukhati mu wutumbu wa nswi, wámulombile uMUTWA, uNguluvi waakwe. 2 Wájeele,“Pina naava mu malava gangu nakulomba, owe MUTWA,
na yuuwe wamuliisa.
Pina naava nkholeela kifikha ku wusimu, nakukhoolela,
na yuuwe wamuliisa inkhoolo yangu.
3 Pina waava unaajile pa shoogo
paakhati naakhati pa bahali,
amalenga minshi gamilima,
amavingu minshi ganishila pashaanya panyangu.
4 Hata nda nihiiva kiija unaajile kutali noowe, leelo nisilekha kikufuunya owe Nguluvi, yuna uli ku litengule lyakho ilifinje.
5 Amalenga gamilima one,
ishoogo shanigubishila shila lubali,
amayembeya aga mu bahali ganigubishila pa mutwe.
6 Nayiikha mbakha ku luutu lwa mu fidunda ifya mu bahali.
Naava niija nisihulute ku nyi inyamalyango amadinde bila kihuma shiluta shiluta,
leelo owe Mutwa Nguluvi wangu,
wánikulusa kiifwa.
7 Inumbula yangu pina yaava yiilwa kisilikha,
nakukumbukha owe MUTWA.
Amafuunyo gangu gakufishila pina waava,
mu litengule lyakho ilibaagule.
8 Avaanu vina vifuunya amanguluvi, gina gangaya mana.
Vikiyidindila vaveene kipata imota yaanave.
9 Leelo one nisikuyeyemele uluyeyemo ulwa kikuhonjesa,
na kikuhumisa ishadanda.
Ulufingo luna nafinga kunyaakho nisikumalile.
UMUTWA mwene duguli ikulusa.”
10 UMUTWA wáyijovile inswi yimudeeshe uYoona ku nyi inyuumu, yoope yaatile yamudeekha.