Yoona
UYoona iijesa kimutyega uMUTWA uNguluvi
1
1 Pamwandi wáali akwali umuunu itambulwaga Yoona, lusawo lwa Amitaayi. Ilisiku limonga uMUTWA wámujovile uYoona, 2 kiija ndeeni, “Wuukha ulute ku Ninaawi ku lijumbi lila ilikhome, uvapavile, kiiva uwunansi waanave wanikhatasa.” 3 Leelo uYoona wáyansiise ulushuulo, wáfwatile insila yina yiita ku nyi yina yitambulwa Talashiishi, ikhaanaga kiita kisenga insengo ya MUTWA. Wáatile mbakha ku lijumbi lya Yopa, kisakula ishipugo shina shiiluta ku Talashiishi. Wáshaajile wáhomba uluyangalilo shi wáyangeele ishipugo, wáshuulile na vasenga nsengo ava mu shipugo kiita ku Talashiishi, ikhaanaga insengo ya MUTWA.4 UMUTWA wáshifiliishe ishimfulumbwe ishikhome mu bahali, ishipugo shabunshiilwe shaali nkholeela na kideenyekha. 5 Avasenga nsengo ava mu shipugo vatungumeele, valombile amanguluvi gaanave, na vayansiise kitaaga amasigo mu bahali kisheepusa uwufuno uwa mu shipugo. Uluhaavi ulo uYoona wáali ayiishile pansi sha mukhati mu shipugo, agoneleele utulo tufuno. 6 Umukhome uwa shipugo wáali ijendaga jendaga, wámwajile agonile, wámulutiile wámujova, “Una shi owe yuna wigoneelela utulo? Lamukha ulombe ilinguluvi lyakho, pamonga ilinguluvi lyakho linga tusungupila na kitukulusa uwuumi weesu.”
7 Baheene avasenga nsengo ava mu shipugo vajoveene, “Tilagusanie tiwumanye uwuvi uwu watwaga kwa wunansi wa naani.” Baheene valaguseenie, ululagusanio lwamugwiliile uYoona. 8 Apo vayansiise kimuposa vajeele, “Utujovele! Kwashi uwuvi uwu watwaga? Wisenga nsengo nshi? Wiihuma kwi? Uli mumyanjaa mushi?” 9 UYoona wávajoveele, “One nili Muhebulaniya, nili mufuunya uMUTWA, uNguluvi uwa ku wulanga, yuna wáwumbaga ibahali ni nyi inyuumu.”
10 Wáyonjeleese kivataviilila kiija umwene akhandi ikimutyega uMUTWA. Vaganile kipulikha iso avasenga nsengo vala piiva shilile kitungumala, vamujova, “Lino waagaha shi ndeeni?” 11 Uluhaavi ulo loona, ibahali yaali yipiyonjelelaga kinanjikha, vamuposiise uYoona, “Tikugahe shi baheene ibahali yisingamale?” 12 UYoona wávajovile, “Munikhate munoose mu bahali, yoope ibahali yisisingamale, kiiva ishimfulumbwe ishi, shavaaga kwa wunansi wangu one.”
13 Leelo avasenga nsengo, vajimbile kikholojela amateela vafishe ku nyi inyuumu, leelo vagombwele kiiva ibahali yaali yiyonjelela kinanjikha mandu. 14 Vamukholeele uMUTWA, vajovile, “Owe MUTWA tikikulomba usikhatubudaga kiiva tikimubuda umuunu uyu. Usikhatuhigaga kiiva tikunula idanda ya muunu uyu, nda ave agaya wunansi. Kiiva owe MUTWA, wadobokha kileeta aga goona gina gawonekha.” 15 Vamutoolile uYoona, vamutosiise mu bahali, yoope ibahali yasingameele. 16 Vamuswijile mandu uMUTWA, baheene vamushinjiile ifyadanda na kifinga ulufingo.
17 UMUTWA wáyijovile inswi inkhome yimumile uYoona, yamumilile. Woope wákheele mu wutumbu wa nswi, nsiku sitatu ishiminsi ni shilo.